ཀུ་ལླུ་མ་ནཱ་ལི་བོད་མིའི་གཞིས་ཆགས་སུ་བོད་ལྗོངས་མང་གཙོའི་ལམ་བཟང་དབུས་བརྙེས་ནས་མི་ལོ་ཧྲིལ་པོ་ ༦༡ འཁོར་བའི་དུས་ཆེན་སྲུང་རྩིས་ཞུས་པ།

གསར་ལས་ཁང་གི་གསར་འགོད་པས།

༢༠༢༡-༠༩-༠༣

༄༅། །འདི་གར་ཀུལླུ་མ་ནཱ་ལི་བོད་མིའི་ས་གནས་འགོ་འཛིན་ལས་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༢༡ ཟླ་ ༩ ཚེས་ ༢ ཉིན་ཀུ་ལླུ་མ་ནཱ་ལི་བོད་མིའི་གཞིས་ཆགས་སུ་བོད་ལྗོངས་མང་གཙོའི་ལམ་བཟང་དབུས་བརྙེས་ནས་མི་ལོ་ཧྲིལ་པོ་ ༦༡ འཁོར་བའི་དུས་ཆེན་སྲུང་རྩིས་ཞུས་ཡོད།

དེ་ཡང་ཐོག་མར་མཛད་གཙོ་རྣམ་པས་༸རྒྱལ་བའི་སྐུ་དཔར་མཐོང་གྲོལ་རིན་པོ་ཆེར་དཀར་གཙང་མཇལ་དར་སྒྲོན་འབུལ་ཞུས་རྗེས་འཕགས་བོད་གཉིས་ཀྱི་རྒྱལ་གླུ་དང་མང་གཙོ་གསར་བཞད་ཕུལ་བའི་ཐོག་སྐར་མ་གཅིག་རིང་བོད་མིའི་རང་དབང་ཐབས་རྩོད་སླད་ལུས་སྲོག་དོར་བའི་རྒྱལ་གཅེས་པ་རྣམས་ཀྱི་རྗེས་དྲན་སླད་མྱ་ངན་གུས་འདུད་ཞུས་གྲུབ་མཚམས་རྟེན་འབྱུང་གསོལ་ཇ་དང་འབྲས་སིལ་ཕུལ་ཡོད།

མཛད་སྒོར་སྐུ་མགྲོན་གཙོ་བོ་འཕགས་བོད་འབྲེལ་མཐུད་ཚོགས་པའི་སློབ་སྟོན་པ་དང་སྤྱི་འཐུས་ཚོགས་གཞོན་ཟུར་པ་ཨ་ཅཱརྱ་ཡེ་ཤེས་ཕུན་ཚོགས་མཆོག་དང་། སྐུ་མགྲོན་གཞན་ས་གནས་ཧིན་བོད་མཛའ་འབྲེལ་ཚོགས་པའི་ཚོགས་གཙོ་འཆི་མེད་སྒྲོལ་མ་ལགས། རྡོ་སྦི་ས་གནས་ཀྱི་འགོ་དཔོན་པུཤ་པཱ་དེ་ཝི་ (Pradhan Pushpa Devi) ལགས་བཅས་མགྲོན་འབོད་གནང་ཡོད། དེ་བཞིན་ས་གནས་ལས་ཀྱི་སྣེ་མོ་བ་ཡོངས་དང་མི་མང་ཚང་འཛོམས་ཀྱིས་མཛད་སྒོ་སྲུང་རྩིས་ཞུས་ཡོད།

དུས་ཆེན་དང་འབྲེལ་སྐུ་མགྲོན་རྣམ་པས་གསུང་བཤད་དང་། ས་གནས་འགོ་འཛིན་གྱིས་དཔལ་ལྡན་བཀའ་ཤག་གི་གསུང་བཤད་སྒྲོགས་སྦྱང་གནང་ཡོད་པ་མ་ཟད། མ་ན་ལི་སཾ་བྷོ་ཊ་ཉིན་སློབ་ཀྱི་སློབ་མ་རྣམས་ནས་གཞས་སྣ་ཁག་གཅིག་གཟིགས་འབུལ་ཞུས་ཡོད།

མཐར་ས་གནས་རང་བདེན་ཚོགས་ཆུང་གི་ཚོགས་གཞོན་གྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་གྲོལ་ཡོད་པ་བཅས། །

གསར་གནས།