༄༅། །ཕྱི་ལོ་ ༢༠༢༡ ཟླ་ ༧ ཚེས་ ༦ ཉིན་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་དགུང་གྲངས་བརྒྱད་ཅུ་གྱ་དྲུག་ལ་ཕེབས་པའི་༸སྐུའི་འཁྲུངས་སྐར་དུས་ཆེན་ཐོག་བསྟན་པའི་གསལ་བྱེད་དཔལ་རྒྱལ་བ་༸ཇོ་ནང་པའི་རྒྱལ་ཚབ་རིན་པོ་ཆེ་མཁན་སྤྲུལ་རྡོ་རྗེ་སློབ་དཔོན་༸ངག་དབང་ཆོས་ཀྱི་སྣང་བ་མཆོག་གིས་གསུང་འཕྲིན་གནང་དོན། འཛམ་གླིང་ཞི་བདེའི་དེད་དཔོན་༧གོང་ས་ལྷ་མིའི་རྣམ་འདྲེན་རང་ཅག་ཁ་བ་རི་པའི་སྐྱབས་མགོན་གཅིག་ཆོག རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་གི་སྐུའི་པདྨོ་རྣམ་པར་བཞད་པའི་འཁྲུངས་སྐར་གྱི་དུས་ཚིགས་ཉིན་མོ་ལ་གཞིས་བྱེས་ཇོ་ནང་པ་ཡོངས་ཀྱི་ཚབ་བྱས་ནས་ཐོག་མར་མགོན་པོ་མཆོག་གི་སྐུའི་འཁྲུངས་སྐར་ལ་སྒོ་གསུམ་གུས་པ་ཆེན་པོས་འཚམས་འདྲི་དང་བཀྲ་ཤིས་བདེ་ལེགས་ཞུ་བ་ཡིན།

དེ་དང་ཆབས་ཅིག་རང་རེ་གངས་ཅན་ལྗོངས་ཀྱི་སྟོད་མངའ་རིས་སྐོར་གསུམ། བར་དབུས་གཙང་རུ་བཞི། སྨད་མདོ་ཁམས་སྒང་དྲུག་གི་ཁྱོན་ལ་གནས་པའི་བོད་མི་ཡོངས་ཀྱི་མགོན་དང་སྐྱབས་ཏེ་རྒྱལ་དབང་ཐམས་ཅད་མཁྱེན་པ་ཆགས་ཀྱི་ཡོད་པ་རེད། དེ་ང་རང་ཚོ་བོད་མི་རྩམ་ཟན་ཚང་མས་མཁྱེན་གསལ་ལྟར་རེད། དེ་ལྟ་བུའི་མགོན་དང་དཔུང་གཉེན་དེ་ང་རང་ཚོ་ཡང་ཚེ་འདི་ཕྱིའི་རྩ་བའི་བླ་མ་གཙུག་གི་ནོར་བུ་ཆགས་ཡོད་པ་རེད། དེ་ལྟ་བུའི་སྐྱབས་མགོན་མཆོག་གིས་ང་རང་ཚོ་བོད་གངས་ཅན་ལྗོངས་ཀྱི་ཆོས་སྲིད་གཉིས་ཀྱི་ནང་ནས་ཆབ་སྲིད་ཀྱི་འགན་དབང་ཡོངས་སུ་རྫོགས་པ་མི་མང་ཡོངས་ལ་སྤྲད་ནས་བོད་མིའི་སྒྲིག་འཛུགས་ཚུགས་ཏེ་ལོ་མང་འདས་ཟིན་པ་རེད། དེའི་རིང་ལ་ཁོང་གིས་བཀའ་སློབ་ལམ་སྟོན་རབ་དང་རིམ་པ་བྱས་ནས་ད་ལྟ་བར་དུ་ང་ཚོ་བསྐྱངས་ཡོད་པ་རེད། ཧ་ཅང་གི་ང་རང་ཚོ་དངོས་གནས་མང་གཙོ་ཚད་དང་ལྡན་པ་གང་གི་ནང་ནས་མི་འདྲ་བའི་གཞུང་ཞིག་དང་དབུ་འཛིན་བཀའ་སློབ་གནང་མཁན་གྱི་༧སྐྱབས་མགོན་ཡིད་བཞིན་ནོར་བུ་འདི་ལྟ་བུ་ཞིག་དང་། གཞུང་ཞབས་ལས་བྱེད་རྒན་རབས་རྣམས་ཀྱིས་ལྷག་བསམ་རྣམ་དག་གིས་སྟེང་ནས་བོད་གངས་ཅན་གྱི་ཆོས་སྲིད་གཉིས་ཀྱི་བྱ་བ་བསྒྲུབས་པའི་རིམ་པ་བྱུང་ཡོད། ཡིན་ནའང་དེ་རིང་སང་གི་གནས་སྐབས་དེ་ང་ཚོ་ཚང་མ་ལ་བློ་ཕམ་པའི་གནས་སྐབས་ཤིག་ལ་ཐོན་ཡོད་པ་རེད། འོ་དེ་ལ་སྤྱིར་བཏང་གི་གཞུང་མང་གཉིས་ཆ་དང་ལྷག་པར་ལས་སྣེ་བ་རྣམ་པ་ཆོལ་ཁ་དང་ལུང་ཚན་མི་འདྲ་བ་རེད་མ་གཏོགས་རང་རིགས་ཀྱི་སྤུན་ཟླ་ཤ་ཁྲག་གཅིག་པ། སྐྱིད་སྡུག་གཅིག་པ། བླ་མ་གཅིག་པ་ཆགས་ཡོད་པ་རེད།

