༄༅། །ད་བར་བོད་བསྟན་སྲིད་ཀྱི་དོན་དུ་གཅེས་པའི་ལུས་སྲོག་ལོངས་སྤྱོད་དང་བཅས་པ་བློས་བཏང་གནང་མཁན་བོད་ཀྱི་རྒྱལ་གཅེས་པ་རྣམས་ལ་ཆེ་བསྟོད་དང་གུས་འདུད་ཞུ་སླད་ཕྱི་ལོ་ ༢༠༢༡ ཟླ་ ༨ ཚེས་ ༢༨ ཉིན་སུད་སི་དང་ལེག་ཊེན་སི་ཊེན་བོད་རིགས་སྤྱི་མཐུན་ཚོགས་པའི་གོ་སྒྲིག་འོག་བོད་མི་ ༨༠ ལྷག་གིས་བོད་བསྟན་སྲིད་ཀྱི་དོན་དུ་རང་ལུས་མེར་སྲེག་གཏོང་མཁན་རྒྱལ་གཅེས་པ་རྣམས་ཀྱི་སྐུ་པར་ལྡན་པའི་སྟོད་ཐུང་གྱོན་ཏེ་སུད་སིའི་གྲོང་ཁྱེར་ཛུ་རིག་ནས་རྐང་འཁོར་བཞོན་ཏེ་རྒྱ་ནག་གི་གཞུང་ཚབ་ཁང་བར་འབྱུང་འགྱུར་རྒྱ་ནག་ནང་འཚོགས་གཏན་འཁེལ་བའི་ཕྱི་ལོ་ ༢༠༢༢ ལོའི་དགུན་དུས་ཨོ་རྩེད་འགྲན་ཚོགས་ལ་ཞི་བའི་ངོ་རྒོལ་གནང་ཡོད།དེ་ཡང་རྒྱལ་སྤྱིའི་ཨོ་ལེམ་ཕིག་རྩེད་འགྲན་ཚོགས་ཆུང་ (International Olympic Committee) གིས། ཕྱི་ལོ་ ༢༠༠༨ ལོའི་པེ་ཅིང་ཨོ་རྩེད་འགྲན་ཚོགས་སྐབས་ནས་བཟུང་རྒྱ་ནག་དམར་ཤོག་གཞུང་གིས་རྒྱལ་སྤྱིའི་ཨོ་ལེམ་ཕིག་རྩེད་འགྲན་ཚོགས་ཆུང་གི་བཅའ་ཁྲིམས་སྣང་མེད་དུ་བཞག་ནས་བོད་ཚུད་པའི་རྒྱ་ནག་གི་ས་ཁུལ་གཞན་ཁག་གི་ནང་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་བཏང་ཡོད་པའི་སྐོར་གསར་འགོད་གསལ་བསྒྲགས་སྤེལ་ཡོད།སུད་སིའི་བོད་མི་ཚོས་རྐང་འཁོར་བཞོན་ནས་རྒྱ་ནག་གི་གཞུང་ཚབ་ཁང་བར་ཕྱི་ལོ་ ༢༠༢༢ ལོའི་དགུན་དུས་ཨོ་རྩེད་འགྲན་ཚོགས་ལ་ཞི་བའི་ངོ་རྒོལ་གནང་བ་དེ་ནི་སུད་སི་དང་ལེག་ཊེན་སི་ཊེན་བོད་རིགས་སྤྱི་མཐུན་ཚོགས་པའི་ཟླ་རེའི་ལས་འགུལ་གྱི་ཆ་ཤས་ཤིག་ཡིན། ཐེངས་འདིའི་རྐང་འཁོར་ལས་འགུལ་ནང་སུད་སི་དང་ལེག་ཊེན་སི་ཊེན་བོད་རིགས་སྤྱི་མཐུན་ཚོགས་པ་དང་། སུད་བོད་མཛའ་འབྲེལ་ཚོགས་པ། ཡུ་རོབ་བོད་ཀྱི་གཞོན་ནུ་མཐུན་ཚོགས། སུད་སིའི་ས་གནས་བུད་མེད་ཚོགས་པ། དེ་བཞིན་སུད་སིའི་ས་གནས་བོད་མི་སོགས་མཉམ་ཞུགས་ཀྱིས་སུད་སིའི་ས་གནས་སུ་བོད་དོན་སྐོར་གོ་རྟོགས་རྒྱ་ཆེ་སྤེལ་ཡོད་པ་བཅས།།