༄༅། །རྒྱལ་ཚོགས་ཀྱི་གནམ་གཤིས་འགྱུར་ལྡོག་སྐོར་གྱི་ཚོགས་འདུ་སི་ཁོ་ཊི་ལན་ཌིའི་གྷི་ལ་སི་གྷོ་ (Glasgow) གྲོང་ཁྱེར་ནང་འཚོགས་ལ་ཉེ་བ་དང་བསྟུན། ཨིན་ཡུལ་སྐུ་ཚབ་དོན་གཅོད་ཁང་གི་གོ་སྒྲིག་འོག་ཕྱི་ལོ་ ༢༠༢༡ ཟླ་ ༦ ཚེས་ ༢༥ ནས་ ༢༦ བར་ཉིན་གྲངས་གཉིས་རིང་བོད་མཐོ་སྒང་གི་ཁོར་ཡུག་སྟེ་འཛམ་གླིང་གི་སྣེ་གསུམ་པའི་གནམ་གཤིས་འགྱུར་ལྡོག་གི་དཀའ་ངལ་སེལ་ཐབས་ཞེས་པའི་སྐོར་གྱི་ཚོགས་འདུ་ཞིག་ཨིན་ཡུལ་གྱི་རྒྱལ་ས་ལོན་ཌོན་དུ་རྟེན་གཞི་བྱས་པའི་ས་ཁམས་རིག་པའི་ཚོགས་པ་ (Royal Geographical Society) རུ་ཚོགས་གནང་ཡོད།
དེ་ཡང་ཐེངས་འདིའི་ཚོགས་འདུའི་དམིགས་ཡུལ་ནི། བོད་མཐོ་སྒང་གི་གནམ་གཤིས་འགྱུར་ལྡོག་ཐད་གོ་རྟོགས་མཐོ་རུ་བཏང་སྟེ་རྒྱལ་སྤྱིའི་གླིང་སྟེགས་ཁྲོད་འཛམ་གླིང་དབུ་ཁྲིད་ཚོས་བོད་མཐོ་སྒང་གི་ཉམས་ཉེན་ལ་གལ་གནད་ཆེ་ཤོས་སུ་རྩི་གནང་ཡོང་བའི་འབོད་སྐུལ་ཞུ་རྒྱུ་དང་། རྒྱལ་ཚོགས་ཀྱི་གོ་ལའི་གནམ་གཤིས་འགྱུར་ལྡོག་གི་ལྷན་ཚོགས་ཆེ་ཤོས་ (COP26) ཐོག་གནམ་གཤིས་འགྱུར་ལྡོག་ལ་ཁ་གཏད་གཅོག་དགོས་པ་ནན་སྐུལ་ཞུ་རྒྱུ་དེ་ཡིན།
ཚོགས་འདུའི་དབུ་འབྱེད་གསུང་བཤད་ཐོག་ཨིན་ཡུལ་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་ཀྱིས། ཚོགས་འདུ་འདིས་བོད་མཐོང་སྒང་གི་འཁྱགས་རོམ་བཞུར་ཚད་མྱུར་བའི་མཇུག་འབྲས་དང་། དེ་བཞིན་ཨེ་ཤི་ཡའི་ནང་འཐུང་ཆུ་དང་ཆུ་འདྲེན་བཅས་མི་འདང་བའི་དཀའ་ངལ་འཕྲད་རྒྱུ་ཡིན་པའི་ཐོག་གོ་ལ་ཡོངས་ཀྱི་དོ་སྣང་སླེབས་ཐུབ་པའི་རེ་བ་བྱེད་ཀྱི་ཡོད་ཅེས་གསུངས།
དེ་རྗེས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཚོགས་འདུའི་ཐོག་གསུང་བཤད་གནང་སྟེ། མཉམ་ཞུགས་པ་ཚང་མས་ཡོང་རྒྱུའི་ཟླ་བ་ཁ་ཤས་ནང་བོད་མཐོ་སྒང་གི་གནམ་གཤིས་འགྱུར་ལྡོག་གི་གནད་དོན་རིམ་པ་འདྲ་མིན་ཐོག་གླེང་གློང་གནང་སྟེ། དེའི་གལ་ཆེའི་རང་བཞིན་སོགས་གསལ་འདོན་གནང་བ་དང་འབྲེལ། འཛམ་གླིང་ཁྱོན་ཡོངས་ལ་འཛམ་གླིང་གི་སྣེ་གསུམ་པའི་གལ་ཆེའི་རང་བཞིན་དང་། གནམ་གཤིས་འགྱུར་ལྡོག་གི་མཇུག་འབྲས་བཅས་ཀྱི་ཐོག་ཞུ་གཏུགས་ཡོང་བའི་རེ་སྐུལ་གནང་ཡོད།
དེ་བཞིན་དཔལ་ལྡན་སྲིད་སྐྱོང་མཆོག་གིས་རྒྱལ་ཚོགས་ཀྱི་གོ་ལའི་གནམ་གཤིས་འགྱུར་ལྡོག་གི་ལྷན་ཚོགས་ཆེ་ཤོས་ཀྱི་ཚོགས་འདུ་མ་འཚོགས་བར་ད་ལན་གྱི་ཚོགས་འདུ་འདི་མུ་མཐུད་མཇུག་སྐྱོང་གནང་དགོས་སྐོར་སོགས་གསུངས།
དེ་བཞིན་ཚོགས་འདུ་ཉིན་དང་པོའི་ཐོག་ཨིན་ཡུལ་གྲོས་ཚོགས་འཐུས་མི་དང་ཨིན་ཡུལ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་ཀེ་རེ་མེག་ཁར་ཐེ་ལགས་དང་། ཨ་བྷར་ཌན་མཐོ་སློབ་ཁང་གི་སི་ཁོ་ཊི་ཞིའི་ཧི་མ་ལ་ཡ་ཉམས་ཞིབ་བསྟི་གནས་ཁང་གི་འགན་འཛིན་མར་ཊིན་མི་ལི་སི་ (Dr Martin Mills) ལགས། བོད་གནས་ལྟ་ཞིབ་ཁང་གི་ཉམས་ཞིབ་པ་བསྟན་འཛིན་ཆོས་སྐྱིད་ལགས། རྒྱལ་སྤྱིའི་བོད་དོན་འབྲེལ་མཐུད་ཁང་གི་ཉམས་ཞིབ་པ་བློ་བཟང་དབྱངས་མཚོ་ལགས། སྐུ་ཞབས་གྷེབ་རིལ་ལ་ཕི་ཊེ་ (Gabriel Lafitte) ལགས། སུད་སིའི་སྐུ་ཚབ་དོན་གཅོད་ཁང་གི་ལས་བྱེད་འཕྲིན་ལས་ཆོས་སྐྱིད་ལགས་བཅས་ཀྱིས་གསུང་བཤད་གནང་ཡོད།
དེ་བཞིན་ཉིན་གཉིས་པའི་ཚོགས་འདུ་གཙོ་བོ་གནམ་གཤིས་ཐོག་གི་ལས་འགུལ་དང་། བོད་དོན་དྲིལ་བསྒྲགས་ཐོག་དམིགས་ཡོད་པ་དང་། སྐུ་ཞབས་མར་ཊིན་མི་ལི་སི་ལགས་དང་། འཕྲིན་ལས་ཆོས་སྐྱིད་ལགས། ལྕམ་སྐུ་ (Ms Joanna Walton) ལགས། ལྕམ་སྐུ་ (Ms Aliza Ayaz) ལགས་བཅས་ཀྱིས་གསུང་བཤད་གནང་ཡོད་པ་བཅས། །
