༄༅། །ཕྱི་ལོ་ ༢༠༢༡ ཟླ་ ༨ ཚེས་ ༡༣ རེས་གཟའ་པ་སངས་ཉིན་བཞུགས་སྒར་རྡ་ས་ཉེ་འགྲམ་དུ་རྟེན་གཞི་བྱས་པའི་རིགས་ལམ་སློབ་གཉེར་ཁང་གི་ཡན་ལག་ས་རཱ་བོད་ཀྱི་མཐོ་རིམ་སློབ་གཉེར་ཁང་དབུ་བརྙེས་ནས་ལོ་ངོ་ ༢༣ འཁོར་བའི་རྟེན་འབྲེལ་སྲུང་བརྩི་དགའ་སྟོན་དང་བསྟུན། སློབ་དུས་གསར་པ་དབུ་འཛུགས་ཀྱི་མཛད་སྒོར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་སྐུ་མགྲོན་གཙོ་བོར་གདན་ཞུས་ལྟར་ཆེད་ཕེབས་གནང་ཡོད།
དེ་ཡང་གོང་ཚེས་ཉིན་སྔ་དྲོ་ཆུ་ཚོད་ ༡༠།༣༠ ཐོག་ས་རཱ་མཐོ་སློབ་ཚོགས་ཁང་དུ་སྐུ་མགྲོན་གཙོ་བོར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་གཙོས། དམིགས་བསལ་སྐུ་མགྲོན་ཤེས་རིག་དྲུང་ཆེ་འཇིགས་མེད་རྣམ་རྒྱལ་ལགས་དང་། བཀའ་དྲུང་ཆུ་སྐྱ་སྦྲ་གཉིས་ཚེ་རྒྱལ་ལགས། རིགས་སློབ་མ་ལག་གཉིས་ཀྱི་དབུ་འཛིན་དགེ་བཤེས་བསམ་གཏན་རྒྱ་མཚོ་ལགས། ས་རཱ་མཐོ་སློབ་ཀྱི་སློབ་སྤྱི་པ་སངས་ཚེ་རིང་ལགས། དེ་བཞིན་ས་རཱ་མཐོ་སློབ་ཀྱི་དགེ་སློབ་ལྷན་འཛོམས་ཀྱི་ཐོག་མར་ས་རཱ་མཐོ་སློབ་ཀྱི་སློབ་སྤྱི་པ་སངས་ཚེ་རིང་ལགས་ཀྱིས་ཏོག་དབྱིབས་གཉན་རིམས་ཀྱི་རྐྱེན་པས་ས་རཱ་མཐོ་རིམ་སློབ་གཉེར་ཁང་དུ་དཔལ་འབྱོར་གྱི་དཀའ་ངལ་འཕྲད་པར་བརྟེན་ས་རཱ་སློབ་ཟུར་ཚང་མས་མ་བསྐུལ་དང་བླངས་ཀྱི་ཐོག་ནས་མཐུན་འགྱུར་ཞལ་འདེབས་ཕོན་ཆེན་པོ་གནང་བ་མ་ཟད། ཉེ་ལམ་ས་རཱ་མཐོ་སློབ་ཏུ་སློབ་མ་དང་འབྲེལ་ཡོད་ལས་བྱེད་མང་དག་ཅིག་ཏོག་དབྱིབས་གཉན་རིམས་ཀྱི་ནད་མནར་བའི་སྐབས་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་དང་བདེ་ལེགས་སྨན་ཁང་། དེ་བཞིན་ཉེ་འཁོར་གྱི་སློབ་ཟུར་སོགས་ནས་གང་ཅིའི་ཐད་མཐུན་འགྱུར་གནང་བར་ས་རཱ་མཐོ་སློབ་ཀྱི་དགེ་ལས་སློབ་ཕྲུག་ཡོངས་ཀྱི་ཚབ་ཞུས་ཏེ་སྙིང་ཐག་པ་ནས་ཐུགས་རྗེ་ཆེ་ཞེས་ཞུ་རྒྱུ་ཡིན། ཞེས་སོགས་གསུངས་ཏེ་སྔ་ལོའི་རྩིས་ཁྲ་སྒྲོགས་སྦྱང་གནང་གྲུབ་མཚམས། རིགས་སློབ་མ་ལག་གཉིས་ཀྱི་དབུ་འཛིན་དགེ་བཤེས་བསམ་གཏན་རྒྱ་མཚོ་ལགས་ཀྱིས་གསུང་བཤད་གནང་། 
