༄༅། །བོད་མིའི་སྒྲིག་འཛུགས་ཀྱི་ལམ་སྟོན་དང་ཕོ་མོའི་ཆགས་སྲེད་རྩུབ་སྤྱོད་འགོག་ཐབས་ཀྱི་རྩ་འཛིན་ལམ་སྟོན་གཞིར་བཟུང་ཀུལླུ་དང་མ་ནཱ་ལཱིར་ཕོ་མོའི་ཆགས་སྲེད་རྩུབ་སྤྱོད་འགོག་ཐབས་ཀྱི་ལས་དོན་ཚོགས་ཆུང་ཆེས་ཐོག་མར་གསར་བཙུགས་གནང་བའི་ཐོག་ཕྱི་ལོ་ ༢༠༢༡ ཟླ་ ༨ ཚེས་ ༡༦ དང་ ༡༧ བཅས་ཉིན་གྲངས་གཉིས་རིང་བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་བུད་མེད་ནུས་སྟོབས་གོང་འཕེལ་ཚན་པའི་གོ་སྒྲིག་འོག་ཕོ་མོའི་ཆགས་སྲེད་རྩུབ་སྤྱོད་འགོག་ཐབས་ཐོག་ལ་ཟབ་སྦྱོང་ཞིག་ཚོགས་གནང་ཡོད། སྐབས་དེར་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་མར་ཐ་ཧྥར་རེལ་ཐེབས་རྩ་ཁང་ (Martha Farrell Foundation) གི་སློབ་སྟོན་པ་ལྕམ་སྐུ་ནཱན་དྷི་ཏ་བྷཌ་ (Nandita Bhatt) ལགས། བུད་མེད་ནུས་སྟོབས་གོང་འཕེལ་ཚན་པའི་ལས་བྱེད་ཚེ་རིང་སྐྱིད་ལགས་དང་བསྟན་འཛིན་ཚེ་བརྟན་ལགས་བཅས་ཆེད་ཕེབས་ཀྱིས་ཟབ་སྦྱོང་གནང་ཡོད།

དེ་ཡང་ས་གནས་ཀྱི་ཕོ་མོའི་ཆགས་སྲེད་རྩུབ་སྤྱོད་འགོག་ཐབས་ཀྱི་ལས་དོན་ཚོགས་ཆུང་ནང་ཚོགས་མི་བདུན་ཡོད་པ་དེ་དག་ནི་ཀུལླུ་དང་མ་ནཱ་ལཱིའི་ས་གནས་འགོ་འཛིན་ཐུབ་བསྟན་ཆོས་འཕེལ་ལགས་དང་། མ་ནཱ་ལཱི་ནས་བསོད་ནམས་ལྷ་འཛོམས་ལགས། པཱཏ་ལི་ཀུལ་ནས་བསྟན་འཛིན་སྣང་སྐྱིད་ལགས། ཌོ་བྷི་ནས་དབྱངས་འཛོམས་ལགས་དང་བསྟན་འཛིན་ཀུན་དགའ་ལགས། ཀུལླུ་ནས་ཚེ་རིང་སྒྲོལ་མ་ལགས་དང་ཚེ་རིང་མཚོ་མོ་ལགས་བཅས་ཡིན། །