༄༅། །རྡ་སར་རྟེན་གཞི་བྱས་པའི་བོད་ཀྱི་ཟློས་གར་ཚོགས་པས་ཨ་རུ་ཎཱ་ཅལ་མངའ་སྡེའི་མོན་རྟ་དབང་གི་རིག་གཞུང་འཁྲབ་སྟོན་བསྟི་གནས་ཀྱི་སློབ་ཕྲུག་གྲངས་དགུ་ལ་ཟླ་བ་གསུམ་རིང་གླུ་གར་དང་རོལ་མོ་སོགས་ཀྱི་ཟབ་སྦྱོང་འགོ་འཛུགས་གནང་ཡོད།
དེ་ཡང་ཕྱི་ལོ་ ༢༠༢༡ ཟླ་ ༨ ཚེས་ ༤ ཉིན་བོད་ཀྱི་ཟློས་གར་ཚོགས་པའི་ཚོགས་ཁང་དུ་བོད་ཀྱི་ཟློས་གར་ཚོགས་པའི་འགན་འཛིན་ལས་ཚབ་བསོད་ནམས་ཆོས་འཕེལ་ལགས་དང་འབྲེལ་ཡོད་ལས་བྱེད། ཨ་རུ་ཎཱ་ཅལ་མངའ་སྡེའི་མོན་རྟ་དབང་གི་སློབ་ཕྲུག་བཅས་ཚང་འཛོམས་ཀྱིས་གླུ་གར་དང་རོལ་མོ་སོགས་ཀྱི་ཟབ་སྦྱོང་ལས་རིམ་འགོ་འཛུགས་ཀྱིས་དབུ་འབྱེད་མཛད་སྒོ་ཞིག་ཚོགས་གནང་ཡོད།
སྐབས་དེར་བོད་ཀྱི་ཟློས་གར་ཚོགས་པའི་འགན་འཛིན་ལས་ཚབ་བསོད་ནམས་ཆོས་འཕེལ་ལགས་ཀྱིས་ཨ་རུ་ཎཱ་ཅལ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་པདྨ་མཁའ་འགྲོ་མཆོག་དང་ཨ་རུ་ཎཱ་ཅལ་མངའ་སྡེའི་ཆོས་རིག་ལྷན་ཚོགས་ཀྱི་དབུ་འཛིན་འཇམ་དཔལ་དབང་འདུས་མཆོག་རྣམ་གཉིས་ཀྱིས་སྔར་ཡོད་མོན་གྱི་སྲོལ་རྒྱུན་རིག་གཞུང་རྣམས་མི་ཉམས་གོང་སྤེལ་སླད་འབད་བརྩོན་དང་སྦྲགས་རྒྱུན་འཁྱོངས་གནང་ཐུབ་པར་འཚམས་འདྲི་ཞུས་པ་དང་། ཕྱོགས་མཚུངས་ཨ་རུ་ཎཱ་ཅལ་མངའ་སྡེའི་མོན་རྟ་དབང་གི་རིག་གཞུང་འཁྲབ་སྟོན་བསྟི་གནས་ཀྱི་སློབ་ཕྲུག་དགུ་ལའང་འཚམས་འདྲི་དང་འབྲེལ་གོ་སྐབས་དེ་དག་གཙོ་ཆེར་བཟུང་དགོས་སྐོར་སོགས་གསུངས།
ཐེངས་འདིའི་ལས་རིམ་ཐོག་གླུ་གཞས་གཏོང་སྟངས་དང་། ཟློས་གར་འཁྲབ་སྟོན། གཞས་རྩོམ་བྲིས། རོལ་ཆ་དཀྲོལ་ལེན་སོགས་སུ་དམིགས་བསལ་ཤུགས་སྣོན་བརྒྱག་རྒྱུ་ཡིན་འདུག 
སྤྱིར་ཨ་རུ་ཎཱ་ཅལ་མངའ་སྡེའི་མོན་རྟ་དབང་གི་རིག་གཞུང་འཁྲབ་སྟོན་བསྟི་གནས་ཁང་འདི་བཞིན་ཨ་རུ་ཎཱ་ཅལ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་པདྨ་མཁའ་འགྲོ་མཆོག་གི་ལམ་སྟོན་དང་། ཨ་རུ་ཎཱ་ཅལ་མངའ་སྡེའི་ཆོས་རིག་ལྷན་ཚོགས་ཀྱི་དབུ་འཛིན་འཇམ་དཔལ་དབང་འདུས་མཆོག་གིས་འབད་བརྩོན་བརྒྱུད་ཕྱི་ལོ་ ༢༠༢༡ ཟླ་ ༢ ཚེས་ ༡༩ ཉིན་ཚོགས་པ་ཐོག་མར་དབུ་བརྙེས་པ་ཞིག་ཡིན། དེ་སྔོན་ཕྱི་ལོ་ ༢༠༡༨ ལོར་ཨ་རུ་ཎཱ་ཅལ་མངའ་སྡེའི་མོན་རྟ་དབང་གི་སློབ་ཕྲུག་ ༡༠ ལ་བོད་ཀྱི་ཟློས་གར་ཚོགས་པར་གླུ་གར་དང་རོལ་མོ་སོགས་ཀྱི་ཟབ་སྦྱོང་གནང་ཡོད་པ་བཅས། །