ང་ཚོ་ཚང་མས་མཉམ་རུབ་ཀྱི་སྟེང་ནས་བྱ་བ་སྒྲུབ་དགོས་པ་དང་། མཉམ་རུབ་ཀྱིས་སྐྱིད་སྡུག་མཉམ་འཁུར་དགོས་པ། དཔུང་པ་མཉམ་གཤིབ་དགོས་པ་དེ་ང་རང་ཚོ་བོད་མི་རྩམ་ཟན་ཞིག་ཡིན་པ་ནས་བཟུང་སྟེ་ཧ་ཅང་གི་གཙུག་ཏུ་འཛིན་དགོས་པ་དང་དེར་དོ་སྣང་བྱེད་དགོས་རྒྱུ་གལ་ཆེན་པོ་རེད། དེར་བརྟེན་རྐྱེན་ངན་ནམ་བར་ཆད་སོགས་དཀའ་ངལ་དེ་མྱུར་ཏུ་སེལ་བར་རང་གཞན་ཚང་མས་གུ་ཡངས་དང་། སྒམ་དཀྱེལ། བཟོད་བསྲན་སོགས་ནང་ཁུལ་ཆུང་ཙག་རིགས་མ་གཏོགས། དེ་མིན་དཀའ་ངལ་མང་པོ་ཞིག་འཕྲད་དང་འཕྲད་མུས་རེད། དེ་དག་གཅིག་གྱུར་གྱིས་གདོང་ལེན་དང་འབད་འབུངས་གནང་དགོས་སྐོར་དེ་སྔ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་རབ་དང་རིམ་པ་བསྩལ་ཟིན་པ་རེད།

