༄༅། །ཕྱི་ལོ་ ༢༠༢༡ ཟླ་ ༨ ཚེས་ ༡༩  རེས་གཟའ་ཕུར་བུ་ཉིན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཏོག་དབྱིབས་གཉན་རིམས་ལས་དོན་ཚོགས་ཆུང་གིས་གསར་འགོད་གསལ་བསྒྲགས་ཐེངས་ ༧༣ དེ་སྤེལ་ཡོད་པ་དང་། གསལ་བསྒྲགས་གནང་མཁན་འཕྲོད་བསྟེན་ལས་ཁུངས་ཀྱི་དྲུང་འཕར་བྱམས་པ་ཕུན་ཚོགས་ལགས་དང་། སྨན་པ་ཚེ་རིང་མཚམས་གཅོད་ལགས། སྨན་པ་ཨོ་རྒྱན་རྒྱ་མཚོ་ལགས་བཅས་ཡིན། 

དེ་ཡང་འཕྲོད་བསྟེན་ལས་ཁུངས་ཀྱི་དྲུང་འཕར་བྱམས་པ་ཕུན་ཚོགས་ལགས་ཀྱིས་གསུང་དོན། ཏོག་དབྱིབས་གཉན་རིམས་ཀྱི་ནད་ཡམས་ཐོག་སྔ་ལོ་ནས་བཟུང་འཛམ་གླིང་ཁྱོན་ཡོངས་ལ་དཀའ་ངལ་མང་དག་ཅིག་འཕྲད་བཞིན་པ་དང་། དེའི་དབང་གིས་འདིར་གནས་ཡུལ་རྒྱལ་ཁབ་རྒྱ་གར་དང་། དེ་བཞིན་བལ་ཡུལ་ནང་དཀའ་ངལ་གཅིག་མཚུངས་འཕྲད་ཡོད་པ་རེད། དེའི་ཁོངས་ནས་བཙན་བྱོལ་བོད་མིའི་གཞིས་ཆགས་ཁག་དང་ཁ་ཐོར་གནས་པའི་རང་རིགས་བོད་མི་མང་དག་ལ་དཀའ་ངལ་འཕྲད་དང་འཕྲད་མུས་ཡིན།  ཉེ་ཆར་ཏོག་དབྱིབས་གཉན་རིམས་ཀྱི་ནད་རླབས་གཉིས་པ་བྱུང་རྗེས་ཕྲན་བུ་བཟང་དུ་ཕྱིན་པའི་ཚོར་སྣང་དང་ཉམས་མྱོང་བྱུང་ཡོད། འོན་ཀྱང་ད་ལྟ་བདུན་ཕྲག་གཅིག་གཉིས་ཀྱི་གནས་སྐབས་ལ་བཙན་བྱོལ་བོད་མིའི་གཞིས་ཆགས་ཁ་ཤས་ནང་ཏོག་དབྱིབས་གཉན་རིམས་ཀྱི་ནད་པའི་གྲངས་འབོར་ཇེ་མང་དུ་འགྲོ་བཞིན་ཡོད་སྟབས། ས་གནས་གང་དུ་གནས་ཡོད་ཀྱང་སོ་སོ་རང་ཉིད་ཀྱི་འཕྲོད་བསྟེན་དང་ནང་མི། བོད་མི་རིགས་ལ་དགོངས་པ་བཞེས་ཏེ་ཐུགས་སྣང་གནང་རོགས། ཞེས་ཞུ་རྒྱུ་ཡིན།

