༄༅། །དྭགས་པོ་བསྟན་འཛིན་སྒྲོལ་མ་ལགས་ཀྱིས་ཨོ་སི་ཊེ་ལི་ཡའི་རྒྱལ་ཡོངས་མཐོ་སློབ་ཁང་ (the Australian National University) ནས་ཕྱི་ལུགས་གསོ་བ་རིག་པའི་ཐོག་འབུམ་རམས་པའི་སློབ་སྦྱོང་གནང་སྟེ་བསླབ་པ་མཐར་སོན་ལེགས་པར་བྱུང་བར་ཨོ་སི་ཊེ་ལི་ཡའི་སྐུ་ཚབ་དོན་གཅོད་ཁང་གིས་དགའ་བསུའི་ཆེ་བསྟོད་གནང་ཡོད།

དེ་ཡང་ཨོ་སི་ཊེ་ལི་ཡའི་སྐུ་ཚབ་དོན་གཅོད་ཀརྨ་སེངྒེ་ལགས་ཀྱིས། དྭགས་པོ་བསྟན་འཛིན་སྒྲོལ་མ་ལགས་ཀྱིས་སློབ་སྦྱོང་གནང་སྟེ་གཟེངས་སུ་ཐོན་པའི་གྲུབ་འབྲས་བླངས་ཡོད་སྟབས། དེས་ཨོ་སི་ཊེ་ལི་ཡའི་མཐོ་སློབ་ཁག་ཏུ་སློབ་སྦྱོང་བྱེད་བཞིན་པའི་བོད་རིགས་སློབ་མ་རྣམས་ལ་མིག་དཔེ་བཟང་པོ་བསྟན་ཡོད། ཅེས་དང་། དྭགས་པོ་བསྟན་འཛིན་སྒྲོལ་མ་ལགས་ཀྱི་མ་འོངས་པའི་བྱ་གཞག་ཐམས་ཅད་ལམ་ལྷོངས་ཡོང་བ་དང་། ཁོང་གིས་མུ་མཐུད་བོད་དོན་དང་ཨོ་སི་ཊེ་ལི་ཡའི་ནང་གནས་སྡོད་བོད་མི་རྣམས་ལ་ཞབས་འདེགས་སྒྲུབ་པའི་རེ་བ་ཡོད། ཅེས་གསུངས།

དྭགས་པོ་བསྟན་འཛིན་སྒྲོལ་མ་ལགས་ནི། རྡ་སྟེང་བོད་ཁྱིམ་ནས་སློབ་མཐར་ཕྱིན་རྗེས་ཨིན་ཡུལ་གྱི་རྒྱལ་ས་ལོན་ཌོན་དུ་རྟེན་གཞི་བྱས་པའི་ལོན་ཌོན་མེ་ཊི་རོ་པོ་ལི་ཊན་མཐོ་སློབ་ཁང་ (the London Metropolitan University) ནས་སྐྱེ་དངོས་གསོ་རིག་ཐོག་ཉེ་བའི་གཙུག་ལག་རམ་འབྱམས་པའི་སློབ་སྦྱོང་གནང་ཡོད། ལོན་ཌོན་མེ་ཊི་རོ་པོ་ལི་ཊན་མཐོ་སློབ་ཁང་གི་སྐྱེ་དངོས་གསོ་རིག་སྡེ་ཚན་ནས་དྭགས་པོ་བསྟན་འཛིན་སྒྲོལ་མ་ལགས་ལ་བསླབ་པ་མཐར་སོན་གྱི་གཟེངས་རྟགས་གནང་ཡོད། དེ་རྗེས་དྭགས་པོ་བསྟན་འཛིན་སྒྲོལ་མ་ལགས་ཀྱིས་ཨོ་སི་ཊི་ལི་ཡའི་རྒྱལ་ཡོངས་མཐོ་སློབ་ཁང་ནས་སྐྱེ་ལྡན་འཕྲུལ་ལས་རིག་པའི་ཐོག་གཙུག་ལག་རབ་འབྱམས་པ་དང་། དེ་བཞིན་འབུམ་རམས་པའི་སློབ་སྦྱོང་གནང་ཡོད། ཁོང་གིས་གཅིན་སྙི་ཟ་ཁུའི་རིགས་རྫས་ཐོག་འབུམ་རམས་མའི་ཉམས་ཞིབ་དཔྱད་རྩོམ་གནང་ཡོད། གཞན་ཡང་དྭགས་པོ་བསྟན་འཛིན་སྒྲོལ་མ་ལགས་ཀྱིས་དེ་སྔ་ཁེན་བྷེ་ར་བོད་རིགས་མཐུན་ཚོགས་ཀྱི་དྲུང་ཆེའི་ལས་ཁུར་ཞུས་གནང་མྱོང་ཡོད་པ་བཅས།།