༄༅། །འདི་གར་ཐའེ་ཝན་བོད་ཀྱི་སྐུ་ཚབ་དོན་གཅོ
བོད་དོན་རྒྱབ་སྐྱོར་བ་ཏུང་ཅིན་རུང་ལགས་ནི་ཐའེ་ཝན་བོད་རང་བཙན་སློབ་ཕྲུང་ཚོགས་པའི་རྒྱུན་ལས་ཚོགས་མི་ཡིན་ཅིང་། ཕྱི་ལོ་ ༢༠༠༦ ལོར་ཐེངས་དང་པོ་རྒྱ་གར་དུ་འབྱོར་སྐབས་བོད་དོན་ལ་དོ་སྣང་བྱུང་བ་དང་། དེ་ནས་རིམ་བཞིན་བོད་དོན་རྒྱབ་སྐྱོར་བ་ཞིག་ཆགས་ཏེ་ཐའེ་ཝན་དང་ཧོང་ཀོང་གི་སློབ་ཕྲུག་ཚོགས་པ་ཐེངས་མང་བཞུགས་སྒར་རྡ་སར་འཁྲིད་དེ་བོད་དོན་རྒྱུས་ལོན་དང་ཁྱབ་བསྒྲགས་ཀྱི་ལས་འགུལ་སྤེལ། མོ་ནི་ཧོང་ཀོང་དུ་བོད་ཀྱི་རྒྱལ་དར་འཁྱེར་ནས་ལས་འགུལ་སྤེལ་མཁན་ཐོག་མའི་གྲས་ཀྱང་ཆགས་ཡོད།
དེ་ནས་སྐུ་ཚབ་དོན་གཅོད་ཀྱིས་རི་མོ་བ་ཏུང་ཅིན་རུང་ལགས་སྔོན་མ་རྡ་རམ་ས་ལ་ནས་ངོ་ཤེས་རྙིང་པ་ཡིན་པ་དང་། ད་ཐེངས་གཞུང་འབྲེལ་མིན་པའི་ཚོགས་པ་ཁག་གཉིས་ནས་མོའི་རི་མོ་འགྲེམ་སྟོན་གྱི་ལས་འགུལ་སྤེལ་བར་ཐུགས་རྗེ་ཆེས་ཞུས་པ་དང་ཆབས་ཅིག ལས་འགུལ་ལ་རྒྱབ་སྐྱོར་གནང་མཁན་ཐའེ་ཝན་གྲོས་ཚོགས་ཀྱི་འཐུས་མི་དང་། ཐའེ་པེ་གྲོས་ཚོགས་ཀྱི་འཐུས་མི། ལས་འགུལ་དུ་མཉམ་ཞུགས་གནང་མཁན་ཚང་མར་ཐུགས་རྗེ་ཆེ་ཞུས། སྐུ་ཚབ་དོན་གཅོད་ཀྱིས་རི་མོ་དེ་དག་ནི་མི་ལོ་བདུན་ཅུ་ལྷག་རིང་རྒྱ་ནག་དམར་གཞུང་གི་བོད་མིར་གདུག་རྩུབ་མནར་གཅོད་ཇི་ལྟར་བཏང་བའི་ལོ་རྒྱུས་ཆགས་ཀྱི་ཡོད་སྟབས། མི་ལོ་བདུན་ཅུ་ལྷག་རིང་བོད་དོན་འཐབ་རྩོད་ཀྱི་དཔལ་འབར་རྒྱུན་མ་ཆད་པར་སྤར་ཡོད་པའི་བདེན་རྟགས་ཀྱང་ཡིན་པས། རི་མོ་བ་ཏུང་ཅིན་རུང་ལགས་དང་ཁྱེད་རྣམ་པས་རྒྱབ་སྐྱོར་དེས་སྡུག་བསྔལ་འོག་མནར་བཞིན་པའི་ང་ཚོ་བོད་མི་ཚོར་སེམས་ཤུགས་འཕར་མ་ཞིག་སྟེར་སོང་། བོད་དོན་འཐབ་རྩོད་ཀྱི་ཆེད་དུ་རང་སྲོག་བློས་བཏང་གནང་མཁན་ཚོ་ལ་བསྔོ་བ་སྨོན་ལམ་ཞིག་དང་ཁོང་ཚོའི་རྗེས་ཤུལ་ནང་མི་ཚོར་སེམས་གསོ་ཆེན་པོ་ཞིག་ཆགས་ངེས་ཅེས་གསུངས།
དེ་ནས་ཐའེ་ཝན་གྲོས་ཚོགས་ཀྱི་འཐུས་མི་དང་། ས་གནས་གྲོས་ཚོགས་ཀྱི་འཐུས་མི། དགེ་བཤེས་འཕྲིན་ལས་རྒྱ་མཚོ་ལགས། ཐའེ་བོད་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་འགན་འཛིན་བཀྲ་ཤིས་ཚེ་རིང་ལགས་བཅས་ཀྱིས་རིམ་བཞིན་གསུང་བཤད་གནང་གྲུབ་མཚམས། དྲན་རྟེན་སྐུ་པར་མཉམ་སྒྲོན་གནང་སྟེ་དབུ་འབྱེད་མཛད་སྒོ་གྲོལ་ཡོད།
ད་ཐེངས་རི་མོ་འགྲེམ་སྟོན་གྱི་ལས་འགུལ་འདི་ཕྱི་ཟླ་ ༡༠ ཚེས་ ༩ བར་དུ་ཡིན་འདུག་པ་དང་། དེའི་རིང་དུ་བགྲོ་གླེང་ཚོགས་འདུ་དང་མཚན་ཚོགས་སོགས་ལསའགུལ་སྣ་ཚོགས་སྤེལ་རྒྱུ་ཡིན་འདུག་པ་བཅས། །
