༄༅། །མི་ཚེ་ཧྲིལ་པོར་བོད་དོན་ཐོག་རྒྱབ་སྐྱོར་ཤུགས་ཆེ་གནང་མཁན་དང་། རྒྱ་གར་ལྷོ་ཕྱོགས་སུ་ཡོད་པའི་སེ་ར་བྱེས་དགོན་པའི་སློབ་གྲྭར་མཐུན་འགྱུར་གནང་མཁན་སུད་སི་བོད་དོན་རྒྱབ་སྐྱོར་བ་ལྕམ་སྐུ་ཨ་མ་ཨསི་ཌེཌ་མར་ཀི་ (Astrid Marquis) ལགས་ཕྱི་ལོ་ ༢༠༢༡ ཟླ་ ༨ ཚེས་ ༡ ཉིན་དགུང་ལོ་ ༧༨ ཐོག་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་ཐོན་པར། སུད་སི་སྐུ་ཚབ་དོན་ཁང་གིས་ཐུགས་གསོ་གནང་ཡོད། 

དེ་ཡང་ཟླ་འདིའི་ཕྱི་ཚེས་ ༩ རེས་གཟའ་ཟླ་བའི་ཉིན་སུད་སི་སྐུ་ཚབ་དོན་ཁང་གི་ལས་བྱེད་བསོད་ནམས་མཐར་ཕྱིན་ལགས་དང་། སུད་བོད་མཛའ་འབྲེལ་ཚོགས་པའི་ཚོགས་གཙོ་ཐོ་མ་སི་ (Thomas Büchli) ལགས། བོད་དོན་རྒྱབ་སྐྱོར་བ། དེ་བཞིན་སུད་སི་གྲོང་ཁྱེར་ཇི་ནི་ཝ་དང་ལུ་སེན་ (Lausanne) ཁུལ་གྱི་བོད་རིགས་ཚོགས་པའི་ཚོགས་མི་བཅས་ནས་དམ་པ་དེ་ཉིད་ཀྱི་སྐུ་ཕུང་ཞུགས་འབུལ་དུ་བཅར་ཡོད།སྐབས་དེར་སུད་སི་སྐུ་ཚབ་དོན་གཅོད་འཆི་མེད་རིག་འཛིན་ལགས་ཀྱིེས་ཁོང་གི་ནང་མིར་ཐུགས་གསོའི་འཕྲིན་ཡིག་སྐུར་བའི་ནང་། བོད་མིའི་སྒྲིག་འཛུགས་དང་སུད་སི་སྐུ་ཚབ་དོན་ཁང་གི་ཚབ་ཞུས་ཏེ་དམ་པ་ཁོང་གི་ནང་མི་རྣམས་ལ་ཐུགས་གསོ་གནང་བ་དང་འབྲེལ། ལྕམ་སྐུ་ཨ་མ་ཨསི་ཌེཌ་མར་ཀི་ལགས་ཀྱིས་གཡོ་བ་མེད་པའི་ཐོག་ད་བར་བོད་ཀྱི་བདེན་པའི་འཐབ་རྩོད་ཆེད་རྒྱབ་སྐྱོར་གནང་བ་དེ་བོད་མི་ཚོས་ཡིད་ལ་བཅངས་ངེས་ཡིན། ཞེས་འཁོད་ཡོད་པ་བཅས། །