༄༅། །སྦིར་སྡེ་དགེའི་བོད་མིའི་གཞིས་ཆགས་ཀྱི་ས་གནས་འགོ་འཛིན་བྱ་རྒོད་ཚང་འཆི་མེད་རྡོ་རྗེ་ལགས་དང་། ཚབ་གསར་ས་གནས་འགོ་འཛིན་ཚེ་རིང་ཕུན་ཚོགས་ལགས་རྣམ་གཉིས་དབར་ལས་འགན་རྩིས་ལེན་རྩིས་སྤྲོད་གནང་ཡོད།
དེ་ཡང་རྩིས་ལེན་རྩིས་སྤྲོད་ཀྱི་ལས་དོན་སླད་སྦིར་ཅོན་ཏ་ར་ནང་ཆེན་བོད་མིའི་གཞིས་ཆགས་ཀྱི་ས་གནས་འགོ་འཛིན་པདྨ་གཡུ་སྒྲོན་ལགས་ཀྱིས་སྤྲོད་དཔང་གནང་བའི་ཐོག་ས་གནས་འགོ་འཛིན་གསར་རྙིང་དབར་ལས་ཁུངས་ཀྱི་ཡིག་སྣོད་སོགས་རྩིས་ལེན་རྩིས་སྤྲོད་གནང་ཡོད། སྐབས་དེར་སྦིར་སྡེ་དགེ་ས་གནས་རང་བདེན་ཚོགས་ཆུང་གི་ཚོགས་གཙོ་པདྨ་དབང་རྒྱལ་ལགས་ཀྱིས་གཙོས་སྦིར་སྡེ་དགེ་ས་གནས་འགོ་འཛིན་ལས་ཁུངས་ཀྱི་འབྲེལ་ཡོད་ལས་བྱེད་བཅས་ཕེབས་ཡོད། ས་གནས་འགོ་འཛིན་ཚེ་རིང་ཕུན་ཚོགས་ལགས་ནི་ས་གནས་བོད་མིས་འོས་འདེམས་གནང་བ་ཞིག་ཡིན་འདུག་པ་བཅས། །
