༄༅། །བོད་མིའི་སྒྲིག་འཛུགས་ཀྱི་དབུས་ཏོག་དབྱིབས་གཉན་རིམས་ཛ་དྲག་ལས་དོན་ཚོགས་ཆུང་གི་ཚོགས་གཙོ་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས་དང་ཚོགས་མི་བདེ་ལེགས་སྨན་ཁང་གི་འགན་འཛིན་ཟླ་བ་ཕུན་སྐྱིད་ལགས་སྦན་ད་ར་ནོར་རྒྱས་གླིང་བོད་མིའི་གཞིས་ཆགས་སུ་ཕེབས་འབྱོར་སྐབས་སྦན་ད་ར་ནོར་རྒྱས་གླིང་བོད་མིའི་གཞིས་ཆགས་ཀྱི་ས་གནས་འགོ་འཛིན་སྐལ་བཟང་སྲི་གཅོད་ལགས་ཀྱིས་གཙོས་གཞུང་ཁོངས་མིན་པའི་ཚོགས་པ་ཁག་གི་སྐུ་ཚབ་སོགས་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད།དེ་ཡང་དབུས་ཏོག་དབྱིབས་གཉན་རིམས་ཛ་དྲག་ལས་དོན་ཚོགས་ཆུང་གི་ཚོགས་གཙོ་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས་དང་ཚོགས་མི་བདེ་ལེགས་སྨན་ཁང་གི་འགན་འཛིན་ཟླ་བ་ཕུན་སྐྱིད་ལགས་རྣམ་གཉིས་ཀྱིས་ས་གནས་འཕྲོད་བསྟེན་སྨན་ཁང་དང་ཡན་ལག་སྨན་རྩིས་ཁང་སོགས་ལ་ཆེད་ཕེབས་གནང་ཡོད་པ་མ་ཟད། སྦན་ད་ར་ནོར་རྒྱས་གླིང་གཞིས་གྲོང་གཉིས་ཀྱི་སྐུ་ཚབ་རྣམས་དང་ཐུག་འཕྲད་ཀྱིས་དྲི་བ་དྲིས་ལན་གནང་ཡོད།གཞན་ཡང་ཁོང་རྣམ་པ་གཉིས་ཀྱིས་ས་གནས་ཏོག་དབྱིབས་གཉན་རིམ་ཛ་དྲག་ལས་དོན་ཚོགས་ཆུང་གི་ཚོགས་མི་རྣམ་པ་དང་ལྷན་ཚོགས་འདུ་ཚོགས་ཏེ་ཏོག་དབྱིབས་གཉན་སྔོན་འགོག་སྨན་ཁབ་ཀྱི་གནས་སྟངས་དང་། ཏོག་དབྱིབས་གཉན་རིམས་ཀྱི་ནད་རླབས་གསུམ་པ་སྔོན་འགོག་དང་འབྲེལ་བའི་གྲ་སྒྲིག་གནང་ཕྱོགས་སོགས་ཀྱི་སྐོར་ལམ་སྟོན་གནང་ཡོད་པ་བཅས།།