༄༅། །སྤྱི་ནོར་༸གོང་ས་༸སྐྱབས་མགོན་༸ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༦ ལ་ཕེབས་པའི་ྋསྐུའི་འཁྲུངས་སྐར་ལ་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ནེན་སི་པི་ལོ་སི་མཆོག་ (Nancy Pelosi) དང་། ཨ་རིའི་ཕྱི་སྲིད་ལྷན་ཁང་གི་དྲུང་ཆེ་ཨན་ཊོ་ནེ་བྷི་ལིན་ཀེན་ (Antony Blinken) མཆོག ཨ་རིའི་གྲོས་ཚོགས་འཐུས་མི་སྐུ་ཞབས་ཇིམ་མེག་གྷོ་ཝན་ (Jim McGovern) མཆོག ཨ་རིའི་ཕྱི་སྲིད་ལྷན་ཁང་གི་མགྲིན་ཚབ་པ་སྐུ་ཞབས་ནེ་ཌི་པི་ར་ཡི་སི་ (Ned Price) ལགས་བཅས་ཀྱིས་བརྙན་འཕྲིན་དང་ཊུ་ཝི་ཊར་བརྒྱུད་འཚམས་འདྲི་ཞུས་གནང་འདུག
དེ་ཡང་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ནེན་སི་པི་ལོ་སི་མཆོག་གིས་བརྙན་འཕྲིན་དང་ཊུ་ཝི་ཊར་བརྒྱུད་༧སྐུའི་འཁྲུངས་སྐར་ལ་འཚམས་འདྲི་ཞུས་གནང་དོན། ཨ་རིའི་གྲོས་ཚོགས་འོག་མའི་ཚོགས་གཙོ་ཡིན་པའི་ཆ་ནས་ངས་ཨ་རིའི་གྲོས་ཚོགས་འོག་མའི་ཚབ་ཞུས་ཏེ་བོད་མི་དང་བོད་ཀྱི་གྲོགས་པོ་མང་པོ་དང་ལྷན་དུ་མཉམ་ཞུགས་ཐོག་༧གོང་ས་མཆོག་དགུང་གྲངས་གྱ་དྲུག་ལ་ཕེབས་པའི་༧སྐུའི་འཁྲུངས་སྐར་ལ་སྤྲོ་སེམས་འཁོལ་བའི་ངང་ནས་འཚམས་འདྲི་ཞུ་རྒྱུ་ཡིན།
༸སྐུའི་འཁྲུངས་སྐར་ནི། ༧གོང་ས་མཆོག་དང་མགོན་པོ་གང་ཉིད་ཀྱིས་སྩལ་བའི་རེ་བའི་ལམ་སྟོན། དེ་བཞིན་འཛམ་གླིང་ཡོངས་ལ་ཆོས་ཕྱོགས་ཀྱི་ལམ་སྟོན་མཛད་པ་བཅས་སྲུང་བརྩི་ཞུ་རྒྱུའི་མཛེས་སྡུག་ལྡན་པའི་གོ་སྐབས་ཤིག་ཡིན། འཁྲུངས་སྐར་ནི་ཞི་བདེ་ལ་དགའ་མཁན་གྱི་སྐྱེ་བོ་དག་ལ་མཚོན་ན་དགོས་དོན་བསྒྲུབ་པར་སླར་ཡང་ཁས་ལེན་དམ་བཅའ་ཞུ་རྒྱུའི་གོ་སྐབས་ཤིག་རེད། གོ་སྐབས་དེ་ནི་ཞི་བདེ་ལ་དགའ་མཁན་གྱི་སྐྱེ་བོ་དག་གིས། པེ་ཅིང་གི་ཐེ་བྱུས་དང་འཇིགས་སྐུལ་མེད་པར་བོད་མི་རྣམས་ཀྱིས་རང་དབང་གི་སྒོ་ནས་སོ་སོའི་ཆོས་དང་རིག་གཞུང་ཉམས་ལེན་དང་སྲུང་བརྩི། དེ་བཞིན་རང་དབང་གི་སྒོ་ནས་སོ་སོའི་ཕ་སྐད་རྒྱག་ཐུབ་པར་དགོས་དོན་བསྒྲུབ་རྒྱུའི་ཁས་ལེན་དམ་བཅའ་ཞུ་རྒྱུ་དེ་རེད།
