༄༅། །ཕྱི་ལོ་ ༢༠༢༡ ཟླ་ ༩ ཚེས་ ༢༥ ནས་ ༢༨ བར་ཉིན་གྲངས་བཞིའི་རིང་ཨིན་ཡུལ་གྱི་ངལ་རྩོལ་ཆབ་སྲིད་ཚོགས་པའི་ (Labour Party) ལོ་འཁོར་ཚོགས་ཆེན་ཚོགས་ཡོད་པ་དང་། ཨིན་ཡུལ་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་དང་། དྲུང་ཆེ་ཚེ་རིང་མཚོ་མོ་ལགས། དེ་བཞིན་ཨིན་ཡུལ་ནང་གི་མཐོ་སློབ་ཁག་ཏུ་འགྲིམ་བཞིན་པའི་བོད་པའི་སློབ་ཕྲུག་བསྟན་འཛིན་རབ་དགའ་ལགས་དང་། མི་ཕམ་བསམ་གཏན་ལགས། བློ་བཟང་ཕུན་ཚོགས་ལགས་བཅས་ཚོགས་ཆེན་ཐོག་མཉམ་ཞུགས་གནང་ཡོད།

དེ་ཡང་ཨིན་ཡུལ་གྱི་ངལ་རྩོལ་ཆབ་སྲིད་ཚོགས་པའི་ཚོགས་ཆེན་ལ་མཉམ་ཞུགས་གནང་དགོས་དོན་གཙོ་བོ་ནི། ཨིན་ཡུལ་སྐུ་ཚབ་དོན་ཁང་གི་ངོས་ནས་གོ་སྐབས་དམ་འཛིན་གྱིས་ཨིན་ཡུལ་གྱི་ཆབ་སྲིད་ཚོགས་པ་ཁག་གི་དབུ་ཁྲིད་རྣམ་པར་འབྲེལ་བ་དམ་ཟབ་འཛུགས་རྒྱུ་དང་བོད་དོན་ཞུ་གཏུག་གི་ལས་འགུལ་ཤུགས་ཆེ་སྤེལ་རྒྱུ་དེ་ཡིན་ཞིང་། ཨིན་ཡུལ་སྐུ་ཚབ་དོན་ཁང་གིས་ཨིན་ཡུལ་ངལ་རྩོལ་ཆབ་སྲིད་ཚོགས་པའི་ཚོགས་ཆེན་དང་བསྟུན་ཉིན་གྲངས་བཞིའི་རིང་བོད་དོན་སྐོར་གྱི་འགྲེམས་སྟོན་གནང་ཡོད། སྐབས་དེར་ཨིན་ཡུལ་ངལ་རྩོལ་ཆབ་སྲིད་ཚོགས་པའི་གྲོས་ཚོགས་འཐུས་མི་ལྕམ་སྐུ་ཀེ་རི་མེ་ཁར་ཐི་ (Kerry McCarthy) ལགས་དང་ཨིན་ཡུལ་ངལ་རྩོལ་ཆབ་སྲིད་ཚོགས་པའི་གྲོས་ཚོགས་འཐུས་མི་སྐུ་ཞབས་ན་ཝན་ཌུ་མི་ཤིས་ར་ (Navendu Mishra) ལགས་རྣམ་གཉིས་བོད་དོན་སྐོར་གྱི་འགྲེམས་སྟོན་ལ་གཟིགས་སྐོར་དུ་ཕེབས་ཡོད་པ་མ་ཟད། ཨིན་ཡུལ་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་དང་ཐུག་འཕྲད་ཀྱིས་བོད་དོན་དང་བོད་མིར་མུ་མཐུད་རྒྱབ་སྐྱོར་གནང་རྒྱུའི་ཞལ་བཞེས་གནང་ཡོད།ཚོགས་བཅར་བ་རྣམ་པས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