དེ་ནས་བོད་མིིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ས་རཱ་མཐོ་སློབ་ཀྱི་ཞབས་ལོ་ ༢༠ འཁོར་བའི་ལས་བྱེད་སློབ་སྤྱི་པ་སངས་ཚེ་རིང་ལགས་དང་། དཔེ་མཛོད་དོ་དམ་པ་ཚེ་དཔག་ལགས་རྣམ་གཉིས་ལ་ཐུབ་དབང་གི་སྐུ་དང་མཇལ་དར། དེ་བཞིན་ཕྱི་ལོ་ ༢༠༢༠་་་༢༠༢༡ སློབ་དུས་ཀྱི་ལོ་རྒྱུགས་རྩེ་ཕུད་སོན་པའི་སློབ་མ་རྣམས་ལ་བྱ་དགའ། སློབ་དུས་གསར་པའི་སྤྱི་པའི་རྒན་བདག་རྣམས་ལ་མཇལ་དར་གནང་ཡོད། 
དེ་རྗེས་དམིགས་བསལ་སྐུ་མགྲོན་ཤེས་རིག་དྲུང་ཆེ་འཇིགས་མེད་རྣམ་རྒྱལ་ལགས་ཀྱིས་ས་རཱ་མཐོ་སློབ་ཀྱི་དགེ་ལས་དང་སློབ་མ་གྲངས་ ༡༠༩ ལ་ཏོག་དབྱིབས་གཉན་རིམས་ཕོག་སྐབས་ཕྱག་ལས་གནང་མཁན་མ་བྱན་རྣམ་པ་དང་། ཁ་ལོ་བ། སྨན་ཞབས་པ། དེ་བཞིན་མ་སྐུལ་དང་བླངས་ཀྱི་ཕྱག་ལས་གནང་མཁན་སློབ་མ་རྣམས་ལ་ཐུགས་རྗེ་ཆེ་ཞུའི་མཇལ་དར་གནང་།
དེ་ནས་སྐུ་མགྲོན་གཙོ་བོ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་གསུང་བཤད་གནང་དོན། དེ་རིང་ས་རཱ་བོད་ཀྱི་མཐོ་རིམ་སློབ་གཉེར་ཁང་དབུ་བརྙེས་ཏེ་ལོ་ངོ་ ༢༣ འཁོར་གྱི་ཡོད། ཕྲན་རང་ཉིད་ལ་མཚོན་ན་ཕྱི་ལོ་ ༡༩༩༣ ལོར་འདིར་བཅར་མྱོང་ཡོད་པ་མ་ཟད། ཞིང་གཤེགས་དབུ་དགེ་དམ་པ་རྒན་བློ་བཟང་རྒྱ་མཚོ་མཆོག་ངོ་ཤེས་ཀྱི་ཡོད། སྐབས་དེ་དུས་དབུ་དགེ་དམ་པ་ཁོང་ཡོད་པ་རེད། ཞིང་གཤེགས་དབུ་དགེ་དམ་པ་རྒན་བློ་བཟང་རྒྱ་མཚོ་མཆོག་གིས་བོད་སྤྱི་པའི་རྩ་དོན་སྤྱི་དང་། ལྷག་པར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་གཞིར་བཟུང་ལས་དོན་སྒྲུབ་མཁན་ཞིག་ཡིན་པར་བརྟེན་སྒྲིག་འཛུགས་འདི་ལྟ་བུ་བཙུགས་ཐུབ་པ་བྱུང་ཡོད། སྒྲིག་འཛུགས་འདིའི་སློབ་མ་ཁྱེད་ཚོ་དང་འདྲ་བའི་སློབ་མ་མང་དག་ཅིག་ལ་ཕན་ཐོགས་ཆེན་པོ་བྱུང་ཡོད།
སློབ་སྤྱི་པ་སངས་ལགས་ཀྱིས་གསུངས་པ་ལྟར་ཐེངས་འདིར་ཏོག་དབྱིབས་གཉན་རིམས་ཀྱིས་རྐྱེན་པས་དཔལ་འབྱོར་གྱི་ཐོག་ནས་དཀའ་ངལ་འཕྲད་ཡོད། སྐབས་དེ་དུས་སློབ་ཟུར་རྣམ་པས་དང་བླངས་ཐོག་འགན་བཞེས་ཏེ་མཐུན་འགྱུར་གནང་བ་འདིས་དེ་སྔ་མཐོ་སློབ་ཀྱི་དགེ་རྒན་དང་འཛིན་སྐྱོང་ངོས་ནས་སློབ་ཕྲུག་རྣམས་ལ་ཤེས་ཡོན་དང་གང་ཅིའི་ཐད་མཐུན་འགྱུར་ཡག་པོ་གནང་བ་ཞིག་མངོན་གྱི་ཡོད། བོད་པའི་སྤྱི་ཚོགས་སམ་སྒྲིག་འཛུགས་གང་འདྲ་ཞིག་ཡར་རྒྱས་ཇི་ལྟར་གཏོང་དགོས་ཐད་གཞན་རྟེན་གྱི་བསམ་བློ་དོར་ཏེ་བོད་མི་ནང་ཁུལ་ཕན་ཚུན་རོགས་པ་བྱེད་རྒྱུ་ཤུགས་ཆེ་རུ་བཏང་བ་ཡིན་ན། ཁ་ཡོད་ལག་ཡོད་ཀྱི་རང་ཁ་རང་གསོ་ཡོང་གི་རེད། རང་ཉིད་ཀྱི་ལས་དོན་རྣམས་གཞན་རྟེན་དུ་མ་བཅོལ་བར་རང་ངོས་ནས་སྒྲུབ་རྒྱུའི་འབད་བརྩོན་བྱེད་དགོས། ད་རེས་མཐོ་སློབ་ཏུ་དངོས་ཡོད་དཀའ་ངལ་འཕྲད་སྐབས་སློབ་ཟུར་ངོས་ནས་ཞལ་འདེབས་བསྡུ་རུབ་བྱས་པ་དེས་གང་སྟོན་གྱི་ཡོད་དམ་ཞེ་ན། སློབ་ཟུར་དེ་དག་རྒྱུ་དག་ཡོད་པའི་རྟགས་ཤིག་སྟོན་གྱི་ཡོད། ཕྱོགས་མཚུངས་གཤམ་དུ་ཡོད་པའི་སློབ་ཕྲུག་རྣམས་ཀྱི་ཆེད་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱིས་གཙོས་གཞན་ཁག་གཅིག་ནས་སློབ་ཡོན་འབུལ་གྱི་ཡོད། སློབ་ཡོན་དེར་རིན་ཐང་ཆེན་པོ་བརྩིས་པའི་ཐོག་སློབ་སྦྱོང་ལ་ཧུར་བརྩོན་གནང་སྟེ་གྲུབ་འབྲས་གཟེངས་སུ་ཐོན་པ་ཞིག་དགོས་ཀྱི་ཡོད། དེ་ལྟར་བྱུང་ན་སློབ་ཡོན་གྱི་དམིགས་ཡུལ་ཚད་ལྡན་ཞིག་སྒྲུབ་ཀྱི་ཡོད། དེ་མིན་ཐོབ་ཐང་གི་ངོ་བོར་རྩི་ན་དངུལ་དེར་རིན་ཐང་མེད།
སློབ་སྦྱོང་སྦྱང་བའི་སྐབས་སོ་སོའི་འཚོ་བའི་དོན་དུ་བྱེད་ཀྱི་ཡོད་པའི་བློ་དེ་དོར་ཏེ་གཞན་ཕན་གྱི་བློ་དང་ལྷན་སེམས་པ་བཟང་པོ་བྱེད་དགོས། ང་ཚོར་བོད་མི་ལ་གཞན་དང་མི་འདྲ་བའི་འགན་འཕར་མ་ཞིག་ཡོད། བོད་ས་རྒྱ་ནག་གིས་བཙན་བཟུང་བྱས་པ་རེད། གཞིས་བཞུགས་བོད་མི་རྣམས་ལ་རང་དབང་གི་ཐོག་ནས་བོད་ཀྱི་ཐུན་མིན་སྐད་ཡིག་དང་ཆོས། རིག་གཞུང་རྣམས་ཉམས་ལེན་བྱེད་འཇུག་གི་མེད་སྟབས། ང་ཚོ་བཙན་བྱོལ་དུ་ཡོད་པ་རྣམས་ཀྱིས་བོད་ཀྱི་ཐུན་མིན་སྐད་ཡིག་དང་ཆོས། རིག་གཞུང་སོགས་མི་ཉམས་རྒྱུན་འཛིན་དང་ཉམས་པ་སླར་གསོ་བྱེད་དགོས་ཀྱི་ཡོད། གཞན་ཡང་ཚེ་འདི་ཕྱི་གཉིས་ཀྱི་མགོན་སྐྱབས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་རྣམས་ཡང་ཡང་ཉན་དགོས་པ་དང་བོད་ཀྱི་ལོ་རྒྱུས་གནས་བབ་རྣམས་ཧ་ཅང་ཡག་པོ་ཤེས་པའི་ཐོག་མ་འོངས་པར་མདུན་བསྐྱོད་ཇི་ལྟར་བྱེད་དགོས་ཐད་བསམ་བློ་གཏོང་དགོས། ང་ཚོའི་སྒྲིག་འཛུགས་དང་བོད་མིའི་ཐུན་མིན་སྐད་ཡིག་དང་ཆོས། རིག་གཞུང་སོགས་ཧྲ་ཐག་ཐག་ཡོད་པ་འདི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་ཉག་གཅིག་ལ་བརྟེན་ནས་བྱུང་བ་ཞིག་ཡིན།
