༄༅། །ཕ་རན་སི་བོད་རིགས་ཚོགས་པའི་གོ་སྒྲིག་འོག་ཕ་རན་སིའི་རྒྱལ་ས་པེ་རི་སིའི་རེ་པ་པི་ལི་ཁི་ཐང་ཆེན་ (Republic Square) དུ་བོད་མིའི་མང་གཙོ་དབུ་བརྙེས་ཏེ་ལོ་ངོ་ ༦༡ འཁོར་བའི་དུས་ཆེན་སྲུང་བརྩིའི་མཛད་སྒོ་ཚོགས་ཡོད།

དེ་ཡང་བོད་མིའི་མང་གཙོ་དབུ་བརྙེས་ཏེ་ལོ་ངོ་ ༦༡ འཁོར་བའི་དུས་ཆེན་སྲུང་བརྩིའི་མཛད་སྒོར་སྐུ་མགྲོན་གཙོ་བོ་སྦེལ་ཇམ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་དང་། པེ་རི་སིའི་གྲོང་སྡེའི་སྤྱི་ཁྱབ་པ་གཞོན་པ་སྐུ་ཞབས་རོ་མེ་རོ་མ་ཡི་ཀེལ་ (Jean-Luc Romero-Michel) ལགས་དང་། པེ་རི་སི་གྲོང་སྡེ་ལྷན་ཁང་ཨང་ ༢༠ པའི་ཚོགས་མི་གྷར་རི་གོ་སི་ (Genevieve Garrigos) ལགས། དེ་བཞིན་ས་གནས་བོད་མི་དང་བོད་དོན་རྒྱབ་སྐྱོར་བ་སོགས་མཉམ་ཞུགས་གནང་ཡོད།མཛད་སྒོའི་ཐོག་མར་ཕ་རན་སི་བོད་རིགས་ཚོགས་པའི་དྲུང་ཆེ་དབྱངས་སྐྱིད་ལགས་ཀྱིས་ངོ་སྤྲོད་གསུང་བཤད་གནང་རྗེས་མཉམ་ཞུགས་པ་ཡོངས་ནས་བོད་རྒྱལ་ཁབ་ཆེན་པོའི་རྒྱལ་གླུ་དབྱངས་སུ་གྱེར་གྲུབ་མཚམས་བོད་དོན་སླད་རང་སྲོག་བློས་བཏང་གནང་མཁན་ཡོངས་ལ་སྐར་མ་གཅིག་རིང་ངག་བཅད་ཞུས་པ་དང་འབྲེལ་མང་གཙོ་གསར་གཞས་འབུལ་ལམ་ཞུས་གྲུབ་མཚམས་ཕ་རན་སི་བོད་རིགས་ཚོགས་པའི་ཚོགས་གཙོ་ཀརྨ་འཕྲིན་ལས་ལགས་ཀྱིས་བོད་མིའི་མང་གཙོ་འཕེལ་རིམ་སྐོར་གསུང་བཤད་སྒྲོགས་སྦྱང་གནང་ཡོད།

དེ་རྗེས་སྐུ་མགྲོན་གཙོ་བོ་སྦེལ་ཇམ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་ཨ་རི་དང་ཨིན་ཡུལ་སོགས་ཀྱིས་གཙོས་འཛམ་གླིང་གི་མང་གཙོ་ལམ་ལུགས་སྐོར་དང་། འཛམ་གླིང་གི་མང་གཙོ་འཕེལ་རིམ་ལ་བལྟས་པ་ཡིན་ན། མི་མང་པོས་སོ་སོའི་རྒྱལ་ཁབ་མང་གཙོའི་ལམ་ལུགས་སུ་བསྒྱུར་སླད་རང་སྲོག་ཀྱང་བློས་བཏང་གནང་ཡོད་པའི་སྐོར་དང་། ཕྱི་ལོ་ ༡༧༨༩ ཟླ་ ༧ ཚེས་ ༤ ཉིན་ཕ་རན་སིའི་རྒྱལ་ས་པེ་རི་སིར་ཕ་རན་སིའི་གསར་བརྗེ་བྱུང་རྗེས་རིམ་པས་རྒྱལ་པོའི་སྲིད་དབང་ལམ་ལུགས་ཉམས་རྒུད་དུ་ཕྱིན་པ་སོགས་ཀྱི་སྐོར་གསུངས།ཕྱོགས་མཚུངས་སྦེལ་ཇམ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་བོད་མིའི་མང་གཙོ་བསྒྱུར་བཅོས་མཛད་དེ་བོད་མི་ཡོངས་ལ་མང་གཙོ་གསོལ་རས་སྩལ་བའི་སྐོར་དང་། བོད་མི་ཡོད་དོ་ཅོག་ནས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ཐུགས་དགོངས་མ་དཀྲུག་པར་མགོན་པོ་གང་ཉིད་ཀྱི་དགོངས་གཞི་ལྟར་ཤར་སྐྱོད་དགོས་པ་སོགས་ཀྱི་སྐོར་གསུངས།

མཐར་སྐུ་མགྲོན་གཙོ་བོ་སྦེལ་ཇམ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་བསྐལ་བརྒྱར་བརྟན་པའི་སྨོན་འདུན་ཞུས་ཡོད་པ་བཅས།།