༄༅། །ཕྱི་ལོ་ ༢༠༢༡ ཟླ་ ༨ ཚེས་ ༡༦ ཉིན་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་ནས་དྲ་ལམ་བརྒྱུད་ཏོག་དབྱིབས་གཉན་རིམས་ཀྱི་ནད་རླབས་གསུམ་པ་དང་འབྲེལ་བའི་སྔོན་འགོག་དང་གྲ་སྒྲིག་གནང་ཕྱོགས་སྐོར་ཚོགས་འདུ་གོ་སྒྲིག་གནང་ཡོད།
ཚོགས་འདུའི་སྟེང་བཙན་བྱོལ་བོད་མིའི་གཞིས་ཆགས་ཁག་གི་ས་གནས་འགོ་འཛིན་གྲངས་ ༤༥ དང་། དེ་བཞིན་ས་གནས་འཕྲོད་བསྟེན་སྨན་ཁང་གི་འཛིན་སྐྱོང་འགན་འཛིན་དང་། སྨན་པ། ལས་བྱེད། སྨན་ཞབས་པ་བཅས་མཉམ་ཞུགས་གནང་ཡོད་པ་དང་། ཚོགས་འདུའི་དགོས་དམིགས་གཙོ་བོ་ནི། འཕྲོད་ལས་པ་རྣམས་ལ་ནད་རླབས་གསུམ་པ་སྔོན་འགོག་དང་གྲ་སྒྲིག་གནང་ཕྱོགས་སྐོར་ཡིན།
བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་དྲུང་ཆེ་དཔལ་ལྡན་དོན་གྲུབ་ལགས་ཀྱིས་ཚོགས་འདུ་དབུ་འབྱེད་མཛད་སྒོའི་ཐོག་ནད་རླབས་གསུམ་པ་སླེབས་པ་ཡིན་ན་གྲ་སྒྲིག་གནང་ཕྱོགས་དང་། ཏོག་དབྱིབས་གཉན་རིམས་ཀྱི་ངོ་བོ་འགྱུར་བཞིན་ཡོད་སྟབས། བྱིས་པ་རྣམས་ལ་འགོ་རྒྱུའི་ཉེན་ཁ་འཕྲད་སྲིད་པ་ཁྱད་མཁས་པས་གསུངས་ཡོད་པའི་སྐོར་གསུངས། གཞན་ཡང་ཁོང་གིས་སྨན་པ་བསོད་ནམས་སྟོབས་རྒྱལ་ལགས་ཀྱིས་ནད་རླབས་གསུམ་པའི་གནད་དོན་སྐོར་གོ་རྟོགས་སྤེལ་བར་ཐུགས་རྗེ་ཞུས་གནང་ཡོད།
སྨན་པ་བསོད་ནམས་སྟོབས་རྒྱལ་ལགས་ཀྱིས་རྒྱ་གར་ནང་ཡོད་པའི་བྱིས་པ་རྣམས་ལ་ཏོག་དབྱིབས་གཉན་རིམས་ཀྱི་ནད་རླབས་གསུམ་པ་འགོས་པ་ཡིན་ན་བརྟག་དཔྱད་དང་། དམིགས་བསལ་སྨན་བཅོས། ནད་རྟགས་ངོས་འཛིན་སོགས་ཀྱི་སྐོར་གོ་རྟོགས་སྤེལ་ཡོད། དུས་ཡུན་ཆུ་ཚོད་གཅིག་རིང་གི་ཚོགས་འདུའི་ཐོག་འཕྲོད་ལས་པ་དང་སྨན་ཞབས་པ་རྣམས་མཉམ་ཞུགས་ཀྱིས་དྲི་བ་དྲིས་ལན་ལྷུག་པོ་གནང་ཡོད་པ་བཅས།།