གོང་དུ་ཞུས་པ་བཞིན་བོད་མིའི་གཞིས་ཆགས་ཁག་གཅིག་གི་ནང་ནད་པའི་གྲངས་འབོར་མང་དུ་འགྲོ་བཞིན་པའི་ཐད་མང་ཚོགས་ནས་སྔོན་འགོག་གི་ཐབས་ལམ་ཁག་མུ་མཐུད་བསྟེན་དགོས་པ་མ་ཟད།  ཏོག་དབྱིབས་གཉན་རིམས་ཀྱི་སྔོན་ཁབ་རིམ་པ་དང་པོ་བརྒྱབ་ཟིན་པ་གང་ཞིག་ལ་སྔོན་ཁབ་གཉིས་པ་བརྒྱག་རྒྱུའི་ཐད་ལྷོད་གཡེང་དུ་མ་སོང་བར་སྔོན་ཁབ་ངེས་པར་དུ་བརྒྱབ་དགོས། ནད་ཡམས་དེར་བཅོས་ཐབས་ཡག་ཤོས་ནི་སྔོན་ཁབ་དེ་ཡིན་སྟབས་ཚང་མས་སྔོན་ཁབ་བཞེས་དགོས་རྒྱུ་ཧ་ཅང་གལ་ཆེན་པོ་རེད།  བོད་མིའི་སྒིག་འཛུགས་འཕྲོད་བསྟེན་ལས་ཁུངས་ནས་རྒྱ་གར་གཞུང་ལ་རེ་འདུན་ཞུས་པ་བཞིན་བཙན་བྱོལ་བོད་མིར་མཐུན་འགྱུར་ཧ་ཅང་ཡག་པོ་གནང་ཡོད། སྔོན་ཁབ་གཉིས་པའི་ཐོག་ལ་སྔར་ལྟར་སྐུ་ངལ་མ་འཕྲད་པའི་ཐོག་ནས་མཐུན་འགྱུར་གནང་སྐྱོང་ཡོང་བའི་རེ་འདུན་ཞུས་པ་ལྟར། རྒྱ་གར་གཞུང་གིས་མངའ་སྡེ་ཁག་སོ་སོར་ལམ་སྟོན་གནང་བའི་ནང་བོད་མི་རྣམས་ལའང་ཡུལ་མི་དང་གཅིག་མཚུངས་ལྟར་སྔོན་འགོག་སྨན་ཁབ་མུ་མཐུད་གནང་དགོས་པའི་བཀའ་གནང་ཡོད།  སྔོན་ཁབ་གཉིས་ཀར་བརྒྱབ་ཟིན་ཡང་རེ་གཉིས་ལ་ཏོག་དབྱིབས་གཉན་རིམས་ཕོག་མཁན་ཡང་ཡོང་གི་འདུག  དེར་བརྟེན་སྔོན་འགོག་གནང་སྒོ་ཁག་ལག་བསྟར་གནང་དགོས།  ཞེས་གསུངས།དེ་ནས་ལས་དོན་ཚོགས་ཆུང་གི་གསར་འགོད་འབྲེལ་མཐུད་པ་སྨན་པ་ཚེ་རིང་མཚམས་གཅོད་ལགས་ཀྱིས་འདས་པའི་བདུན་ཕྲག་གཅིག་ནང་ཚོགས་ཆུང་གི་སྙན་ཐོའི་སྐོར་གསུང་དོན། འདས་པའི་བདུན་ཕྲག་ནང་རྒྱ་གར་ནང་གི་བཙན་བྱོལ་བོད་མིའི་གཞིས་ཆགས་ཁག་གྲངས་ ༡༤ དང་། བལ་ཡུལ་ནང་གི་བཙན་བྱོལ་བོད་མིའི་གཞིས་ཆགས་ཁག་གྲངས་ ༥ བཅས་ཁྱོན་བཙན་བྱོལ་བོད་མིའི་གཞིས་ཆགས་ཁག་གྲངས་ ༡༩ ནང་གི་བོད་མི་རང་ཁྱིམ་དུ་མི་གྲངས་ ༧༦༢ དང་། ཚོགས་སྡེ་ཁག་གི་མཐུན་འགྱུར་འོག་འགོག་དབྱེ་ཟུར་འཇོག་ཁང་དུ་བཞུགས་མཁན་མི་གྲངས་ ༣༥༨ བཅས་ཁྱོན་བསྡོམས་བོད་མི་གྲངས་ ༡༡༢༠ འགོག་དབྱེ་ཟུར་བཀག་ཐོག་བཞུགས་ཡོད།

