༄༅། །ཕྱི་ལོ་ ༢༠༢༡ ཟླ་ ༧ ཚེས་ ༦ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༦ ལ་ཕེབས་པའི་ྋསྐུའི་འཁྲུངས་སྐར་དུས་ཆེན་དང་བསྟུན། ཨིན་ཡུལ་སྐུ་ཚབ་དོན་གཅོད་ཁང་གི་གོ་སྒྲིག་འོག་༸གོང་ས་མཆོག་གི་ཁོར་ཡུག་དང་། གོ་ལའི་གནམ་གཤིས་འགྱུར་ལྡོག་དང་འབྲེལ་བའི་འཛམ་གླིང་ཡོངས་ལ་གཞེན་སྐུལ་ (His Holiness the Dalai Lama on Environment and Climate Appeal to the world) ཞེས་པའི་བརྗོད་གཞིའི་ཐོག་དྲ་ཐོག་བགྲོ་གླེང་ཞིག་ཚོགས་གནང་ཡོད།

དེ་ཡང་དྲ་ཐོག་གི་བགྲོ་གླེང་ལས་རིམ་གྱི་ཐོག་མར་སྤྱི་ནོར་༸གོང་ས་༸སྐྱབས་མགོན་༸ཆེན་པོ་མཆོག་གི་གསུང་འཕྲིན་བརྙན་ཐུང་ཞིག་གཟིགས་ཕུལ་ཞུས་རྗེས། ཨིན་ཡུལ་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་ཀྱིས་དྲ་ཐོག་གི་བགྲོ་གླེང་ནང་གསུང་བཤད་གནང་མཁན་ཇར་མན་གྱི་ཁོར་ཡུག་གསར་འགོད་པ་སྐུ་ཞབས་ཕ་རན་ཛི་ཨལ་ཊི་ (Dr Franz Alt) ལགས་དང་། ཁོར་ཡུག་ཐོག་ཆེད་མཁས་སྐུ་ཞབས་མ་ཡི་ཁེལ་བྷ་ཁི་ལེ་ (Michael Buckley) ལགས་རྣམ་གཉིས་ལ་དགའ་བསུ་ཞུས་ཡོད།འཇར་མན་ནིའི་གསར་འགོད་པ་ཧྥི་རན་ཛི་ཨལ་ཊི་ (Franz Alt)  ལགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ལྷན་ཕྱི་ལོ་ ༢༠༢༠ ལོར་བརྩམས་གནང་བའི་དཔེ་དེབ་ང་ཚོའི་ཁྱིམ་གཞིས་གཅིག་པུ་སྟེ། གོ་ལའི་གནམ་གཤིས་འགྱུར་ལྡོག་དང་འབྲེལ་བའི་འཛམ་གླིང་ཡོངས་ལ་གཞེན་སྐུལ་ (Our Only Home: A Climate Appeal to the World) ཞེས་པ་སོགས་དཔེ་དེབ་མང་པོ་བརྩམས་གནང་ཡོད།

