དབུས་ཏོག་དབྱིབས་གཉན་རིམས་ཛ་དྲག་ཚོགས་ཆུང་གི་ཚོགས་མི་ཀུལླུ་མ་ནཱ་ལི་ཁུལ་དུ་ཡོད་པའི་བཙན་བྱོལ་བོད་མིའི་གཞིས་ཆགས་ཁག་ཏུ་ཆེད་ཕེབས་གནང་བ།

གསར་ལས་ཁང་གི་གསར་འགོད་པས།

༢༠༢༡-༠༨-༣༡

༄༅། །འདི་གར་ཀུལླུ་མ་ནཱ་ལི་བོད་མིའི་ས་གནས་འགོ་འཛིན་ལས་ཁང་ནས་བཏང་གནས་ནང་འཁོད་དོན། བོད་མིའི་སྒྲིག་འཛུགས་ཀྱི་དབུས་ཏོག་དབྱིབས་གཉན་རིམས་ཛ་དྲག་ཚོགས་ཆུང་གི་ཚོགས་མི་ཤེས་རིག་དྲུང་ཆེ་འཇིགས་མེད་རྣམ་རྒྱལ་ལགས། བོད་ཀྱི་སྨན་རྩིས་ཁང་གི་དབུ་འཛིན་ཚེ་རིང་བཀྲ་ཤིས་ལགས་དང་སྨན་པ་རིག་འཛིན་བཟང་མོ་ལགས། འཕྲོད་བསྟེན་ལས་བྱེད་བསྟན་འཛིན་དབང་གྲགས་ལགས་བཅས་ཏོག་དབྱིབས་གཉན་རིམས་ ༡༩ ཡི་ནད་རླབས་གསུམ་པར་གྲ་སྒྲིག་དང༌། ད་ལྟའི་གནས་སྟངས་ལ་རྟོག་ཞིབ་སླད་ཕྱི་ལོ་ ༢༠༢༡ ཟླ་ ༠༨ ཚེས་ ༢༨ ཉིན་ཀུ་ལླུ་ཛོང་ཁུངས་ནང་ཡོད་པའི་་སཾ་བྷོ་ཊ་དང་བོད་ཁྱིམ་སློབ་གྲྭ། འོན་མངའ་རིས་གྲྭ་ཚང༌། དེ་བཞིན་ཡན་ལག་སྨན་རྩིས་ཁང༌། ས་གནས་འཕྲོད་བསྟེན་སྨན་ཁང་བཞི། གཞིས་ཆགས་ཁག་དྲུག་བཅས་སུ་འཚམས་གཟིགས་དང༌། དེ་རྗེས་ས་གནས་ཏོག་དབྱིབས་གཉན་རིམས་ཛ་དྲག་ཚོགས་ཆུང་གི་ཚོགས་མི་རྣམས་ལ་ལམ་སྟོན་གསུང་བཤད་ཟབ་རྒྱས་ཕེབས་ཡོད།

གཞན་ཡང་ས་གནས་ཛ་དྲག་ཚོགས་ཆུང་ནས་ཡོངས་ཁྱབ་རིམས་ནད་དང་འབྲེལ་བའི་དཀའ་ངལ་བྱུང་བ་རྣམས་ཞུས་པ་དང་། དེ་སེལ་སླད་ས་གནས་སུ་དགོས་མཁོ་རྣམས་དབུས་ནས་གཟིགས་ཞིབ་གནང་དགོས་ཞུས་པ་བཅས་ཀྱི་ས་གནས་སུ་གཞུང་འབྲེལ་འཚམས་གཟིགས་ལེགས་གྲུབ་བྱུང་ཡོད་པ་བཅས། །