༄༅།།དབུས་བོད་མིའི་སྒྲིག་འཛུགས་ནས་ཏོག་དབྱིབས་གཉན་རིམས་ ༡༩ ནད་རླབས་གསུམ་པའི་གྲ་སྒྲིག་ཆེད་ས་གནས་ཁག་ལ་ལམ་སྟོན་དང་དགོས་གལ་ཅ་དངོས་རྣམས་ཀྱི་མཐུན་འགྱུར་ཞུས་དང་ཞུ་མུས་ཐོག་དཔལ་ལྡན་སྲིད་སྐྱོང་མཆོག་དང་ཏོག་དབྱིབས་གཉན་རིམས་ཛ་དྲག་ལས་དོན་ཚོགས་ཆུང་གི་ལམ་སྟོན་པ་ཕྱི་ལུགས་སྨན་པ་སྐུའི་བླ་སྨན་པ་ཚེ་བརྟན་རྡོ་རྗེ་ལགས་དང་། གསོ་བ་རིག་པའི་སྨན་པ་ཚེ་དབང་རྟ་མགྲིན་ལགས་བཅས་ནས་དབུས་ཏོག་དབྱིབས་གཉན་རིམས་ཛ་དྲག་ལས་དོན་ཚོགས་ཆུང་གི་ཚོགས་མི་རྣམས་ས་གནས་ས་ཐོག་ཏུ་རྟོག་ཞིབ་སླད་གཞུང་འབྲེལ་ཕྱོགས་བསྐྱོད་གནང་དགོས་པའི་ལམ་སྟོན་ཕེབས་པ་བཞིན་ཚོགས་མི་རྣམས་ལ་ས་བགོས་ཞུས་པ་ལྟར་ཤེས་རིག་ལས་ཁུངས་ཀྱི་དྲུང་ཆེ་འཇིགས་མེད་རྣམ་རྒྱལ་ལགས་དང་སྨན་རྩིས་ཁང་གི་དབུ་འཛིན་ཚེ་རིང་བཀྲིས་ལགས། སྨན་པ་རིག་འཛིན་བཟང་མོ་ལགས། འཕྲོད་བསྟེན་ལས་ཁུངས་ཀྱི་ལས་བྱེད་བསྟན་འཛིན་དབང་གྲགས་ལགས་བཅས་ཧི་མ་ཅཱལ་ཁུལ་དུ་ཡོད་པའི་བཙན་བྱོལ་བོད་མིའི་གཞིས་ཁག་དང་དགོན་སྡེ་ཁག
དེ་བཞིན་སློབ་གྲྭ་ཁག་བཅས་ལ་ཏོག་དབྱིབས་ནད་རླབས་གསུམ་པའི་གྲ་སྒྲིག་ཇི་ཞུས་ཀྱི་རྟོག་ཞིབ་ཆེད་ཕྱི་ལོ་ ༢༠༢༡ ཟླ་ ༨ ཚེས་ ༢༦ ནས་གཞུང་འབྲེལ་ཕྱོགས་བསྐྱོད་ཀྱིས་ཁ་ཉིན་ཚེས་ ༢༦ ཉིན་གོ་པལ་པུར་བོད་ཁྱིམ་དང་། བཀྲ་ཤིས་ལྗོངས། སུ་ཇ་བོད་ཁྱིམ། སྦིར་བོད་ཚོགས། སྦིར་ས་གནས་འཕྲོད་བསྟེན་སྨན་ཁང་། དེ་བཞིན་སྦིར་སཾ་བྷོ་ཊ་བཅས་ཀྱི་ཛ་དྲག་ལས་དོན་ཚོགས་ཆུང་གི་ཚོགས་མི་རྣམས་དང་ཐུགས་འཕྲད་ཀྱིས་བཀའ་ཤག་གི་ཏོག་དབྱིབས་གཉན་རིམས་ཀྱི་སྔོན་ཁབ་མཐུན་འགྱུར་གནང་ཕྱོགས་ཀྱི་སྲིད་བྱུས་སོགས་ཀྱི་ཐོག་གོ་བསྡུར་ཞུས་པ་མ་ཟད། ནད་རླབས་གསུམ་པའི་གྲ་སྒྲིག་ཆེད་འགོག་དབྱེ་ཟུར་འཇོག་ཁང་དང་། ནད་གཞི་ཕོག་པ་རྣམས་ཟུར་བཀག་བཞུགས་ཡུལ། དེ་བཞིན་ཛ་དྲག་གནས་སྟངས་བྱུང་ཚེ་ཉེ་འཁོར་རྒྱ་གར་གཞུང་གི་སྨན་ཁང་མཉམ་འབྲེལ་ལམ་ཡོད་མེད་དང་། སྔོན་ཁབ་ཀྱི་གནས་སྟངས་སོགས་རྟོག་ཞིབ་ཞུས་ཡོད་པ་དང་། ད་རིང་ཚེས་ ༢༧ ཉིན་སྦིར་བོད་ཚོགས་སུ་ཡོད་པའི་ལྷག་འཕྲོས་དགོན་པ་དང་སྦིར་སྡེ་དགེ་ཁུལ། དེ་བཞིན་ཅོན་ཏ་ར་བཅས་ལ་རྟོག་ཞིབ་གནང་གཏན་འཁེལ་ཡོད་པ་བཅས་ཀྱི་མཛད་འཆར་དུ། ཏོག་དབྱིབས་ལས་དོན་ཚོགས་ཆུང་ནས་ཕུལ།།
