༄༅། །ཕྱི་ལོ་ ༢༠༢༡ ཟླ་ ༨ ཚེས་ ༥ རེས་གཟའ་ཕུར་བུའི་ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་རྡ་ས་བོད་ཀྱི་དཔེ་མཛོད་ཁང་དུ་འཚམས་གཟིགས་ཕེབས་གནང་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩།༡༥ ཙམ་ལ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་བོད་ཀྱི་དཔེ་མཛོད་ཁང་དུ་ཕེབས་བསྟུན་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་དང་དྲུང་ཆེ་ངག་དབང་ཡེ་ཤེས་ལགས་རྣམ་གཉིས་ཀྱིས་ཕེབས་བསུའི་སྣེ་ལེན་གཟབ་རྒྱས་ཞུས། དེ་ནས་དཔལ་ལྡན་སྲིད་སྐྱོང་མཆོག་བོད་ཀྱི་དཔེ་མཛད་ཁང་གི་བོད་ཡིག་དང་ཨིན་ཡིག་དཔེ་དེབ་ཀློག་ཁང་། ཕྱག་དཔེ་གཅེས་ཉར་ཁང་། ཞིབ་འཇུག་ཁང་། ངག་རྒྱུན་ལོ་རྒྱུས་སྡེ་ཚན། འགྲེམས་སྟོན་ཁང་སོགས་ལ་གཟིགས་ཞིབ་ཏུ་ཕེབས་གནང་ཡོད།
དེ་རྗེས་ཚོགས་ཁང་དུ་བོད་ཀྱི་དཔེ་མཛོད་ཁང་གི་དབུ་ལས་ལྷན་འཛོམས་ཐོག་འགན་འཛིན་དགེ་བཤེས་ལྷག་རྡོར་ལགས་ཀྱིས་དཔལ་ལྡན་སྲིད་སྐྱོང་མཆོག་བོད་ཀྱི་དཔེ་མཛོད་ཁང་དུ་འཚམས་གཟིགས་སུ་ཕེབས་གནང་པར་ཐུགས་རྗེ་ཆེ་ཞུས་པ་དང་སྦྲགས། བོད་ཀྱི་དཔེ་མཛོད་ཁང་གི་ངོ་སྤྲོད་སྙིང་བསྡུས་ཤིག་གནང་གྲུབ་མཚམས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་མཆོག་གིས་གསུང་བཤད་གནང་དོན། ངས་སྲིད་སྐྱོང་གི་ལས་འཁུར་ཞུས་ཏེ་ཟླ་བ་གཉིས་ལྷག་འགྲོ་གི་ཡོད། ཟླ་བ་གཉིས་ཀྱི་དུས་ཡུན་ནང་ཐད་ཀར་བོད་མིའི་སྒྲིག་འཛུགས་དང་། ལྷག་པར་འཛིན་སྐྱོང་འོག་ཡོད་པའི་སྡེ་ཚན་ཁག་གི་འབྲེལ་ཡོད་ལས་བྱེད་ཐུག་པ་དང་། མ་འོངས་པར་ལས་དོན་གང་འདྲ་ཞིག་བྱས་པ་ཡིན་ནའང་བཀའ་ཤག་སྐབས་བཅུ་དྲུག་པའི་ཆབ་སྲིད་ཀྱི་ལྟ་བ་ལངས་ཕྱོགས་ག་རེ་ཆགས་ཀྱི་ཡོད་སྐོར། དེ་བཞིན་ལས་འགན་གཉིས་པ་བོད་མིའི་བདེ་དོན་ལྟ་རྒྱུའི་ཐད་སྲིད་བྱུས་དང་ལས་རིམ་གང་འདྲ་བང་སྒྲིག་དགོས་མིན་དེ་ཡིན། འཛིན་སྐྱོང་གསར་པ་རེ་སླེབས་དུས་བསམ་བློ་བཏང་སྟངས་མ་འདྲ་བ་རེ་ཡོང་གི་ཡོད། སྤྱི་ཡོངས་ཀྱི་སྒྲོམ་གཞི་དེ་གཅིག་པ་ཡིན་ཡང་ལས་དོན་བྱེད་ཕྱོགས་ཀྱི་ཐོག་ནས་ཁྱད་པར་ཞིག་ཡོང་གི་ཡོད་པར་བརྟེན་ང་ཚོ་ལས་བྱེད་ཚོ་དང་བསམ་བློ་གཅིག་མཐུན་ཐོག་འགྲོ་རྒྱུར་འབད་བརྩོན་ཞུས་ཏེ་ལས་བྱེད་ཚོ་དང་ལྷན་དུ་ཐུག་འཕྲད་བྱས་པ་ཡིན།
