༄༅། །བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༨༦ ལ་ཕེབས་པའི་༸སྐུའི་འཁྲུངས་སྐར་དུས་ཆེན་དེ་བཞིན་ཕྱི་ལོ་ ༢༠༢༡ ཟླ་ ༧ ཚེས་ ༣ ཉིན་སྦེལ་ཇམ་ནང་འདུས་སྡོད་བོད་མི་ཚོས་གཞུང་གི་ཏོག་དབྱིབས་གཉན་རིམས་སྔོན་འགོག་ལམ་སྟོན་ཁག་ལ་བརྩི་སྲུང་ཞུས་པའི་ཐོག་སྦེལ་ཇམ་གྱི་མངལ་སྡེ་ཨེན་ཌ་ཝབ་ (Antwerp ) ནང་སྲུང་བརྩི་གཟབ་རྒྱས་ཞུས་ཡོད།
༸སྐུའི་འཁྲུངས་སྐར་དུས་ཆེན་སྲུང་བརྩིའི་མཛད་སྒོའི་ཐོག་སྐུ་མགྲོན་གཙོ་བོ་སྦེལ་ཇམ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་དང་། སྐུ་ཚབ་དོན་གཅོད་ཁང་གི་ལས་བྱེད་རྣམ་པ། བོད་མིའི་ཚོགས་པ་སྐྱིད་སྡུག་ཁག་གི་འགན་འཛིན་རྣམ་པ། དེ་བཞིན་ས་གནས་མི་མང་ཁག་གཅིག་བཅས་མཉམ་ཞུགས་གནང་ཡོད།
དེ་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེ་བཞུགས་ཁྲིར་གདན་འདྲེན་ཞུས་རྗེས་བོད་རྒྱལ་ཁབ་ཆེན་པོའི་རྒྱལ་གླུ་བཏང་། དེ་རྗེས་སྦེལ་ཇམ་བོད་རིགས་སྤྱི་མཐུན་ཚོགས་པའི་ཚོགས་གཙོ་ཕུར་བུ་དོན་གྲུབ་ལགས་ཀྱིས་མཛད་རིམ་ངོ་སྤྲོད་གནང་གྲུབ་མཚམས་སྐབས་ ༩ པའི་སྦེལ་ཇམ་བོད་རིགས་སྤྱི་མཐུན་ཚོགས་པའི་ཚོགས་མི་གྲངས་ ༡༡ བདམས་པའི་ཁྲོད་ནས་ཚོགས་གཙོ་ཚོགས་གཞོན་གྱི་འོས་ཤོག་འགྲེམས་སྤེལ་ཞུས་གནང་ཡོད། སྦེལ་ཇམ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་བསྐྱེད་དམ་བཅའ་བཞིའི་སྐོར་ངོ་སྤྲོད་དང་། བོད་པ་མི་རེ་ངོ་རེ་ནས་སོ་སོའི་ཉིན་རེའི་འཚོ་བའི་ནང་མགོན་པོ་གང་ཉིད་ཀྱི་ཐུགས་བསྐྱེད་དམ་བཅའ་བཞི་དེ་དག་གང་ཐུབ་ཉམས་ལེན་གནང་དགོས་པ་སོགས་ཀྱི་སྐོར་གསུངས།
གཞན་ཡང་ཁོང་གིས་སྦེལ་ཇམ་ནང་གི་བོད་མི་ཚོས་རྒྱ་གར་གྱི་སྲིད་བློན་མཆོག་གི་ཛ་དྲག་གུད་སྐྱོབ་མ་དངུལ་ (PM-CARES Fund) ཆེད་དུ་ཡུ་སྒོར་ ༡༥༠༠༠ ཞལ་འདེབས་ཕུལ་ཡོད་པའི་སྐོར་དང་། ཉེ་ཆར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་བལ་འབྲུག་གསུམ་ནང་གི་བོད་མིའི་ཏོག་དབྱིབས་གཉན་རིམས་ཀྱི་དཀའ་ངལ་སེལ་སླད་རོགས་རམ་གནང་དགོས་པའི་འབོད་སྐུལ་གནང་བ་ལྟར་སྦེལ་ཇམ་ནང་གི་བོད་མི་ཚོས་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་སུ་ཡུ་སྒོར་ ༡༢༠༠༠ ཞལ་འདེབས་སུ་ཕུལ་ཡོད་པའི་སྐོར་གསུངས།
ཕྱོགས་མཚུངས་སྦེལ་ཇམ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་སྦེལ་ཇམ་ནང་གི་བོད་མི་དང་། སྐབས་ ༨ པའི་སྦེལ་ཇམ་བོད་རིགས་སྤྱི་མཐུན་ཚོགས་པའི་ཚོགས་མི་ཡོངས་ལ་རྗེས་སུ་ཡི་རང་ཞུས་གནང་བ་དང་། དེ་བཞིན་སྦེལ་ཇམ་བོད་རིགས་སྤྱི་མཐུན་ཚོགས་པའི་ཚོགས་མི་གསར་པ་གྲངས་ ༡༡ གི་མ་འོངས་ལས་དོན་རྣམས་ལམ་ལྷོངས་ཡོང་བའི་སྨོན་འདུན་ཞུས་གནང་ཡོད།
སྦེལ་ཇམ་བོད་རིགས་སྤྱི་མཐུན་ཚོགས་པའི་རྩིས་པ་ལྷག་པ་ལགས་ཀྱིས་སྦེལ་ཇམ་བོད་རིགས་སྤྱི་མཐུན་ཚོགས་པའི་རྩིས་ཁྲ་སྒྲོགས་སྦྱང་གནང་རྗེས་སྦེལ་ཇམ་བོད་རིགས་སྤྱི་མཐུན་ཚོགས་པའི་ཚོགས་གཙོ་ཚོགས་གཞོན་གྱི་འོས་བསྡུའི་གྲུབ་འབྲས་གསལ་བསྒྲགས་གནང་སྐབས་དཔལ་ལྡན་ལགས་ཚོགས་གཙོ་དང་རྡོ་རྗེ་ལགས་ཚོགས་གཞོན་དུ་བདམས་ཐོན་བྱུང་ཡོད་པའི་སྐོར་གསུངས།
གསར་དུ་བདམས་ཐོན་བྱུང་བའི་ཚོགས་གཙོ་ཚོགས་གཞོན་གཉིས་ནས་ཚོགས་གཙོ་ཟུར་པ་ཕུར་བུ་དོན་གྲུབ་ལགས་ཀྱི་མདུན་དུ་དམ་འབུལ་ཞུས་གནང་ཡོད། སྦེལ་ཇམ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་སྣེ་ཁྲིད་དེ་ས་གནས་བོད་རིགས་ཚོགས་པ་སྐྱིད་སྡུག་ཁག་གི་སྐུ་ཚབ་རྣམས་ནས་སྦེལ་ཇམ་བོད་རིགས་སྤྱི་མཐུན་ཚོགས་པའི་ཚོགས་མི་གསར་རྙིང་རྣམས་ལ་ཁ་བཏགས་ཕུལ་ཡོད། སྦེལ་ཇམ་བོད་རིགས་སྤྱི་མཐུན་ཚོགས་པའི་ཚོགས་གཞོན་ཟུར་པ་བློ་བཟང་བསྟན་པ་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་ལེགས་པར་གྲོལ་ཡོད་པ་བཅས།།