ད་བར་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་དང་དབུས་བོད་ཀྱི་སྨན་རྩིས་ཁང་ནས་གསོ་རིག་ལུས་སེམས་ནུས་གསོའི་སྨན་ཁྱོན་བསྡོམས་མི་གྲངས་ ༤༣༤༧༣ ལ་རིན་མེད་བགོ་འགྲེམས་གནང་ཡོད། སེམས་ཁམས་འཕྲོད་བསྟེན་དང་འབྲེལ་འདས་པའི་བདུན་ཕྲག་འདིའི་ནང་མི་གྲངས་ ༦༢ ལ་སེམས་ཁམས་འཕྲོད་བསྟེན་དང་འབྲེལ་བའི་ལམ་སྟོན་སློབ་གསོ་གནང་ཐུབ་པ་བྱུང་ཡོད།  ནད་ཡམས་ཁྱབ་བརྡལ་སྔོན་འགོག་སླད་བདུན་ཕྲག་འདིའི་ནང་རྒྱ་གར་ནང་གི་ས་གནས་གྲངས་ ༡༥ དང་བལ་ཡུལ་ནང་གི་ས་གནས་ ༣ བཅས་ཀྱི་བོད་མི་གྲངས་ ༧༦༩ ལ་ནད་གཞི་ཕོག་ཡོད་མེད་བརྟག་དཔྱད་གནང་ཐུབ་པ་བྱུང་ཡོད།

དེ་བཞིན་སྔོན་འགོག་སྨན་ཁབ་རྒྱག་སྒོ་ཚུགས་པ་ནས་བཟུང་ད་བར་རྒྱ་གར་ནང་གི་བོད་མི་འོས་ཆོས་ལྡན་པ་གྲངས་ ༢༡༠༩༩ ལ་སྔོན་འགོག་སྨན་ཁབ་རིམ་པ་དང་པོ་དང་གཉིས་པ་གཉིས་ཀར་བརྒྱབ་ཟིན་པ་དང་། མི་གྲངས་ ༢༨༧༡༠ ལ་སྔོན་འགོག་སྨན་ཁབ་རིམ་པ་དང་པོ་བརྒྱབ་ཟིན། ཕྱོགས་མཚུངས་བལ་ཡུལ་ནང་གི་བོད་མི་གྲངས་ ༦༨༣ ལ་སྔོན་འགོག་སྨན་ཁབ་རིམ་པ་དང་པོ་བརྒྱབ་ཟིན་པ་དང་མི་གྲངས་ ༣༠༢༤ ལ་སྔོན་འགོག་སྨན་ཁབ་ཆ་ཚང་ཐོབ་ཡོད།

ཕྱོགས་མཚུངས་དབུས་དང་ས་གནས་ཛ་དྲག་ཚོགས་ཆུང་གི་བདུན་རེའི་ཚོགས་འདུ་འཚོགས་རྒྱུ་ཁག་མུ་མཐུད་འགྲོ་བཞིན་ཡོད་པ་མ་ཟད། ད་ལྟའི་ཆར་དབུས་ཛ་དྲག་ལས་དོན་ཚོགས་ཆུང་གི་ཚོགས་མི་རྣམས་ས་གནས་ས་ཐོག་ཏུ་ཕྱོགས་བསྐྱོད་ཀྱིས་གཟིགས་རྟོག་དང་ལམ་སྟོན་གནང་རྒྱུ་རིགས་འགོ་བཙུགས་ཟིན། གལ་ཏེ་ས་གནས་སུ་ཏོག་དབྱིབས་གཉན་རིམས་ལ་གདེང་ལེན་སླད་མཐུན་འགྱུར་ཞུ་དགོས་པ་དང་། དེ་བཞིན་དཀའ་ངལ་རིགས་ཡོད་ན་ཛ་དྲག་ཚོགས་ཆུང་གི་ཚོགས་མི་ས་གནས་སུ་ཕེབས་སྐབས་ཞུ་དགོས།

