༄༅། །ཕྱི་ལོ་ ༢༠༢༡ ཟླ་ ༩ ཚེས་ ༥ ཉིན་ཉི་ཧོང་སྐུ་ཚབ་དོན་ཁང་གི་གོ་སྒྲིག་འོག་ཉི་ཧོང་དང་ལྷོ་ཀོ་རི་ཡའི་བོད་མི་རྣམས་ནས་དྲ་ལམ་བརྒྱུད་བོད་མིའི་མང་གཙོའི་དུས་ཆེན་ཐེངས་ ༦༡ སྲུང་བརྩི་ཞུས་ཡོད།

དེ་ཡང་ཐོག་མར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་སྐར་མ་བཅོ་ལྔ་ཙམ་གྱི་རིང་བོད་མིའི་མང་གཙོ་འཕེལ་རིམ་སྐོར་བཀའ་སློབ་ཕེབས་པའི་བརྙན་འཕྲིན་ཞིག་གཟིགས་འབུལ་ཞུས་རྗེས་ཉི་ཧོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་བཀའ་ཤག་གི་གསུང་བཤད་སྒྲོགས་སྦྱང་དང་འབྲེལ་མང་གཙོའི་གལ་གནད་དང་བོད་མིའི་སྒྲིག་འཛུགས་ཀྱི་ལས་དོན་གནང་ཕྱོགས་སྐོར་གསུངས། དེ་བཞིན་ཁོང་གིས་འཛམ་གླིང་གང་སར་གནས་པའི་བོད་མི་རྣམས་ནས་བོད་ནང་གི་ཛ་དྲག་གནས་སྟངས་དང་། གཞིས་ལུས་བོད་རིགས་སྤུན་ཟླ་རྣམས་ནས་རང་དབང་ལུང་པར་ཡོད་པའི་བོད་མི་རྣམས་ལ་རང་དབང་སླར་གསོ་གནང་དགོས་པའི་རེ་བ་འཆོལ་བཞིན་ཡོད་པ་དེ་དག་མ་བརྗེད་པ་གནང་རོགས་ཞེས་རེ་སྐུལ་ཞུས་གནང་ཡོད།དྲ་ལམ་བརྒྱུད་མཉམ་ཞུགས་གནང་མཁན་ཡོངས་ནས་ད་ལྟ་གྲོས་ཚོགས་ཚོགས་མ་ཐུབ་པའི་དཀའ་ངལ་དེ་དག་སེལ་ནས་གང་མགྱོགས་གྲོས་ཚོགས་འཚོགས་དགོས་པའི་རེ་སྐུལ་ཞུས་གནང་ཡོད། དེ་རྗེས་ཀོ་རི་ཡ་བོད་ཁང་གི་འགན་འཛིན་དགེ་བཤེས་ནམ་མཁའ་ལགས་དང་། ཉི་ཧོང་བོད་རིགས་ཚོགས་པའི་བསོད་ནམས་ལགས། ཉེ་ཆར་གསར་བཙུགས་གནང་བའི་ལྷོ་ཀོ་རི་ཡའི་བོད་རིགས་ཚོགས་པའི་དགེ་བཤེས་བསྟན་འཛིན་བཟང་པོ་ལགས་བཅས་ཀྱིས་བོད་དོན་སླད་གཅིག་སྒྲིལ་དང་ནུས་པ་མཉམ་སྤུངས་དགོས་གལ་སོགས་ཀྱི་སྐོར་གསུངས།

ཉི་ཧོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་ཉེ་ཆར་ཉི་ཧོང་གྲོས་ཚོགས་འཐུས་མི་རྣམས་ལ་བོད་ནང་གི་དངོས་ཡོད་གནས་སྟངས་སྐོར་ཤོག་གྲངས་དགུ་ཅན་གྱི་སྙན་ཐོ་ཞིག་ཕུལ་བ་དེ་ཉིད་འགྲེལ་བརྗོད་གནང་ཡོད། ཉི་ཧོང་སྐུ་ཚབ་དོན་གཅོད་ཁང་གི་རྩིས་པ་དང་དྲུང་ཆེ་ལས་ཚབ་འཇིགས་མེད་ཚེ་བརྟན་ལགས་ཀྱིས་ཐེངས་འདིའི་མཛད་རིམ་གཙོ་སྐྱོང་གནང་ཡོད་པ་བཅས།།