༄༅། །འདི་གར་ཐའེ་ཝན་བོད་ཀྱི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༢༡ ཟླ་ ༨ ཚེས་ ༡༠ ཉིན་ཐའེ་ཝན་བོད་ཀྱི་སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས་དང་། དོན་ཁང་གི་དྲུང་ཆེ། གངས་ལྗོངས་དཔེ་སྐྲུན་ཁང་གི་འགན་འཛིན་བཅས་ནས་ཐའེ་ཝན་གྱི་སྲིད་འཛིན་ཟུར་པ་སྐུ་ཞབས་ཁྲིན་ཧྲུའི་པེན་མཆོག་གི་བཞུགས་ཡུལ་དུ་བཅར་ནས་མཇལ་འཕྲད་ཞུས་ཡོད་པ་རེད།
ཐོག་མར་དོན་གཅོད་སྐལ་བཟང་རྒྱལ་མཚན་ལགས་ཀྱིས་བོད་ལུགས་དཀར་གཙང་མཇལ་དར་ཕུལ་བ་དང་། དྲུང་ཆེ་ནས་ངོ་སྤྲོད་མཚམས་སྦྱོར་ཞུས་དོན། འདས་པའི་དོན་གཅོད་རིམ་པ་ནས་སྐུ་ཉིད་མཇལ་འཕྲད་ཞུ་མྱོང་ཡོད་པ་དང་། ཐའེ་ཝན་ནང་ནད་ཡམས་ཀྱིས་རྐྱེན་པས་དོན་གཅོད་གསར་པ་ད་བར་གཞུང་འབྲེལ་གནད་ཡོད་མི་སྣ་མཇལ་འཕྲད་རེ་ཞིག་འཕར་འགྱངས་ཞུ་དགོས་བྱུང་ཞིང་། ད་ཆ་ཐའེ་ཝན་ནང་ནད་ཡམས་ཅུང་ཡང་དུ་འགྲོ་བ་དང་བསྟུན་ཆེད་དུ་འཚམས་འདྲི་དང་ཐུགས་རྗེ་ཆེ་ཞུ་བར་བཅར་བ་ཡིན་གནས་ཞུས།
སྲིད་འཛིན་ཟུར་པ་སྐུ་ཞབས་ཁྲིན་ཧྲུའི་པེན་ལགས་ཀྱིས་༸གོང་ས་ཏཱ་ལའི་བླ་མ་མཆོག་གི་སྐུ་གཟུགས་གནས་སྟངས་གང་འདྲ་ཡོད་དམ། རེ་བ་ཆེ་ཤོས་དེ་༸གོང་ས་མཆོག་ཐའེ་ཝན་ནང་ཆིབས་སྒྱུར་གནང་ཐུབ་རྒྱུ་དེ་ཡིན། ཁོང་ནི་འཛམ་གླིང་ནང་སྙན་གྲགས་ལྡན་པའི་ཆོས་ལུགས་དབུ་ཁྲིད་ཡིན་པ་མ་ཟད། ཐའེ་ཝན་ནང་དད་ལྡན་མི་མང་ཧ་ཅང་མང་པོ་ཡོད་པ་རེད། ང་རང་སྲིད་འཛིན་ལས་ཐོག་སྐབས་རྒྱལ་ཁབ་ཀྱི་སྲིད་འཛིན་རིམ་པའི་གདན་ཞུ་དང་མཇལ་འཕྲད་ཞུས་པ་མ་ཟད། ངས་བཙན་བྱོལ་སྒྲིག་འཛུགས་དེ་གཞུང་ཞིག་ལ་ངོས་འཛིན་ཐོག་ནས་བོད་མིའི་ཕྱི་སྐྱོད་ལག་དེབ་ (IC) གཞུང་འབྲེལ་གྱིས་ངོས་ལེན་དང་། མཐོང་མཆན་ཡང་ཕྱི་སྲིད་ལས་ཁུངས་བརྒྱུད་སྤྲོད་པའི་ལམ་སྲོལ་གསར་གཏོད་བྱས་པ་ཡིན་སྐོར་སོགས་ངོ་སྤྲོད་གནང་།