འདས་པའི་བདུན་ཕྲག་གཅིག་གི་ནང་རྒྱ་གར་དང་བལ་ཡུལ་ནང་ནད་གཞི་ཕོག་པ་ར་འཕྲོད་བྱུང་བ་མི་གྲངས་ ༥༥ བྱུང་ཡོད་པ་ལས་སྐྱེས་པ་གྲངས་ ༣༧ དང་། བུད་མེད་གྲངས་ ༡༨ དེའི་ནང་ནས་དགུང་ན་མཐོ་ཤོས་དེ་ ༩༣ དང་ཆུང་ཤོས་དེ་བྱིས་པ་ལོ་ ༧  ཡིན། བློ་ཕམ་པའི་གནས་ཚུལ་ཞིག་ལ་བདུན་ཕྲག་འདིའི་ནང་ཏོག་དབྱིབས་གཉན་རིམས་ཀྱིས་རྐྱེན་པས་མི་གྲངས་ ༢ འདས་གྲོངས་སུ་གྱུར་ཡོད།  ད་བར་རྒྱ་གར་དང་བལ་ཡུལ་ནང་གི་བོད་མིར་ནད་གཞི་ཕོག་པ་ཁྱོན་མི་གྲངས་ ༦༡༣༥ དང་། དྲག་སྐྱེད་བྱུང་བ་མི་གྲངས་ ༥༧༦༥། འདས་གྲོངས་སུ་གྱུར་བ་མི་གྲངས་ ༡༤༦། ད་ལྟ་ནད་མནར་གསོ་བཅོས་བྱེད་བཞིན་པ་མི་གྲངས་ ༢༤ ཡོད།

མི་མང་ལ་ཐུགས་སྣང་ལམ་སྟོན་ཞུ་རྒྱུར།  ད་ལྟའི་ཆར་རྒྱ་གར་གྱི་མངའ་སྡེ་ཁག་ཁ་ཤས་ནང་ནད་རླབས་གཉིས་པ་མཇུག་སྒྲིལ་ཏེ་གནས་སྟངས་བཟང་དུ་ཕྱིན་ཡོད། རྒྱ་གར་གྱི་མངའ་སྡེ་ཨུཏྟར་པྲདེཤ་དང་། ཏ་མིལ་ནཱ་ཌཱུ། ཏེ་ལངྒཱ་ནཱ།  ཀརནཱ་ཊཀ་ལྟ་བུར་མཚོན་ན་མངའ་སྡེ་གཞུང་ནས་སློབ་གྲྭ་ཁག་རིམ་བཞིན་སྒོ་ཕྱེ་རྒྱུའི་གསལ་བསྒྲགས་སྤེལ་བཞིན་འདུག་སྟབས། མངའ་སྡེ་དེ་དག་ཏུ་ཡོད་པའི་བོད་པའི་སློབ་གྲྭ་ཁག་ཤེས་རིག་ལས་ཁུངས་ཀྱི་ལམ་སྟོན་འོག་སྒོ་ཕྱེ་དགོས་པ་དེ་འདྲ་ཆགས་ངེས་རེད། དེར་བརྟེན་ཚང་མས་དབུས་དང་ས་གནས་སོ་སོའི་ལམ་སྟོན་གཞིར་བཟུང་ཐུགས་སྣང་གནང་དགོས་རྒྱུ་ཧ་ཅང་གལ་ཆེན་པོ་རེད། ཅེས་ཞུ་རྒྱུ་ཡིན། 

