༄༅། །ཕྱི་ལོ་ ༢༠༢༡ ཟླ་ ༩ ཚེས་ ༢༥ རེས་གཟའ་སྤེན་པ་ཉིན་བྱང་ཨ་རིའི་སྐུ་ཚབ་དོན་ཁང་གི་ཁེ་མེད་སྤྱི་ཚོགས་ཞབས་ཞུ་ཐེབས་རྩའི་ལོ་འཁོར་འགན་འཛིན་ལྷན་ཚོགས་ཀྱི་ཚོགས་འདུ་བསྐོང་ཚོགས་གནང་ཡོད་པ་དང་། བྱང་ཨ་རི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས་ཚོགས་འདུ་གཙོ་སྐྱོང་གནང་ཡོད།
དེ་ཡང་བྱང་ཨ་རིའི་སྐུ་ཚབ་དོན་ཁང་གི་ཁེ་མེད་སྤྱི་ཚོགས་ཞབས་ཞུ་ཐེབས་རྩའི་དམིགས་ཡུལ་ནི། བོད་ཀྱི་ཆོས་དང་རིག་གཞུང་། སྐད་ཡིག་སོགས་སྲུང་སྐྱོབ་དང་། བོད་མིའི་སྤྱི་ཚོགས་དང་དཔལ་འབྱོར་གྱི་བདེ་དོན་སླད་གཟིགས་རྟོགས་གནང་རྒྱུ་དེ་ཡིན། བྱང་ཨ་རིའི་སྐུ་ཚབ་དོན་ཁང་གི་ཁེ་མེད་སྤྱི་ཚོགས་ཞབས་ཞུ་ཐེབས་རྩས་བོད་མི་གཞོན་སྐྱེས་འགོ་ཁྲིད་དང་། གཟའ་མཇུག་སློབ་གྲྭའི་དགེ་རྒན་རྣམས་ལ་ཟབ་སྦྱོང་གོ་སྒྲིག་གནང་ཡོད་པ་མ་ཟད། ཏོག་དབྱིབས་གཉན་རིམས་སྐབས་དཔལ་འབྱོར་གྱི་མཐུན་འགྱུར་གནང་ཡོད། 
སྐབས་དེར་བྱང་ཨ་རི་སྐུ་ཚབ་དོན་ཁང་གི་དྲུང་ཆེ་བཀྲ་ཤིས་དོན་གྲུབ་ལགས་ཀྱིས་ཐེབས་རྩས་ཕྱི་ལོ་ ༢༠༢༠ ལོར་ལས་གཞི་ཕྱག་བསྟར་གནང་བ་ཁག་ངོ་སྤྲོད་དང་། རྩིས་པ་ཉི་མ་བཟང་པོ་ལགས་ཀྱིས་རྩིས་ཁྲ་དང་སྔོན་རྩིས་སྙན་སྒྲོན་ཞུས་པ་དང་། འགན་འཛིན་ལྷན་ཚོགས་ནས་དཔལ་འབྱོར་འདུ་འགོད་སྐོར་གྲོས་བསྡུར་གནང་ཡོད།
ཚེ་འདས་སྐུ་ཞབས་ཚེ་དབང་སྟོབས་རྒྱལ་ལགས་ཀྱིས་ཐེབས་རྩའི་མིང་ཐོག་ཨ་སྒོར་ ༨༨༧,༩༦༩་༥༤ ཐམ་པ་ཞལ་འདེབས་གནང་བ་དེ་ཉིད་འདས་པོའི་ཁ་ཆེམས་ལྟར་ཕ་མ་གཉིས་ཀྱི་མིང་ཐོག་ནས་བོད་མི་ཉམ་ཐག་རྒས་གཅོང་རིགས་ཀྱི་ངལ་སེལ་སླད་དང་། དེ་བཞིན་བོད་ཀྱི་ཆོས་དང་རིག་གཞུང་། སྐད་ཡིག་བཅས་སྲུང་སྐྱོབ་སླད་འགྲོ་གྲོན་གཏང་རྒྱུ་ཐག་གཅོད་བྱུང་ཡོད།
མཐར་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས་མཇུག་སྡོམ་གསུང་བཤད་གནང་ཡོད་པ་བཅས།།
