༄༅། །ཕྱི་ལོ་ ༢༠༢༡ ཟླ་ ༩ ཚེས་ ༤ ཉིན་གྱི་སྔ་དྲོར་ཕ་རན་སིའི་རྒྱལ་ས་པེ་རི་སིར་བོད་དང་ཧི་མཱ་ལ་ཡའི་དུས་སྟོན་ཐེངས་ ༢༠ དབུ་འབྱེད་མཛད་སྒོ་ཚོགས་ཡོད་པ་དང་། དབུ་འབྱེད་མཛད་སྒོར་པེ་རི་སིའི་གྲོང་སྡེ་ཨང་ ༡༢ པའི་སྤྱི་ཁྱབ་ལྕམ་སྐུ་ཨེམ་མ་ནུ་ལེ་པེ་རེ་མ་རེ་ (Emmanuelle Pierre-Marie) ལགས་དང་། ཕ་རན་སིའི་གྲོས་ཚོགས་འཐུས་མི་ལྕམ་སྐུ་ཨེ་ལི་ཛེ་བྷེ་ཐི་ (Elizabeth Toutut-Picard) མཆོག་དང་ཁོང་གི་སྐུ་ཟླ། དེ་བཞིན་པེ་རི་སི་གྲོང་སྡེ་ལྷན་ཁང་ཨང་ ༢༠ པའི་ཚོགས་མི་གྷར་རི་གོ་སི་ (Genevieve Garrigos) ལགས་བཅས་ཕེབས་སྐབས་སྦེལ་ཇམ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་དང་ཕ་རན་སིའི་སྐུ་ཚབ་དོན་ཁང་གི་དྲུང་ཆེ་རྣམ་རྒྱལ་བསམ་གྲུབ་ལགས་རྣམ་གཉིས་ཀྱིས་ཕེབས་བསུའི་སྣེ་ལེན་གཟབ་རྒྱས་ཞུས་གནང་ཡོད།དེ་ཡང་མཛད་སྒོའི་ཐོག་མར་ཚོགས་བཅར་བ་ཡོངས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེ་སྤོས་སྣེས་སྔོན་བསུས་ཏེ་བཞུགས་ཁྲིར་མངའ་གསོལ་ཞུས། དེ་ནས་སྦེལ་ཇམ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་སྣེ་ཁྲིད་དེ་སྐུ་མགྲོན་རྣམས་ནས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེར་མནྡལ་རྟེན་གསུམ་འདེགས་འབུལ་ཞུས་གྲུབ་མཚམས་གྲྭ་བསྟན་འཛིན་སྤེན་པ་ལགས་ཀྱིས་ཁྲུས་གསོལ་རབ་གནས་གནང་ཡོད།དེ་རྗེས་སྦེལ་ཇམ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་རང་ཉིད་བོད་ཀྱི་དུས་སྟོན་དང་འབྲེལ་བ་བྱུང་བའི་བརྒྱུད་རིམ་སྐོར་དྲན་གསོ་དང་སྦྲགས་ཕ་རན་སིའི་གཞུང་མང་གཉིས་ནས་བོད་དོན་སླད་རྒྱབ་སྐྱོར་གནང་དང་གནང་བཞིན་པར་ཐུགས་རྗེ་ཞུས་ཡོད། གཞན་ཡང་ཁོང་གིས་ཕ་རན་སིའི་རིག་གཞུང་དང་། སྐད་ཡིག ཞལ་ལག་སོགས་ལ་ཧ་ཅང་ཡིད་སྨོན་ཞུ་གནང་གི་ཡོད། ཅེས་གསུངས།