རྒྱ་གར་ནང་ནད་རླབས་གསུམ་པ་ཞིག་ཕྱི་ཟླ་ ༨་་༩་་༡༠  ནང་ཡོང་གི་ཡོད་པའི་ཚོད་དཔག་བྱེད་བཞིན་ཡོད་པར་བརྟེན་དོ་བདག་སོ་སོའི་ངོས་ནས་འགན་བཞེས་ཏེ་སྔོན་འགོག་གི་ཐབས་ལམ་ཁག་མུ་མཐུད་ཕྱག་བསྟར་གནང་བ་ཡིན་ན་ནད་རླབས་གསུམ་དེ་སླེབ་ཀྱི་མ་རེད། འཛིན་སྐྱོང་དང་ཆེད་ལས་པས་ནད་རླབས་གསུམ་པར་གདོང་ལེན་བྱེད་རྒྱུར་གྲ་སྒྲིག་ཨང་གསར་ཡོད་ནའང་དོ་བདག་སོ་སོའི་ངོས་ནས་འགན་མ་བཞེས་པ་ཡིན་ན་སྒེར་དང་སྤྱི་ཚོགས་ནང་ནད་ཡམས་ཁྱབ་བརྡལ་འགྲོ་བའི་ཉེན་ཁ་ཆེན་པོ་ཡོད་སྟབས་ཚང་མས་འགན་བཞེས་རོགས་ཞེས་ཞུ་རྒྱུ་ཡིན། ཞེས་སོགས་གསུངས། མཐར་ཕྱི་ལུགས་སྨན་པ་ཨོ་རྒྱན་རྒྱ་མཚོ་ལགས་ཀྱིས་ལམ་སྟོན་གནང་དོན། ད་བར་འཛམ་གླིང་ཁྱོན་ཡོངས་སུ་ནད་པ་ས་ཡ་ཉིས་བརྒྱ་ལྷག་ཙམ་བྱུང་ཡོད་པའི་ཁོངས་ནས་མང་ཆེ་བ་ཨ་རི་ནས་ཡིན་འདུག ཨ་རིའི་ནང་ནད་པ་ས་ཡ་སུམ་ཅུ་སོ་བདུན་ལྷག་ཙམ་དང་། རྒྱ་གར་ནང་ས་ཡ་སུམ་ཅུ་སོ་གཉིས་ལྷག་ཙམ་ཆགས་ཀྱི་འདུག རྒྱ་གར་ནང་འདས་པའི་ཆུ་ཚོད་ ༢༤ ནང་རྒྱ་གར་གྱི་ས་ཁུལ་ཀེ་ར་ལ་དང་མ་ཧཱ་རཱཤཊྲ། ཨཱནདྷྲ་པྲདེཤ། ཀརནཱ་ཊ་ཀ་ནང་ནད་པའི་གྲངས་འབོར་ཇེ་མང་འགྲོ་བཞིན་འདུག ཏོག་དབྱིབས་གཉན་རིམས་ཀྱི་སྔོན་འགོག་ཐབས་ལམ་ཁག་ལག་བསྟར་འཐུས་ཚང་གནང་དགོས། གལ་ཏེ་ཕྱི་ལ་ངེས་པར་དུ་འགྲོ་དགོས་མེད་ཚེ་འགྲོ་མི་དགོས་པར་གཙོ་འདོན་གནང་གལ་དང་། འདུ་འཛོམས་རིགས་གང་ཉུང་ཉུང་གནང་ཐུབ་ན་ཧ་ཅང་ཡག་པོ་འདུག ཏོག་དབྱིབས་གཉན་རིམས་དང་འབྲེལ་བའི་སྤྱི་ཚོགས་དྲ་རྒྱ་ལ་སོགས་ཀྱི་ནང་དཀྲོག་གཏམ་རིགས་ལ་ཡིད་མ་ཆེས་པར་སོ་སོའི་ཉེ་འཁོར་དུ་ཡོད་པའི་འབྲེལ་ཡོད་འཕྲོད་བསྟེན་མི་སྣའི་དྲུང་ནས་ལམ་སྟོན་ཞུ་དགོས་པ་དང་། ཛ་དྲག་ནད་ཡམས་ཀྱི་སྐབས་འདིར་སེམས་ཁམས་ཀྱི་ཐོག་ལ་དཀའ་ངལ་ཡོད་མཁན་རྣམས་ཀྱིས་ཁུལ་དང་ས་གནས་ས་ོསའི་འབྲེལ་ཡོད་འཕྲོད་བསྟེན་ལས་བྱེད་ལ་ཁ་སང་ཏེ་འབྲེལ་བ་གནང་དགོས།

ཉེ་ཆར་བདེ་ལེགས་སྨན་ཁང་གིས་སྔོན་འགོག་སྨན་ཁབ་བརྒྱག་རྒྱུའི་ལས་གཞི་འགོ་འཛུགས་གནང་བ་ལྟར་ད་ལྟའང་མུ་མཐུད་འགྲོ་བཞིན་ཡོད། རེས་གཟའ་ལྷག་པ་ལ་སྔོན་ཁབ་དང་པོ་རྒྱག་བཞིན་ཡོད་པ་དང་། རེས་གཟའ་པ་སངས་ལ་སྔོན་ཁབ་རིམ་པ་གཉིས་པ་དེ་རྒྱག་གི་ཡོད། གཞན་ཡང་ཏོག་དབྱིབས་གཉན་རིམས་ཡོད་མེད་བརྟག་དཔྱད་ (RTPCR) དེ་ཡང་རེས་གཟའ་མིག་དམར་དང་པ་སངས་ནམ་ཡིན་ལ་བྱེད་ཀྱི་ཡོད། ཅེས་སོགས་ཀྱི་ལམ་སྟོན་གནང་སྟེ་ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ ༧༣ དེ་མཇུག་སྒྲིལ་གནང་ཡོད། །