༄༅། །འདི་གར་བོད་མིའི་སྒྲིག་འཛུགས་ནང་སྲིད་ལས་ཁུངས་ནས་བཏང་གནས་ནང་འཁོད་དོན། བཙན་བྱོལ་བོད་མིའི་སོ་ནམ་གཞིས་ཆགས་ཆེ་ཁག་གི་འཚོ་རྟེན་ས་ཞིང་ལ་བརྟེན་པ་ཤ་སྟག་ཡིན། སོ་ནམ་ཞིང་ལས་ཀྱི་ཤེས་ཚད་མཐོར་འདེགས་དང་ཕྱི་རབས་གཞོན་སྐྱེས་རྣམས་ཀྱི་བརྒྱུད་སོ་ནམ་ཞིང་ལས་ལ་སྤྲོ་སྣང་དང་འཚོ་ཐབས་ཀྱི་ངོ་བོར་དོན་གཉེར་བྱེད་མཁན་གང་མང་སྐྱེས་སྲིང་ལ་དམིགས་ཏེ་བོད་མིའི་སྒྲིག་འཛུགས་ནང་སྲིད་ལས་ཁུངས་ནས་ཕྱི་ལོ་ ༢༠༡༩ ལོ་ནས་ལོ་སྟར་ཕྱི་ཟླ་ ༩ ཚེས་ ༢ མང་གཙོ་དབུ་བརྙེས་པའི་དུས་ཆེན་མཛད་སྒོར་སོ་ནམ་གཞིས་ཆགས་ཡོངས་ནས་སོ་ནམ་རྩེད་ཕུད་གཅིག་དང་ན་གཞོན་སོ་ནམ་རྩེད་ཕུད་གཅིག་བཅས་ལ་གཟེངས་བསྡོད་ཕྱག་འཁྱེར་མཉམ་ཧིན་སྒོར་ ༡༠༠༠༠༠ དང་སྐུ་ཐང་གཅིག་བཅས་འབུལ་རྒྱུའི་ལམ་སྲོལ་གཏོད་ཡོད།
འདི་ལོའི་སོ་ནམ་གཟེངས་བསྟོད་བྱ་དགའ་བཞེས་མཁན་རྩེད་ཕུད་གཉིས་འདེམས་སྒྲུག་ཞུས་ཁོངས་ནས་སོ་ནམ་རྩེད་ཕུད་བྱ་དགའ་དེ་མན་སྤར་ཕན་བདེ་གླིང་གཞིས་ཁོངས་བསྟན་འཛིན་འཕྲིན་ལས་ལགས་འདེམས་སྒྲུག་བྱུང་ཡོད། ཁོང་དང་སློབ་ནས་རྩ་དགོངས་རྗེས་སོ་ནམ་ཞིང་ལས་ཁོ་ནར་དོན་གཉེར་གྱིས་ཁྱོན་ཞིང་ས་ཨེ་ཀ་ ༡༣༨ ནང་ཞིང་ཆུ་འདྲེན་གཏོང་གི་མཐུན་རྐྱེན་སྦྱར་ཏེ་ལོ་འཁོར་མོར་སྟོན་འབྲས་སྣ་འཛོམས་འདེབས་ལས་དང་། བ་ཕྱུགས་གྲངས་ ༡༡ གསོ་ཉར་གྱི་དཀར་ཆུ་དང་དེའི་ཐོན་སྐྱེད་སོགས་ཕྱིར་ཚོང་ཐོག་སོ་ནམ་ལས་དོན་ཡར་རྒྱས་གཏོང་རྒྱུའི་དགོས་མཁོའི་མཐུན་རྐྱེན་འཕྲུལ་འཁོར་དང་ཡོ་ཆས་སོགས་མཁོ་སྒྲུབ་ཀྱིས་སོ་ནམ་ཞིང་ལས་ཀྱི་ཡོང་འབབ་ནས་ནང་མིའི་འཚོ་གོས་སྲ་བརྟན་མ་ཟད་གཞན་ལའང་དམིགས་དཔེ་མཚོན་ཐུབ་པ་བྱུང་ཡོད། 
ན་གཞོན་རྩེད་ཕུད་སོ་ནམ་གཟེངས་བསྟོད་བྱ་དགའ་བཞེས་མཁན་ཁོངས་སྦེལ་ཀོབ་བདེ་སྐྱིད་སླར་གསོའི་གཞིས་ཆགས་སུ་གནས་སྡོད་བློ་གྲོས་དགེ་ལེགས་ལགས་ཡིན། ཁོང་ནི་ཆུང་བྱིས་པའི་དུས་ནས་སོ་ནམ་ཞིང་ལས་ལ་དོ་དབྱིངས་དང་ཉམས་ལེན་བྱེད་མཁན་ཡིན་པས་ཁྱོན་ཞིང་ས་ཨེ་ཀ ༦༢ ནང་ཚོང་ཁེ་ཆེ་བའི་སྟོན་འབྲས་འདེབས་ལས་དང་། སྒོ་ཕྱུགས་གསོ་སྐྱོང་གི་དཀར་ཆུ་ཐོན་འབབ་ས་གནས་མཉམ་འབྲེལ་བརྒྱུད་ཕྱིར་ཚོང་དང་སོ་ནམ་ལས་དོན་ཚགས་ཚུད་ཡར་རྒྱས་ཆེད་དགོས་མཁོའི་འཕྲུལ་འཁོར་ཡོ་ཆས་གསར་བསྐྲུན་གྱིས་ན་གཞོན་ཚོར་སེམས་འགུལ་ཐེབས་པ་དང་སོ་ནམ་ལས་དོན་རྒྱུན་གནས་ཐུབ་ཐབས་སུ་སྙུགས་སྲིང་ནས་འབད་བརྩོན་ཞུ་མུས་ཡིན།
ཡར་ལུང་སོ་ནམ་གཟེངས་བསྟོད་བྱ་དགའ་བཞེས་མཁན་གཉིས་ཀ་རྡ་སར་མགྲོན་འབོད་ཀྱིས་མང་གཙོ་དུས་ཆེན་གཞུང་འབྲེལ་མཛད་སྒོའི་ཐོག་བྱ་དགའ་གནང་སྲོལ་ཡོད་ནའང་འདི་ལོ་རྒྱ་ནད་ཏོག་དབྱིབས་ནད་ཡམས་ ༡༩ རྐྱེན་པས་ས་གནས་ས་ཐོག་གི་གཞུང་འབྲེལ་མཛད་སྒོའི་ཐོག་འབྲེལ་ཡོད་ས་གནས་འགོ་འཛིན་ལས་ཁུངས་བརྒྱུད་བྱ་དགའ་གསོལ་བསྩལ་གནང་ཡོད། །