དྲ་ཐོག་གི་བགྲོ་གླེང་ལས་རིམ་ཐོག་ཨིན་ཡུལ་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་ཀྱིས་དབུ་འབྱེད་གསུང་བཤད་གནང་དོན། ང་ཚོས་གོ་ལ་ཡོངས་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༦ ལ་ཕེབས་པའི་ྋསྐུའི་འཁྲུངས་སྐར་སྲུང་བརྩི་ཞུས་ཏེ། མགོན་པོ་གང་ཉིད་ཀྱིས་འགྲོ་བ་མིའི་རིགས་ལ་ཕུལ་བའི་ལེགས་སྐྱེས་དག་དྲན་གསོ་ཞུ་རྒྱུ་ཡིན།  སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནི་ང་ཚོའི་དུས་སྐབས་ཀྱི་རླབས་ཆེ་བའི་འཛམ་གླིང་གི་དབུ་ཁྲིད་ཅིག་དང་།  འགྲོ་བ་མིའི་རིགས་ཀྱི་རིན་ཐང་ལ་སྲུང་སྐྱོབ་གནང་མཁན། ཞི་བདེའི་མགྲིན་ཚབ་པ། ཁོར་ཡུག་གི་ལས་འགུལ་བ་ཞིག་ཡིན། མགོན་པོ་གང་ཉིད་ཀྱིས་རྒྱལ་ཁབ་ཁག་གི་དབུ་ཁྲིད་དང་། ཆོས་ལུགས་ཀྱི་དབུ་ཁྲིད། ནོ་བེལ་གཟེངས་རྟགས་ཐོབ་མཁན་གྱི་གྲོགས་པོ། ཚན་རིག་པ། མཁས་དབང་།  དེ་བཞིན་ཁོར་ཡུག་ཐོག་གི་མཁས་དབང་གིས་གཙོས་མི་མང་དཀྱུས་མ་རྣམས་ལ་མི་ཕན་ཚུན་གུས་བཀུར་དགོས་སྐོར་བཀའ་སློབ་བསྩལ་གྱི་ཡོད། ཅེས་དང་།དེ་བཞིན་འདི་ལོར་རྒྱལ་ཚོགས་ཀྱི་གོ་ལའི་གནམ་གཤིས་འགྱུར་ལྡོག་གི་ལྷན་ཚོགས་ཆེ་ཤོས་ (COP26) ཨིན་ཡུལ་དུ་འཚོགས་གཏན་འཁེལ་བས་དེའི་སྐབས་ཆབ་སྲིད་མི་སྣ་དང་། ཕྱི་འབྲེལ་མི་སྣ། དེ་བཞིན་རྒྱལ་ཁབ་ཁག་གི་དབུ་ཁྲིད་རྣམས་ཀྱིས་གོ་ལའི་གནམ་གཤིས་ཀྱི་དྲོད་ཚད་ཉུང་དུ་གཏོང་རྒྱུའི་ཐད་གྲོས་མཐུན་ཡོང་བའི་རེ་བ་ཆེན་པོ་བྱེད་བཞིན་ཡོད། ཨིན་ཡུལ་སྐུ་ཚབ་དོན་གཅོད་ཁང་གིས་ཀྱང་གནམ་གཤིས་འགྱུར་ལྡོག་གིས་རྐྱེན་པས་བོད་མཐོ་སྒང་ཇེ་སྡུག་ཏུ་འགྲོ་བའི་ཤུགས་རྐྱེན་གསལ་འདོན་བྱེད་བཞིན་ཡོད། ཅེས་གསུངས།

དེ་རྗེས་སྐུ་ཞབས་ཧྥི་རན་ཛི་ཨལ་ཊི་ལགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༦ ལ་ཕེབས་པའི་ྋསྐུའི་འཁྲུངས་སྐར་ཐོག་མགོན་གང་ཉིད་སྐུ་གཟུགས་གསལ་ཐང་དང་། སྐུ་ཚེ་ཞབས་པད་བསྐལ་བརྒྱར་བརྟན་པའི་སྨོན་འདུན་ཞུས་པ་དང་སྦྲགས། དེ་སྔ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ལྷན་བརྙན་འཕྲིན་བརྒྱུད་དྲི་བ་ཕུལ་བའི་སྐོར་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ལྷན་བརྩམས་གནང་བའི་བཟང་སྤྱོད་ནི་ཆོས་ལུགས་ལས་གལ་གང་ཆེ་ (Ethics are more important than religion)  ཞེས་པའི་དཔེ་དེབ་སོགས་ཀྱི་སྐོར་གསུངས།

ཕྱོགས་མཚུངས་སྐུ་ཞབས་མ་ཡི་ཁེལ་བྷ་ཁི་ལེ་ལགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༨༦ ལ་ཕེབས་པའི་༸སྐུའི་འཁྲུངས་སྐར་ལ་འཚམས་འདྲི་ཞུས་པ་དང་འབྲེལ། ཕྱི་ཟླ་ ༩ པའི་ནང་པར་འགྲེམས་ཞུ་འཆར་ཡོད་པའི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཕྱག་དེབ་གསར་པ་ (This Fragile Planet) ཞེས་པ་དང་འབྲེལ་བའི་སྐོར་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་ཙམ་མ་ཟད། ཨེ་ཤི་ཡ་དང་། གོ་ལ་ཁྱོན་ཡོངས་ཀྱི་རང་བྱུང་ཁོར་ཡུག་ལ་འགན་འཁུར་བཞིན་ཡོད་ཅེས་དང་། དེ་བཞིན་ཁོང་གིས་མགོན་པོ་གང་ཉིད་ཀྱི་ཐུགས་བསྐྱེད་དམ་བཅའ་བཞིའི་སྐོར་དང་། ལྷག་པར་ཐུགས་བསྐྱེད་དམ་བཅའ་གསུམ་པ་བོད་ཀྱི་རིག་གཞུང་གཅེས་འཛིན་དང་། བོད་ཀྱི་ཁོར་ཡུག་སྲུང་སྐྱོབ་ཐོག་གསུང་བཤད་གནང་ཡོད་པ་བཅས། །