་གནམ་གཤིས་འགྱུར་ལྡོག་ལ་ཐུགས་འཚབ་གནང་གི་ཡོད་པའི་སྐོར་གསུངས་ཡོད། དེ་བཞིན་གཞུང་འབྲེལ་མིན་པའི་ཚོགས་པ་དང་ཚོང་ལས་ཚོགས་པ་ཁག་གིས་གོ་སྒྲིག་གནང་བའི་ཚོགས་འདུ་ཁག་ལའང་ཨིན་ཡུལ་སྐུ་ཚབ་དོན་ཁང་གི་སྐུ་ཚབ་མཉམ་ཞུགས་གནང་ཡོད། ཨིན་ཡུལ་སྐུ་ཚབ་དོན་ཁང་གི་དྲུང་ཆེ་ཚེ་རིང་མཚོ་མོ་ལགས་ཀྱིས་ཨིན་ཡུལ་གྲོས་ཚོགས་འཐུས་མི་སྐུ་ཞབས་སི་ཊེ་ཧྥེན་ཀིན་ནོག་ (Stephen Kinnock) ལགས་ལ་རྒྱ་ནག་གཞུང་ལ་བོད་ནང་གི་འགྲོ་བ་མིའི་ཐོབ་ཐང་དང་བོད་མཐོ་སྒང་གི་ཁོར་ཡུག་གི་གནས་སྟངས་ཇེ་སྡུག་ཇེ་ཞན་དུ་འགྲོ་བཞིན་པའི་སྐོར་གླེང་སློང་གནང་དགོས་པའི་འབོད་སྐུལ་ཞུས་ཡོད། སྐབས་དེར་ཁོང་གིས་བོད་དོན་སླད་རྒྱབ་སྐྱོར་ཤུགས་ཆེ་གནང་རྒྱུ་ཡིན་པ་མ་ཟད། ཨིན་ཡུལ་གཞུང་གིས་བོད་རང་སྐྱོང་ལྗོངས་དམར་ཤོག་ཚོགས་པའི་དྲུང་ཆེ་ཟུར་པ་ཁྲིན་ཆོན་གོ་ (Chen Quanguo) ལ་དམ་བསྒྲགས་བཀའ་ཆད་གཅད་རྒྱུའི་ཐོ་གཞུང་ནང་དགོད་རྒྱུར་རྒྱབ་སྐྱོར་ཤུགས་ཆེ་གནང་རྒྱུ་ཡིན། ཞེས་གསུངས།ཨིན་ཡུན་སྐུ་ཚབ་དོན་ཁང་དང་། ཨིན་ཡུལ་ནང་མཐོ་སློབ་ཁག་ཏུ་འགྲིམ་བཞིན་པའི་བོད་པའི་སློབ་ཕྲུག་བསྟན་འཛིན་རབ་དགའ་ལགས་དང་། མི་ཕམ་བསམ་གཏན་ལགས། བློ་བཟང་ཕུན་ཚོགས་ལགས་བཅས་ཐེངས་འདིའི་ཚོགས་འདུར་མཉམ་ཞུགས་ཀྱིས་ཐུན་མོང་གིས་བོད་དོན་སྐོར་གྱི་དཔེ་དེབ་དང་འགྲེམས་ཤོག་འགྲེམས་སྤེལ་གནང་ཡོད། ཨིན་ཡུལ་སྐུ་ཚབ་དོན་ཁང་གི་ངོས་ནས་མ་འོངས་པར་བོད་པའི་གཞོན་སྐྱེས་གང་མང་འདི་ལྟ་བུའི་ལས་འགུལ་ནང་མཉམ་ཞུགས་གནང་དགོས་པའི་རེ་སྐུལ་གནང་ཡོད། ཨིན་ཡུལ་སྐུ་ཚབ་དོན་ཁང་གིས་ཉིན་གྲངས་བཞིའི་རིང་བོད་དོན་དང་འབྲེལ་བའི་འགྲེམས་སྟོན་དང་། ཞུ་གཏུག འབྲེལ་ལམ་གསར་འཛུགས་སོགས་ཀྱི་ལས་འགུལ་ཚགས་ཚུད་ངང་སྤེལ་ཡོད་པ་བཅས།།