༄༅། །ཨུ་རུ་སུའི་ཨོ་རན་བྷག་མཐོ་སློབ་(Orenburg State Medical University) ཏུ་ཕྱི་ལུགས་གསོ་རིག་ (MBBS, MD) ཐོག་ལོ་རིམ་མཐའ་མའི་སློབ་སྦྱོང་གནང་བཞིན་པ་བསྟན་འཛིན་འཕྲིན་ལས་ལགས་ཀྱིས་ཨུ་རུ་སུ་དང་ཡུ་རོབ་ཁུལ་གྱི་རི་བོ་མཐོ་ཤོས་ཨིལ་བྷི་ར་སིའི་ (Mount Elbrus) སྟེང་འཛེགས་ནས་བོད་ཀྱི་རྒྱལ་དར་སྒྲེང་འཛུགས་གནང་ཡོད། རི་བོ་ཨིལ་བྷི་ར་སི་ནི་ཨུ་རུ་སུ་དང་ཡུ་རོབ་ཁུལ་གྱི་རི་བོ་མཐོ་ཤོས་དེ་ཡིན་ཞིང་། ས་བབ་མཐོ་ཚད་རྒྱ་མཚོའི་ངོས་ནས་མི་ཊར་ ༥༦༤༢ ཙམ་ཡོད།

དེ་ཡང་བསྟན་འཛིན་འཕྲིན་ལས་ལགས་ཀྱིས་རི་བོ་ཨིལ་བྷི་ར་སིའི་སྟེང་འཛེགས་པའི་སྐོར་གསུང་དོན། རང་ཉིད་ཕྱི་ལོ་ ༢༠༢༡ ཟླ་ ༨ ཚེས་ ༣ ཉིན་རི་བོ་ཨིལ་བྷི་ར་སིའི་སྟེང་འབྱོར་བྱུང་། རི་རྩེར་སླེབས་པར་བདུན་ཕྲག་གཅིག་ཙམ་བགོར་སོང་། ངས་བོད་ཀྱི་རྒྱལ་དར་སྒྲེང་འཛུགས་ཞུ་རྒྱུའི་ཀུན་སློང་ཞིག་ཡིད་ལ་བཅངས་ནས་རི་བོ་ཨིལ་བྷི་ར་སིའི་སྟེང་འཛེགས་པ་ཡིན། བོད་ཀྱི་རྒྱལ་དར་སྒྲེང་འཛུགས་ཞུས་པ་དེས་བོད་མི་ས་ཡ་དྲུག་མཚོན་གྱི་ཡོད། ཅེས་གསུངས།ཨུ་རུ་སུ་ནང་བཞུགས་པའི་རིང་བསྟན་འཛིན་འཕྲིན་ལས་ལགས་ཀྱིས་ས་གནས་ཡུལ་མི་གྲོགས་པོ་གང་མང་བསྒྲིགས་ཏེ་བོད་ཀྱི་དངོས་ཡོད་གནས་སྟངས་སྐོར་འགྲེལ་བརྗོད་གནང་ཡོད་པ་མ་ཟད། ཨུ་རུ་སུ་དང་ཡུ་རོབ་ཁུལ་གྱི་རི་བོ་མཐོ་ཤོས་ཨིལ་བྷི་ར་སིའི་སྟེང་བོད་ཀྱི་རྒྱལ་དར་སྒྲེང་འཛུགས་གནང་སྟེ་བོད་མིའི་འཐབ་རྩོད་དྲང་བདེན་དང་། འགྲོ་བ་མིའི་ཐོབ་ཐང་། བོད་ཀྱི་ཐུན་མོང་མ་ཡིན་པའི་རིག་གཞུང་སོགས་མཚོན་ཐབས་གནང་ཡོད་པ་བཅས།།