༄༅། །ཕྱི་ལོ་ ༢༠༢༡ ཟླ་ ༩ ཚེས་ ༢༧ ཉིན་རྒྱ་གར་གྱི་གྲོང་ཁྱེར་ཅིན་ཌི་གར་དུ་རྟེན་གཞི་བྱས་པའི་ཁེ་ན་ཌའི་གཞུང་ཚབ་ཆེན་མོ་ལྕམ་སྐུ་མི་ཡ་ཡེན་ (Mrs. Mia Yen) མཆོག་ཀུལླུ་དཔལ་རབ་གླིང་བོད་མིའི་གཞིས་ཆགས་སུ་ཕེབས་པར་ཀུལླུ་དཔལ་རབ་གླིང་གི་ས་གནས་འགོ་འཛིན་གྱིས་ཕེབས་བསུའི་སྣ་ེལེན་གཟབ་རྒྱས་ཞུས་ཡོད།

དེ་ཡང་ཕེབས་བསུའི་མཛད་སྒོ་དབུ་འཛུགས་ཀྱི་ཐོག་མར་ཁེ་ན་ཌའི་གཞུང་ཚབ་ཆེན་མོ་མི་ཡ་ཡེན་མཆོག་གིས་མར་ཕྱེ་ཞལ་ཕྱེ་དང་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེར་མཇལ་དར་ཕུལ་རྗེས། ས་གནས་འགོ་འཛིན་ཐུབ་བསྟན་ཆོས་འཕེལ་ལགས་ཀྱིས་ཕེབས་བསུའི་གསུང་བཤད་དང་སཾ་བྷོ་ཌ་མ་ནཱ་ལཱིའི་སློབ་ཕྲུག་རྣམས་ནས་རིག་གཞུང་འཁྲབ་སྟོན་གཟིགས་འབུལ་ཞུས།དེ་ནས་ཁེ་ན་ཌའི་གཞུང་ཚབ་ཆེན་མོ་མི་ཡ་ཡེན་མཆོག་གིས་གསུང་བཤད་གནང་གྲུབ་མཚམས་ས་གནས་འགོ་འཛིན་ཐུབ་བསྟན་ཆོས་འཕེལ་ལགས་དང་། ས་གནས་འཐུས་ཚོགས་ཀྱི་ཚོགས་གཙོ་རྡོ་རྗེ་ཆོས་འཕེལ་ལགས་རྣམ་གཉིས་ཀྱིས་ཀུལླུ་མ་ནཱ་ལཱི་ཁུལ་གྱི་བོད་མི་ཡོངས་ཀྱི་ཚབ་ཞུས་ཏེ་ཁེ་ན་ཌའི་གཞུང་ཚབ་མཆོག་ལ་དྲན་རྟེན་ཕྱག་རྟགས་ཤིག་འབུལ་ལམ་ཞུས་ཡོད།

མཐར་ས་གནས་རང་བདེན་ཚོགས་ཆུང་གི་ཚོགས་གཙོ་བསྟན་འཛིན་བཟང་པོ་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་གྲུབ་མཚམས་གཞུང་ཚབ་མཆོག་ཀུལླུ་དཔལ་རབ་གླིང་བོད་མིའི་གཞིས་ཆགས་སུ་འཚམས་གཟིགས་གནང་ཡོད་པ་བཅས། །