བོད་མིའི་སྒྲིག་འཛུགས་ཀྱི་ལས་འགན་གཙོ་བོ་ནི་བོད་རྒྱའི་དཀའ་རྙོག་གསལ་རྒྱུ་དང་བོད་མིའི་བདེ་དོན་ཐོག་གཟིགས་རྟོག་གནང་རྒྱུ་དེ་རེད། བོད་རྒྱའི་དཀའ་རྙོག་སེལ་ཐབས་ཀྱི་སྲིད་བྱུས་སླད་རྒྱ་ནག་གཞུང་དང་ལྷན་སྐད་ཆ་མ་བཤད་པར་ཡོང་རྒྱུ་མེད། དབུ་མའི་ལམ་གྱི་སྲིད་བྱུས་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་དང་། བོད་མི་མང་སྤྱི་འཐུས་ལྷན་ཚོགས་ནས་གཏན་འབེབས་གནང་བ་ཙམ་མ་ཟད། བོད་མི་མང་ཚོགས་ཀྱི་བསམ་འཆར་ལ་གཞིགས་ཏེ་གཏན་འབེབས་གནང་པ་ཞིག་ཡིན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་རབ་དང་རིམ་པ་སྩལ་བ་ལྟར། བོད་ཀྱི་དཀའ་རྙོག་སེལ་ཐབས་སླད་ཨ་རིས་གཙོས་གཞན་རྒྱལ་ཁབ་རྣམས་ཀྱིས་དམག་རྒྱག་གི་མ་རེད། དེར་བརྟེན་ང་ཚོ་བོད་མི་རང་ངོས་ནས་དེའི་ཐད་བསམ་བློ་གཏོང་དགོས་ཀྱི་ཡོད་པར་བརྟེན་གཉིས་སྨན་དབུ་མའི་ལམ་གྱི་སྲིད་བྱུས་སླེབས་པ་རེད། བཙན་བྱོལ་དུ་ཡོད་པའི་བོད་མི་རྣམས་གཞིས་བཞུགས་བོད་མིའི་སྐུ་ཚབ་མཚོན་གྱི་ཡོད་སྟབས། བོད་ནང་གི་དངོས་ཡོད་གནས་ཚུལ་ལ་དོ་སྣང་བྱས་པའི་ཐོག་ཞིབ་འཇུག་མཐིལ་ཕྱིན་པ་བྱས་ཏེ་གཞན་ལ་བོད་ནང་གི་དངོས་ཡོད་གནས་སྟངས་འགྲེལ་བཤད་བརྒྱབ་དགོས།
དེ་བཞིན་བོད་ཀྱི་ཐུན་མིན་ཆོས་དང་རིག་གཞུང་སོགས་ཉར་ཚགས་བྱེད་དགོས། ད་ཆ་རྒྱ་ནག་གཞུང་གིས་བོད་ནང་དམ་བསྒྲགས་ཤུགས་ཆེ་བྱེད་བཞིན་ཡོད་སྐོར་གྱི་གནས་ཚུལ་མང་དག་ཅིག་གོ་ཐོས་བྱུང་གི་འདུག སྐད་ཡིག་སྦྱང་རྒྱུར་དམ་བསྒྲགས་ཤུགས་ཆེ་བྱེད་བཞིན་ཡོད། ཁྱེད་རྣམ་པར་རང་དབང་ཚད་ལྡན་དང་ནུས་པ་ཆ་ཚང་ཡོད་སྟབས་ཧུར་བཙོན་གནང་དགོས། སཱ་ར་མཐོ་རིམ་སློབ་གཉེར་ཁང་གི་དགེ་ལས་སློབ་ཕྲུག་དང་བཅས་པ་ཐུག་འཕྲད་བྱུང་བར་ཧ་ཅང་དགའ་ཚོར་བྱུང་། ཞེས་གསུངས།
མཐར་ས་རཱ་མཐོ་སློབ་ཀྱི་ལོ་རྒྱུས་གཙུག་ལག་སློབ་དཔོན་བསོད་ནམས་རྒྱལ་མཚན་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་རྒྱལ་ཁའི་ངང་གྲོལ་ཡོད་པ་བཅས།།
