༄༅། །ཕྱི་ལོ་ ༢༠༢༡ ཟླ་ ༧ ཚེས་ ༢༦ ཉིན་ཨ་རིའི་ཕྱི་སྲིད་ལྷན་ཁང་གི་མགྲིན་ཚབ་པ་སྐུ་ཞབས་ནེ་ཌི་པི་ར་ཡི་སི་ (Ned Price) ལགས་ཀྱིས་གསར་འགོད་གསལ་བསྒྲགས་ཤིག་སྤེལ་བ་ལྟར་ན། ཨ་རིའི་ཕྱི་སྲིད་ལྷན་ཁང་གི་དྲུང་ཆེ་གཞོན་པ་ལྕམ་སྐུ་ཝན་ཌེ་ཤར་མན་ (Wendy R Sherman) མཆོག་ཕྱི་ལོ་ ༢༠༢༡ ཟླ་ ༧ ཚེས་ ༢༥ ནས་ ༢༦ བར་རྒྱ་ནག་ལ་རྒྱལ་དོན་འཚམས་གཟིགས་གནང་ཡོད་པ་དང་། སྐབས་དེར་ལྕམ་སྐུ་ཝན་ཌེ་ཤར་མན་མཆོག་གིས་རྒྱ་ནག་གི་ཕྱི་སྲིད་བློན་ཆེན་ཝང་ཡི་ (Wang Yi) དང་མཐོ་རིམ་ལས་བྱེད་རྒན་གྲས་ཁག་གཅིག་དང་ཐུག་འཕྲད་གནང་སྟེ་ཨ་རིའི་ངོས་ནས་རྒྱ་ནག་གི་ཧི་ནན་ཞིང་ཆེན་ (Henan Province) ནང་ཆུ་ལོག་གི་གོད་ཆག་བྱུང་ནས་མི་ཕྱུགས་གཉིས་ཀའི་ཚེ་སྲོག་ཤོར་བ་དང་། དེ་བཞིན་རྒྱུ་ནོར་སོགས་ལ་གྱོང་གུད་ཚབས་ཆེན་ཕོག་པའི་གནས་ཚུལ་ཐོན་པར་ལྷག་བསམ་རྣམ་དག་གིས་ཐུགས་གསོ་གནང་གི་ཡོད་ཅེས་གསུངས་པ་དང་འབྲེལ། རྒྱ་ནག་གཞུང་གིས་བོད་དང་། ཡུ་གུར། ཧོང་ཀོང་བཅས་ཀྱི་ནང་གསར་འགོད་རང་དབང་ཐོག་དམ་བསྒྲགས་དང་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་པའི་སྐོར་ཐུགས་འཚབ་ཆེན་པོའི་སྒོ་ནས་གླེང་སློང་ཤུགས་ཆེ་གནང་ཡོད། གཞན་ཡང་ཁོང་གིས་དྲྭ་རྒྱ་དང་། ཐའེ་ཝན། ཤར་ལྷོ་རྒྱ་ནག་རྒྱ་མཚོ་བཅས་ཀྱི་གནད་དོན་སོགས་ཀྱི་སྐོར་ཐུགས་འཚབ་ཆེན་པོའི་སྒོ་ནས་གླེང་སློང་གནང་འདུག

ཕྱོགས་མཚུངས་ལྕམ་སྐུ་ཝན་ཌེ་ཤར་མན་མཆོག་གིས་རྒྱ་ནག་གཞུང་གིས་ཨ་རི་དང་ཁེ་ན་ཌའི་མི་སེར་ཁག་གཅིག་འཛིན་བཟུང་བྱས་པའི་སྐོར། དེ་བཞིན་ཏོག་དབྱིབས་གཉན་རིམས་ཀྱི་འབྱུང་ཁུངས་གང་ཡིན་ཞིབ་འཇུག་སླད་རྒྱ་ནག་གཞུང་གིས་རྒྱལ་སྤྱིའི་འཕྲོད་བསྟེན་ལྷན་ཁང་དང་ལྷན་དུ་མཉམ་འབྲེལ་བྱེད་ཀྱི་མེད་པའི་སྐོར་དང་། གོ་ལའི་གནམ་གཤིས་འགྱུར་ལྡོག་གི་དཀའ་ངལ་སོགས་ཀྱི་སྐོར་གླེང་སློང་གནང་ཡོད་པ་བཅས།།