༄༅། །ལ་སྤྱི་ལས་ཁུངས་ཀྱིས་རེ་སྐུལ་ཞུས་པ་ལྟར་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ (Ladakh Autonomous Hill Development Council) ནས་ཞི་བ་ཚལ་ཕོ་བྲང་དུ་ཡོད་པའི་དགེ་འཕེལ་གླིང་ཕོ་བྲང་ཉམས་གསོ་ཞུ་རྒྱུའི་ཐག་གཅོད་གནང་འདུག

དེ་ཡང་ལ་དྭགས་སླེ་རུ་རྟེན་གཞི་བྱས་པའི་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱི་སྡེ་དཔོན་སྐུ་ཞབས་བཀྲ་ཤིས་རྒྱལ་སོན་ལགས་ཕྱི་ལོ་ ༢༠༢༡ ཟླ་ ༨ ཚེས་ ༦ ཉིན་དགེ་འཕེལ་གླིང་ཕོ་བྲང་དུ་ཆེད་ཕེབས་ཀྱིས་རྟོག་ཞིབ་གནང་རྗེས་དགེ་འཕེལ་གླིང་ཕོ་བྲང་ཉམས་གསོ་དང་འབྲེལ་བའི་ལས་གཞིའི་སྐོར་གྲོས་བསྡུར་ལྷུག་པོ་གནང་ཡོད།ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱི་སྡེ་དཔོན་སྐུ་ཞབས་བཀྲ་ཤིས་རྒྱལ་སོན་ལགས་དང་ལྷན་དུ་ལ་དྭགས་སླེ་འཛུགས་སྐྲུན་འཆར་འགོད་སྡེ་ཚན་གྱི་འགན་འཛིན་སྐུ་ཞབས་ནི་སཱར་ཨེ་མ་ཌི་ (Nisar Ahmed) ལགས་དང་། ལ་སྤྱི་ཚེ་བརྟན་དབང་ཕྱུག་ལགས། དགེ་འཕེལ་གླིང་ཕོ་བྲང་གི་དཀོན་གཉེར་བསྟན་འཛིན་བཟོད་པ་ལགས་བཅས་ལྷན་བཅར་གནང་ཡོད།

སྤྱི་ནོར་༧གོང་ས༧སྐྱབས་མགོན་ཆེན་པོ་མཆོག་དགུང་ལོ་མཐོན་པོར་ཕེབས་ཡོད་སྟབས། ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགེ་འཕེལ་གླིང་ཕོ་བྲང་དུ་བཞུགས་པའི་རིང་ལ་མགོན་པོ་གང་ཉིད་མཆོག་སྟབས་བདེ་ཡོང་སླད་དགེ་འཕེལ་གླིང་ཕོ་བྲང་གི་ར་བའི་ནང་གློག་སྐས་ (Elevator) གསར་སྐྲུན་དང་། དེ་བཞིན་ལམ་ཁ་ཉམས་གསོ་ཡིས་མཚོན་པའི་མཐུན་རྐྱེན་གང་ལེགས་བསྐྲུན་རྒྱུའི་ཐག་གཅོད་གནང་ཡོད།གཞན་ཡང་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱི་སྡེ་དཔོན་སྐུ་ཞབས་བཀྲ་ཤིས་རྒྱལ་སོན་ལགས་ཀྱིས་གནས་ཆུང་སྐུ་རྟེན་ཐུབ་བསྟན་དངོས་གྲུབ་མཆོག་དང་མཇལ་འཕྲད་ཞུས་གནང་ཡོད། གནས་ཆུང་སྐུ་རྟེན་ཐུབ་བསྟན་དངོས་གྲུབ་མཆོག་ད་ལྟ་ལ་དྭགས་ཁུལ་དུ་ཕེབས་ཡོད་པ་དང་དགེ་འཕེལ་གླིང་ཕོ་བྲང་དུ་བཞུགས་མུས་ཡིན།
ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱི་སྡེ་དཔོན་སྐུ་ཞབས་བཀྲ་ཤིས་རྒྱལ་སོན་ལགས་ཀྱིས་དགེ་འཕེལ་གླིང་ཕོ་བྲང་ཉམས་གསོ་ཞུ་རྒྱུའི་ཞལ་བཞེས་གནང་བར་དགེ་འཕེལ་གླིང་ཕོ་བྲང་གི་དཀོན་གཉེར་བསྟན་འཛིན་བཟོད་པ་ལགས་ཀྱིས་ཐུགས་རྗེ་ཞུས་གནང་ཡོད་པ་བཅས།།