༄༅། །ཕྱི་ལོ་ ༢༠༢༡ ཟླ་ ༩ ཚེས་ ༤ ཉིན་གྱི་དགོང་དྲོར་བོད་མིའི་སྒྲིག་འཛུགས་ཀྱི་དབུས་ཏོག་དབྱིབས་གཉན་རིམས་ཛ་དྲག་ལས་དོན་ཚོགས་ཆུང་གི་ཚོགས་གཙོ་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས་དང་ཚོགས་མི་བདེ་ལེགས་སྨན་ཁང་གི་འགན་འཛིན་ཟླ་བ་ཕུན་སྐྱིད་ལགས་མན་སྤར་ཕན་བདེ་གླིང་བོད་མིའི་གཞིས་ཆགས་སུ་ཕེབས་འབྱོར་སྐབས་ས་གནས་འགོ་འཛིན་བསྟན་འཛིན་ཟླ་སྒྲོན་ལགས་ཀྱིས་ཕབས་བསུའི་སྣེ་ལེན་གཟབ་རྒྱས་ཞུས་ཡོད།
དེ་ཡང་ཕྱི་ཚེས་ ༥ ཉིན་མན་སྤར་ཕན་བདེ་གླིང་བོད་མིའི་གཞིས་ཆགས་ཀྱི་ས་གནས་འགོ་འཛིན་བསྟན་འཛིན་ཟླ་སྒྲོན་ལགས་ཀྱིས་དབུས་ཏོག་དབྱིབས་གཉན་རིམས་ཛ་དྲག་ལས་དོན་ཚོགས་ཆུང་གི་སྐུ་ཚབ་རྣམས་ལ་ཏོག་དབྱིབས་གཉན་རིམས་ཀྱི་དུས་སྐབས་སུ་ས་གནས་ཏོག་དབྱིབས་གཉན་རིམས་ཛ་དྲག་ལས་དོན་ཚོགས་ཆུང་གི་ངོས་ནས་ཇི་ལྟར་གདོང་ལེན་གནང་བ་དང་། ད་ལྟའི་གནས་སྟངས་སྐོར་སྙན་སེང་ཞུས་གྲུབ་མཚམས་དབུས་ཏོག་དབྱིབས་གཉན་རིམས་ཛ་དྲག་ལས་དོན་ཚོགས་ཆུང་གི་སྐུ་ཚབ་རྣམ་པ་གཉིས་ས་གནས་ཀྱི་འགོག་དབྱེ་ཟུར་འཇོག་ཁང་དང་ས་གནས་འཕྲོད་བསྟེན་སྨན་ཁང་དུ་གཟིགས་ཞིབ་ཏུ་ཕེབས་ཡོད།
སྐབས་དེར་ཁོང་རྣམ་གཉིས་ནས་འཕྲོད་ལས་པ་དང་ལྷན་དུ་ཏོག་དབྱིབས་གཉན་རིམས་དང་འབྲེལ་བའི་སྔོན་འགོག་སྨན་ཁབ་སྐོར་དང་། གཞན་ཡང་ཏོག་དབྱིབས་གཉན་རིམས་ཀྱི་ཛ་དྲག་དུས་སྐབས་སུ་སྨན་ཁང་གི་ངོས་ནས་ཇི་ལྟར་སྟངས་འཛིན་བྱེད་ཕྱོགས་ཐད་གོ་བསྡུར་གནང་ཡོད་པ་མ་ཟད། ཡན་ལག་སྨན་རྩིས་ཁང་དུ་ཆེད་ཕེབས་ཀྱིས་རྟོག་ཞིབ་གནང་རྗེས་ཉིན་རྒྱབ་མན་སྤར་ཕན་བདེ་གླིང་བོད་མིའི་གཞིས་ཆགས་ཀྱི་ས་གནས་ཏོག་དབྱིབས་གཉན་རིམས་ཛ་དྲག་ལས་དོན་ཚོགས་ཆུང་གི་ཚོགས་མི་དང་ལྷན་ཐུག་འཕྲད་གནང་སྟེ་ཏོག་དབྱིབས་གཉན་རིམས་ཀྱི་དུས་སྐབས་སུ་ས་གནས་ཏོག་དབྱིབས་གཉན་རིམས་ཛ་དྲག་ལས་དོན་ཚོགས་ཆུང་གི་ཚོགས་མི་རྣམ་པས་ཧུར་བརྩོན་གནང་བར་ཡི་རང་བསྔགས་བརྗོད་ཀྱང་གནང་ཡོད།
ཕྱི་ཉིན་དབུས་ཏོག་དབྱིབས་གཉན་རིམས་ཛ་དྲག་ལས་དོན་ཚོགས་ཆུང་གི་ཚོགས་གཙོ་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས་ཀྱིས་ས་གནས་འཕྲོད་བསྟེན་སྨན་ཁང་གི་ལས་ཤག་གསར་པ་དབུ་འབྱེད་གནང་བ་དང་འབྲེལ། མན་སྤར་སཾ་བྷོ་ཊའི་སློབ་གྲྭར་འཚམས་གཟིགས་དང་སློབ་ཕྲུག་རྣམས་དང་ཐུག་འཕྲད་གནང་ཡོད་པ་མ་ཟད་སློབ་གྲྭའི་སློབ་སྤྱི་དང་ལས་བྱེད་རྣམ་པ་དང་ལྷན་ཏོག་དབྱིབས་གཉན་རིམས་ཀྱི་ནད་རླབས་གསུམ་པ་སྔོན་འགོག་དང་འབྲེལ་བའི་གྲ་སྒྲིག་གནང་ཕྱོགས་སོགས་ཀྱི་སྐོར་གོ་བསྡུར་ལྷུག་པོ་གནང་ཡོད་པ་བཅས། །