ཕྱོགས་མཚུངས་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་ལོ་མང་རིང་བོད་ཀྱི་དུས་སྟོན་སླད་ཚགས་ཚུད་ལྡན་པའི་ཕྱག་ལས་གནང་མཁན་སྐབས་བཅུ་བདུན་པའི་ཡུ་རོབ་དང་ལྷོ་ཨ་ཕི་རི་ཀའི་ཁུལ་གྱི་སྤྱི་འཐུས་ཐུབ་བསྟན་རྒྱ་མཚོ་ལགས་དང་། ཕ་རན་སི་བོད་རིགས་ཚོགས་པའི་ཚོགས་གཙོ་ཟུར་པ་བསྟན་འཛིན་སྤེན་པ་ལགས། ད་ལྟའི་ཕ་རན་སི་བོད་རིགས་ཚོགས་པའི་ཚོགས་གཙོ་ཀརྨ་འཕྲིན་ལས་ལགས། དེ་བཞིན་དང་བླངས་པ་རྣམ་པ་དང་། ལས་རོགས་རྣམ་རྒྱལ་བསམ་གྲུབ་ལགས། ལེགས་བཤད་ལགས། འཇིགས་མེད་རྡོ་རྗེ་ལགས་བཅས་ལ་ཐུགས་རྗེ་ཞུས་གནང་ཡོད།པེ་རི་སིའི་གྲོང་སྡེ་ཨང་ ༡༢ པའི་སྤྱི་ཁྱབ་ལྕམ་སྐུ་ཨེམ་མ་ནུ་ལེ་པེ་རེ་མ་རེ་ལགས་ཀྱིས་བོད་དོན་ཆེད་དུ་རྒྱབ་སྐྱོར་ཤུགས་ཆེ་གནང་རྒྱུའི་ཞལ་བཞེས་གནང་ཡོད་པ་མ་ཟད། བོད་མཐོ་སྒང་གི་ཁོར་ཡུག་གི་གལ་གནད་སོགས་ཀྱི་སྐོར་གསུངས། ཕ་རན་སིའི་གྲོས་ཚོགས་འཐུས་མི་ལྕམ་སྐུ་ཨེ་ལི་ཛེ་བྷེ་ཐི་མཆོག་གིས་རང་ཉིད་ལོ་ངོ་ ༡༥ གོང་བོད་དུ་གཟིགས་སྐོར་ཕེབས་པ་ནས་བཟུང་བོད་དང་མིར་འབྲེལ་འདྲིས་ཟབ་མོ་བྱུང་བའི་སྐོར་དང་། ཕ་རན་སིའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ཡིན་པའི་ཆ་ནས་བོད་ལ་གདུང་སེམས་མཉམ་སྐྱེ་དང་རྒྱབ་སྐྱོར་གནང་རྒྱུའི་ཆོད་སེམས་བརྟན་པོ་ཡོད་པ་སོགས་ཀྱི་སྐོར་གསུངས།

གཞན་ཡང་ཁོང་གིས་ཕྱི་ལོ་ ༢༠༡༩ ལོར་ལ་ཊི་ཝི་ཡའི་རྒྱལ་ས་རི་གར་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་བདུན་པའི་གསལ་བསྒྲགས་ཟིན་བྲིས་ཚོགས་ཆུང་གི་ཚོགས་གཙོ་གནང་ཡོད། པེ་རི་སི་གྲོང་སྡེ་ལྷན་ཁང་ཨང་ ༢༠ པའི་ཚོགས་མི་གྷར་རི་གོ་སི་ (Genevieve Garrigos) ལགས་ཀྱིས་བོད་ཀྱི་གནད་དོན་ནི་འགྲོ་བ་མིའི་ཐོབ་ཐང་གི་གནད་དོན་གལ་ཆེན་ཞིག་ཡིན་པ་སོགས་ཀྱི་སྐོར་གསུངས།བོད་དང་ཧི་མཱ་ལ་ཡའི་དུས་སྟོན་མཛད་སྒོར་བོད་ཀྱི་ཐུན་མོང་མ་ཡིན་པའི་རིག་གཞུང་གཞས་སྣ་འཁྲབ་སྟོན་དང་། གློག་བརྙན། ལག་ཤེས་བཟོ་རིག་སོགས་གཟིགས་འབུལ་ཞུས་ཡོད། ཕ་རན་སིའི་སྐུ་ཚབ་དོན་ཁང་ (Bureau du Tibe) དང་མེ་སོན་ཌུ་ཏི་བྷེ་ཐེ་ (Maison du Tibet) ཞེས་པའི་བོད་དོན་རྒྱབ་སྐྱོར་ཚོགས་པ་གཉིས་ནས་ཐེངས་འདིའི་བོད་དང་ཧི་མཱ་ལ་ཡའི་དུས་སྟོན་གོ་སྒྲིག་གནང་ཡོད་པ་བཅས།།