༄༅། །ཕྱི་ལོ་ ༢༠༢༡ ཟླ་ ༧ ཚེས་ ༢༣ ཉིན་ཨ་རིའི་གྲོས་ཚོགས་གོང་མའི་འཐུས་མི་དང་ཨ་རིའི་གྲོས་ཚོགས་ཀྱི་རྒྱ་ནག་ལས་དོན་ཚོགས་ཆུང་གི་ཚོགས་གཙོ་སྐུ་ཞབས་ཇེབ་མར་ཀི་ལེ་ (Jeff Merkley) མཆོག་དང་། ཨ་རིའི་གྲོས་ཚོགས་འོག་མའི་འཐུས་མི་དང་ཨ་རིའི་གྲོས་ཚོགས་ཀྱི་རྒྱ་ནག་ལས་དོན་ཚོགས་ཆུང་གི་ཟུང་འབྲེལ་ཚོགས་གཙོ་སྐུ་ཞབས་ཇེམ་སི་མེག་གྷོ་ཝན་ (James McGovern) མཆོག་གིས་རྒྱལ་སྤྱིའི་ཨོ་ལེམ་ཕིག་རྩེད་འགྲན་ཚོགས་ཆུང་ (International Olympic Committee) གི་ཚོགས་གཙོ་སྐུ་ཞབས་ཐོ་མ་སི་བྷག་ (Thomas Bach) ལགས་ལ་ཞུ་ཡིག་ཅིག་ཕུལ་གནང་ཡོད།

ཞུ་ཡིག་དེར་ཨ་རི་གྲོས་ཚོགས་ཀྱི་རྒྱ་ནག་ལས་དོན་ཚོགས་ཆུང་གི་ཟུང་འབྲེལ་ཚོགས་གཙོ་ཟུར་པ་ཨ་རིའི་གྲོས་ཚོགས་འཐུས་མི་སྐུ་ཞབས་མར་ཁོ་རུ་བྷིའོ་ (Sen. Marco Rubio)  མཆོག་དང་ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་ཁི་རི་སི་སི་མི་ཐི་ (Chris Smith) མཆོག་གིས་རྒྱབ་སྐྱོར་གནང་ཡོད།

དེ་ཡང་ཞུ་ཡིག་ནང་འཁོད་དོན། ཕྱི་ལོ་ ༢༠༢༢ ལོའི་དགུན་དུས་ཨོ་རྩེད་འགྲན་ཚོགས་གོ་སྒྲིག་གནང་མཁན་རྒྱལ་ཁབ་གཞུང་གིས་ཆེས་གདུག་རྩུབ་ཆེ་བའི་སྒོ་ནས་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་པ་མཚམས་འཇོག་མ་བྱེད་པ་ཡིན་ན། ཕྱི་ལོ་ ༢༠༢༢ ལོའི་པེ་ཅིང་དགུང་དུས་ཨོ་རྩེད་འགྲན་ཚོགས་ཕྱིར་འགྱངས་གནང་དགོས་པ་མ་ཟད། ཨོ་རྩེད་འགྲན་ཚོགས་ཀྱི་ཚོགས་ཡུལ་ཡང་གནས་སྤོ་གནང་དགོས། གཞུང་གིས་མི་རིགས་སྡེབ་གསོད་དང་འགྲོ་བ་མིའི་རིགས་ལ་ཁྲིམས་འགལ་བྱ་སྤྱོད་སྤེལ་བཞིན་པའི་རྒྱལ་ཁབ་ཅིག་གི་ནང་ཨོ་རྩེད་འགྲན་ཚོགས་འཚོགས་མི་རུང་། ཞེས་དང་།

ལས་འགུལ་འདི་ནི་ཨོ་ལེམ་ཕིག་རྩེད་འགྲན་པ་ཚོར་ཁེ་ཕན་ཆེ་ཤོས་ཡོད། ཅེས་གསུངས། གཞན་ཡང་ཕྱི་ལོ་ ༢༠༡༨ ལོར་ང་ཚོའི་ངོས་ནས་རྒྱལ་སྤྱིའི་ཨོ་ལེམ་ཕིག་རྩེད་འགྲན་ཚོགས་ཆུང་གིས་རྒྱ་ནག་གཞུང་ལ་ཡུ་གུར་མི་རིགས་རང་སྐྱོང་ལྗོངས་ནང་ཡོད་པའི་ཡུ་གུར་དང་། ཀ་སག་མི་རིགས། དེ་བཞིན་ཁ་ཆེ་མི་རིགས་གཞན་སོགས་བཀག་སྐྱིལ་ཁང་དུ་འཇུག་བཞིན་པ་མཚམས་འཇོག་དགོས་པའི་འབོད་སྐུལ་གནང་རོགས་ཞེས་རེ་སྐུལ་ཞུས་་པ་ནས་བཟུང་ཡུ་གུར་མི་རིགས་རང་སྐྱོང་ལྗོངས་ཀྱི་གནས་སྟངས་ཛ་དྲག་ཏུ་གྱུར་ཡོད། ཅེས་འཁོད།

ཕྱི་ལོ་ ༢༠༢༡ ཟླ་ ༧ ཚེས་༢༧ ཉིན་ཨ་རི་གྲོས་ཚོགས་ཀྱི་རྒྱ་ནག་ལས་དོན་ཚོགས་ཆུང་གིས་ཨ་རིར་རྟེན་གཞི་བྱས་པའི་རྒྱལ་སྤྱིའི་ཨོ་ལེམ་ཕིག་རྩེད་འགྲན་ལ་སྦྱིན་བདག་གནང་མཁན་ཁེ་ལས་བཟོ་ཚོང་ཁང་ཁག་གཅིག་དང་ལྷན་དུ་ཕྱི་ལོ་ ༢༠༢༢ ལོའི་དགུན་དུས་ཨོ་རྩེད་འགྲན་ཚོགས་ཀྱི་མཉམ་འབྲེལ་སྦྱིན་བདག་(Corporate Sponsorship of the 2022 Winter Olympics)ཅེས་པའི་བརྗོད་གཞིའི་ཐོག་ཉན་ཞིབ་གནང་གཏན་ཁེལ་ཡོད་པ་བཅས།།