དེར་བརྟེན་ཨ་རིའི་གྲོས་ཚོགས་གོང་འོག་གཉིས་ནས་རྒྱ་ནག་ལ་འགན་འཁུར་དུ་འཇུག་དགོས་པའི་འབད་བརྩོན་གནང་ཡོད་པ་མ་ཟད། བོད་མི་རྣམས་ལ་རྒྱབ་སྐྱོར་གྱི་སླད་ཕྱི་ལོ་ ༢༠༢༠ ལོའི་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་གཏན་འབེབས་གནང་ཡོད། ང་ཚོས་མུ་མཐུད་བོད་དོན་ལ་རྒྱབ་སྐྱོར་ཤུགས་ཆེ་བྱ་རྒྱུ་ཡིན། ༧སྐུའི་འཁྲུངས་སྐར་གྱི་དམིགས་བསལ་དུས་ཆེན་དང་བསྟུན། ངས་དེ་སྔ་ཨ་རིའི་གྲོས་ཚོགས་གོང་འོག་གཉིས་ཀྱི་གྲོས་ཚོགས་འཐུས་མིའི་སྐུ་ཚབ་ཁག་གཅིག་བཞུགས་སྒར་རྡ་སར་ཁྲིད་རྒྱུའི་གོ་སྐབས་བཟང་པོ་བྱུང་བ་དྲན་གསོ་ཞུ་འདོད་བྱུང་། བཞུགས་སྒར་རྡ་ས་ནས་༧གོང་ས་མཆོག་གིས་སྣེ་ལེན་དང་མཇལ་ཁ་གནང་བྱུང་།
བཞུགས་སྒར་རྡ་ས་ནས་ང་ཚོས་བོད་མིའི་མངོན་འདོད་དངོས་སུ་ཤེས་རྟོགས་བྱུང་། ལྷག་པར་ང་ཚོས་ཐུག་འཕྲད་གནང་བའི་བོད་པའི་ཕྲུ་གུ་རྣམས་ཀྱི་མིག་ཀོང་ནས་བོད་མིའི་མངོན་འདོད་ཤེས་རྟོགས་བྱུང་། ༧གོང་ས་མཆོག་གིས་ཨ་རིའི་སྲིད་འཛིན་ཟུར་པ་སྐུ་ཞབས་ཇོར་ཇི་སྦུ་ཤི་ (George W. Bush) མཆོག་གིས་ཕུལ་གནང་བའི་ཨ་རིིའི་གྲོས་ཚོགས་ཀྱི་གསེར་གྱི་གཟེངས་རྟགས་བཞེས་གནང་མཛད་པ་དེ་ངས་དགའ་སྤྲོའི་ངང་ནས་དྲན་གསོ་ཞུ་འདོད་བྱུང་།
བོད་མིའི་མངོན་འདོད་དང་ཞི་བདེ་ལ་རྒྱབ་སྐྱོར་གྱི་ཆེད་དུ་ཨ་རིའི་མི་མང་དང་འགོ་ཁྲིད་རྣམ་པས་མུ་མཐུད་མཉམ་རུབ་ཐོག་ཕྱག་ལས་གནང་ཐུབ་ཀྱི་རེད། ༧གོང་ས་མཆོག་དགུང་གྲངས་གྱ་དྲུག་ལ་ཕེབས་པའི་སྐུའི་འཁྲུངས་སྐར་ཉིན་མོར་བོད་མི་རྣམས་དང་འཛམ་གླིང་ཡོངས་ལ་བདེ་སྐྱིད་དང་། སྐུ་གཟུགས་གསལ་ཐང་། བདེ་འཇགས་ཡོང་བའི་སྨོན་འདུན་ཞུ་རྒྱུ་ཡིན། ཐུགས་རྗེ་ཆེ། ཞེས་གསུངས།