དོན་གཅོད་སྐལ་བཟང་རྒྱལ་མཚན་ལགས་ཀྱིས་༸གོང་ས་མཆོག་གི་སྐུ་གཟུགས་གནས་སྟངས་དང་། ཨ་རི་གཞུང་ནས་བོད་དོན་ཐོག་བཞག་པའི་ཁྲིམས་ཡིག བཙན་བྱོལ་བོད་མིས་ཆབ་སྲིད་ཀྱི་དབུ་ཁྲིད་སྲིད་སྐྱོང་ཐད་ཀར་འོས་འདེམས། དབུས་བོད་མིའི་སྒྲིག་འཛུགས་ཞེས་པའི་མིང་བེད་སྤྱོད་བྱེད་པའི་དགོས་དམིགས། ད་ཆ་༸གོང་ས་མཆོག་གི་ཐུགས་སྐྱེད་དམ་བཅའ་བཞི་པ་སྟེ་རྒྱ་གར་གྱི་གནའ་བོའི་རིག་གཞུང་སླར་གསོ་མཛད་རྒྱུ། དེ་བཞིན་དོན་ཁང་གི་ལས་དོན་དང་འབྲེལ་བ། ལྷག་དོན་གངས་ལྗོངས་དཔེ་སྐྲུན་ཁང་ནས་རྒྱ་ཡིག་ཐོག་བོད་དོན་དང་འབྲེལ་བའི་དཔེ་དེབ་པར་སྐྲུན་ཞུ་བཞིན་པ་སོགས་ངོ་སྤྲོད་གནང་།
ཐེངས་འདིའི་མཇལ་འཕྲད་དུས་ཡུན་ཆུ་ཚོད་གཅིག་ཙམ་རིང་ཕན་ཚུན་བཀའ་བསྡུར་ལྷུག་པོ་བྱུང་ཞིང་། མཇལ་འཕྲད་གོ་སྒྲིག་གནང་མཁན་ཐའེ་ཝན་གྱི་གྲོས་ཚོགས་འཐུས་མི་སྐུ་ཞབས་ཀོའོ་གྷོ་ཝེན་ལགས་མཉམ་ཞུགས་ཡོད་པ་ལྟར། དོན་ཁང་གི་ལས་དོན་ཐད་བོད་མིའི་ཕྱི་སྐྱོད་ཡིག་ཆ་ (IC) ཕྱི་སྲིད་ལས་ཁུངས་བརྒྱུད་སྤྲོད་ཀྱི་ཡོད་ཀྱང་། སློབ་ཕྲུག་གི་མཐོང་མཆན་དང་། དུས་ཡུན་ཐད་ད་ཆ་དངོས་ཡོད་དཀའ་ངལ་ཡོད་པས་དོན་གཅོད་གསར་པའི་ངོས་ནས་འབྲེལ་ཡོད་ལས་ཁུངས་བརྒྱུད་དཀའ་ངལ་དེ་དག་སེལ་རྒྱུའི་འཆར་གཞི་ཡོད་པས་གྲོས་ཚོགས་འཐུས་མིའི་ངོས་ནས་རྒྱབ་སྐྱོར་ཡོང་བ་ཞུས་པར། སྲིད་འཛིན་མཆོག་གིས་གྲོས་ཚོགས་འཐུས་མིར་མངགས་ཆ་ནན་པོ་གནང་དོན་ལྟར་ཞལ་བཞེས་ཐོབ།
མཐའ་མ་གངས་ལྗོངས་དཔེ་སྐྲུན་ཁང་ནས་པར་སྐྲུན་ཞུས་པའི་དཔེ་དེབ་གཙོ་བོ་༼ཐའེ་ཝན་བོད་ཀྱི་སྐུ་ཚབ་དོན་གཅོད་ཁང་བཙུགས་ནས་ལོ་ཉི་ཤུ་འཁོར་བའི་ལོ་རྒྱུས་བརྙན་དེབ།༽དང་། ར་ཤེ་ཡའི་རྩོམ་པ་པོ་སྐུ་ཞབས་ (S.L. Kuzmin) ལགས་ཀྱིས་རྩོམ་བྲིས་གནང་བ་༼སྦས་བསྐུངས་ཀྱི་བོད།༽ དེ་བཞིན་༼བོད་མི་དམངས་འཆིངས་བྱེད་ཀྱི་ལྕགས་སྒྲོག་གྲོས་མཐུན་དོན་ཚན་བཅུ་བདུན་གྱི་སྔ་ཕྱིའི་བྱུང་རིམ་ལ་དཔྱད་པ།༽སོགས་དཔེ་དེབ་ཕྱག་རྟགས་ཕུལ་བར། སྲིད་འཛིན་མཆོག་གིས་ཀྱང་ཁོང་གི་མི་ཚེའི་ལོ་རྒྱུས་ཕྱག་རྟགས་གནང་ཞིང་། ཕྱག་དེབ་ཐོག་མཚན་རྟགས་དང་། ༼ཐའེ་བོད་མཛའ་འབྲེལ་ཁྲི་ལོར་བརྟན་པར་ཤོག༽ཅེས་ཕྱག་བསྟར་གྱི་ཕྱག་བྲིས་གནང་ཡོད་པ་བཅས། ། 