བོད་ཀྱི་དཔེ་མཛོད་ཁང་འདི་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེའི་བྱིན་རླབས་དང་། བཀའ་ཁྲི་ཟུར་པ་སློབ་དཔོན་ཟམ་གདོང་རིན་པོ་ཆེའི་ལམ་སྟོན། དེ་བཞིན་འགན་འཛིན་དགེ་བཤེས་ལྷག་རྡོར་ལགས། དྲུང་ཆེ་ངག་དབང་ལགས་བཅས་ཀྱིས་སྤྱི་ཡོངས་ནས་འགན་བཞེས་ཏེ་ཕྱག་ལས་གནང་ཡོད་སྟབས། ངས་དམིགས་བསལ་ཞུ་རྒྱུ་གང་ཡང་མེད། རྣམ་པ་ཚོས་ཕྱག་ལས་ཡག་པོ་གནང་གི་འདུག
བོད་ཀྱི་དཔེ་མཛོད་ཁང་ནི་སྒྲིག་འཛུགས་རྙིང་ཤོས་ཤིག་དང་། གལ་ཆེ་ཤོས་ཤིག་ཡིན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་པ་གཞིར་བཟུང་བོད་ཀྱི་ཆོས་དང་རིག་གཞུང་། སྐད་ཡིག་བཅས་ཉར་ཚགས་བྱེད་མཁན་གྱི་བསྟི་གནས་མང་དག་ཅིག་ཡོད་པའི་ནང་ནས་ཕུལ་བྱུང་གི་བསྟི་གནས་དེ་བོད་ཀྱི་དཔེ་མཛོད་ཆགས་ཀྱི་ཡོད། བོད་མི་ཞིག་ཡིན་པའི་ཆ་ནས་ང་ཚོ་བོད་སྤྱི་པའི་རྩ་དོན་གྱི་ངོ་བོ་དེ་ཤེས་དགོས་ཀྱི་ཡོད། ལྷག་པར་གཞོན་སྐྱེས་ཚོས་ངེས་པར་དུ་བོད་ཀྱི་ལོ་རྒྱུས་ལ་དོ་སྣང་གིས་དེའི་ཐད་ཉམས་ཞིབ་ཚད་ལྡན་ཞིག་གནང་དགོས་རྒྱུ་ཧ་ཅང་གལ་ཆེན་པོ་ཡིན། ཞེས་དང་། 
གཞན་ཡང་དཔལ་ལྡན་སྲིད་སྐྱོང་མཆོག་གིས་མུ་མཐུད་གསུང་དོན། བོད་མིའི་སྒྲིག་འཛུགས་ཀྱི་ལས་འགན་གཙོ་བོ་ནི་བོད་རྒྱའི་དཀའ་རྙོག་སེལ་རྒྱུ་དེ་རེད། བོད་རྒྱའི་དཀའ་ངལ་གསལ་བར་དངོས་ཡོད་གནས་སྟངས་ལ་ལྟ་དགོས་ཀྱི་ཡོད་པར་བརྟེན་སྤྱི་ནོར་༸གོང་ས་༸སྐྱབས་མགོན་ཆེན་པོ་ཆེན་པོ་མཆོག་གིས་ལོ་ངོ་མང་པོའི་རིང་རྒྱལ་སྤྱིའི་གནས་སྟངས་དང་། རྒྱ་ནག་གི་གནས་སྟངས། བོད་ཀྱི་གནས་སྟངས་སོགས་ལ་གཟིགས་ཞིབ་ཡུན་རིང་གནང་སྟེ་གཉིས་སྨན་དབུ་མའི་ལམ་ཞེས་པའི་སྲིད་བྱུས་དེ་སླེབས་པ་རེད།
དབུ་མའི་ལམ་གྱི་སྲིད་བྱུས་དེ་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གྲོས་འགོ་བཏོན་གནང་བ་ཞིག་དང་། བོད་མི་མང་སྤྱི་འཐུས་ལྷན་ཁང་ནས་གཏན་འབེབས་གནང་བ་ཙམ་མ་ཟད། བོད་མི་མང་ཚོགས་ཀྱི་བསམ་འཆར་ལ་གཞིགས་ཏེ་གཏན་འབེབས་བྱས་པ་ཞིག་ཡིན། བོད་རྒྱའི་དཀའ་རྙོག་སེལ་ཐབས་སླད་རྒྱ་ནག་གཞུང་དང་ལྷན་སྐད་ཆ་མ་བཤད་པར་ཡོང་རྒྱུ་མེད། བོད་རྒྱའི་དཀའ་རྙོག་སེལ་ཐབས་སུ་འབད་བརྩོན་ཤུགས་ཆེ་གནང་རྒྱུ་སྤྱི་དང་། ལྷག་པར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་པ་གཞིར་བཟུང་ལག་བསྟར་གནང་རྒྱུ་ཡིན་སྐོར་སོགས་དང་། གཞན་ཡང་བོད་མིའི་སྒྲིག་འཛུགས་ཀྱི་ལས་དོན་བྱེད་ཕྱོགས་སྐོར་ངོ་སྤྲོད་ཞིབ་རྒྱས་གནང་ཡོད་པ་བཅས། ། 