དེ་བཞིན་ཨ་རིའི་ཕྱི་སྲིད་ལྷན་ཁང་གི་དྲུང་ཆེ་ཨན་ཊོ་ནེ་བྷི་ལིན་ཀེན་ (Antony Blinken) མཆོག་གིས་ཊུ་ཝི་ཊར་བརྒྱུད་༧སྐུའི་འཁྲུངས་སྐར་ལ་སྤྲོ་སེམས་འཁོལ་བའི་ངང་འཚམས་འདྲི་ཞུས་གནང་བ་དང་འབྲེལ། མགོན་པོ་གང་ཉིད་མཆོག་གིས་ང་ཚོ་ཚང་མར་ཉིན་ལྟར་ཉམ་ཆུང་དང་། བྱམས་བརྩེ། བསམ་ཤེས་ལྡན་པའི་ངང་ནས་འཚོ་དགོས་པའི་སེམས་ཤུགས་སྤར་གནང་གི་ཡོད། ཅེས་གསུངས།
ཨ་རིའི་གྲོས་ཚོགས་འཐུས་མི་སྐུ་ཞབས་ཇིམ་མེག་གྷོ་ཝན་ (Jim McGovern) མཆོག་གིས་བརྙན་འཕྲིན་བརྒྱུད་༧སྐུའི་འཁྲུངས་སྐར་ལ་འཚམས་འདྲི་ཞུས་གནང་བ་དང་འབྲེལ། འཛམ་གླིང་མི་མང་གིས་༧གོང་ས་མཆོག་ལ་བརྩི་བཀུར་ཞུ་གནང་གི་ཡོད། དེ་རིང་གཞིས་བྱེས་བོད་མི་ཡོངས་ཀྱིས་རྒྱལ་སྤྱིའི་བོད་དོན་རྒྱབ་སྐྱོར་བ་རྣམས་དང་ལྷན་དུ་༧གོང་ས་མཆོག་གི་འཁྲུངས་སྐར་སྲུང་བརྩི་ཞུ་གནང་གི་ཡོད། ༧གོང་ས་མཆོག་གིས་བོད་མི་ཚོའི་ཆེད་དུ་དྲང་བདེན་དང་ཞི་བདེ་རྩོད་གནང་གི་ཡོད། ཨ་རིའི་གྲོས་ཚོགས་ནས་བོད་མི་རྣམས་ཀྱི་ཆེད་དུ་རྒྱབ་སྐྱོར་ཤུགས་ཆེ་གནང་གི་ཡོད་པས་རང་ཉིད་ལ་སྤོབས་པ་ཡོད། ཟླ་བ་དྲུག་གི་གོང་ཨ་རིའི་གྲོས་ཚོགས་ནས་ཕྱི་ལོ་ ༢༠༢༠ ལོའི་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་གཏན་འབེབས་གནང་ཡོད། ཁྲིམས་དེའི་ནང་༧གོང་ས་མཆོག་གི་མ་འོངས་ཡང་སྲིད་ངོས་འཛིན་ཞུ་རྒྱུའི་སྐུ་དབང་༧གོང་ས་མཆོག་དང་བོད་མི་ཁོ་ནར་ཡོད་པ་འཁོད་ཡོད། ཅེས་སོགས་གསུངས།
ཕྱོགས་མཚུངས་ཨ་རིའི་ཕྱི་སྲིད་ལྷན་ཁང་གི་མགྲིན་ཚབ་པ་སྐུ་ཞབས་ནེ་ཌི་པི་ར་ཡི་སི་ (Ned Price) ལགས་ཀྱིས་བརྙན་འཕྲིན་དང་ཊུ་ཝི་ཊར་བརྒྱུད་འཛམ་གླིང་གི་ས་ཕྱོགས་གང་སར་གནས་པའི་བོད་མི་ཚོ་དང་ལྷན་དུ་༧གོང་ས་མཆོག་དགུང་གྲངས་གྱ་དྲུག་ལ་ཕེབས་པའི་༧སྐུའི་འཁྲུངས་སྐར་ལ་འཚམས་འདྲི་ཞུ་གི་ཡོད། ཅེས་དང་། ༧གོང་ས་མཆོག་གིས་ཞི་བདེ་དང་། འདྲ་མཉམ། བྱམས་བརྩེ་བཅས་ཀྱི་གལ་གནད་སྐོར་བཀའ་སློབ་སྩལ་བ་དེས་ང་ཚོ་ཚང་མར་སེམས་ཤུགས་སྤོར་དུ་འཇུག་གི་ཡོད། ཅེས་གསུངས།།