བསླབ་བྱ་ཡང་ནས་ཡང་དུ་གནང་ཟིན་པ་ལྟར་རང་གཞན་ཚང་མས་དཔུང་པ་མཉམ་གཤིབ་ཀྱིས་ཐོག་ནས་ཕྱག་ལས་གནང་དགོས་རྒྱུ་ཧ་ཅང་གལ་ཆེན་པོ་རེད། གུས་པ་བདག་འདྲ་ཡིན་ན་ཤེས་འཇོན་གང་ཡང་ཡོད་པ་མ་རེད། མི་ཐ་མལ་བ་རང་ག་བ་ཞིག་རེད། ཡིན་ནའང་སྐྱིད་སྡུག་ལེགས་ཉེས་གང་ཡིན་ནའང་དགའ་སྡུག་གི་ཚོར་བ་ཧ་ཅང་ཆེན་པོ་ཡོང་གི་ཡོད་པར་བརྟེན་བཤད་འདོད་བྱུང་། ང་རང་ཚོར་ཁྲིམས་དང་སྒྲིག་གཞི་གཏན་ལ་ཕབ་པ་ནང་བཞིན་དེ་ལ་བརྩི་བཀུར་དང་གུས་བཀུར། ཚང་མས་མཉམ་སྒྲིལ་བྱས་ནས་འགྲོ་ཐུབ་རྒྱུ་མུ་མཐུད་ནས་ང་རང་ཚོའི་འདོད་དོན་གྱི་བྱ་བ་དེ་མ་གྲུབ་བར་དུ་གཞུང་མང་གཉིས་མཉམ་རུབ་ཀྱིས་གཞུང་འདི་སྐྱོངས་དགོས་པ་དང་སྤེལ་དགོས་རྒྱུ་ཧ་ཅང་གལ་ཆེན་པོ་རེད་བསམ་གྱི་འདུག

༸གོང་ས་ལྷ་མིའི་རྣམ་འདྲེན་མཆོག་གི་༸སྐུའི་འཁྲུངས་སྐར་དང་སྟབས་བསྟུན་ནས་གུས་པ་བདག་གིས་ཀྱང་ལྷག་བསམ་དང་ཚོར་བའི་དབང་གིས་འདི་ལྟར་ཞུ་འདོད་བྱུང་། ང་ཚོ་ཤ་ཁྲག་གདུང་རྒྱུད་གཅིག་པ་སྤྱི་དང་། བྱེ་བྲག་ཏུ་སྐབས་བབ་ཀྱི་རྩོད་རྙོག་འདི་དང་འབྲེལ་བའི་གཞུང་མང་དང་།ལྷག་པར་ལས་སྣེ་བ་རྣམ་པས་སྔོན་མ་ནས་དཀའ་ལས་བརྒྱབ་མཁན་མང་པོ་ཡོད་པ་རེད། ད་ལྟ་གསར་དུ་ཐོན་ཡོད་པ་མང་པོ་རེད། འོན་ཀྱང་ཚང་མས་སྤྱི་པའི་དོན་དུ་བསམ་བློ་མ་གཏོགས་སྒེར་སོ་སོའི་སྟེང་ནས་དཀའ་ངལ་བྱུང་བ་དང་། འཁོན་ལ་སོགས་པ་དེ་འདྲའི་བསམ་བློ་ཡོད་ཀྱི་མ་རེད། གལ་ཏེ་དེ་འདྲའི་བསམ་བློའི་དབང་དུ་མི་འགྲོ་བ་དང་མི་ཡོང་བ། བྱ་བ་མ་ཡིན་པ། དངོས་གནས་སྤྱིའི་དོན་དུ་བསམ་བློ་བཏང་ནས་སྤྱི་ལ་ཕན་ཐོགས་རྒྱུ་ཧ་ཅང་གལ་ཆེན་པོ་རེད།

རྩོད་རྙོག་འདི་མཐའ་མ་ཡག་པོ་མ་བྱུང་ན། ༸གོང་ས་ལྷ་མིའི་རྣམ་འདྲེན་མཆོག་རང་གཞན་རྣམས་ཀྱི་སྐྱབས་དང་མགོན་ཁོང་གི་ཐུགས་མ་དགྱེས་པ་ཞིག་དང་། ཁོང་ལ་བློ་ཕམ་ཤུགས་ཆེན་པོ་ཡོང་བ་དེ་ཞུ་མ་དགོས་པ་རེད། དེ་ཙམ་མ་ཟད་ང་རང་ཚོ་བོད་གངས་རིའི་ཁྱོན་ལ་གནས་པའི་གཞིས་ལུས་པ་རྣམས་ལ་ཡིན་ནའང་ཚོར་བ་ག་འདྲ་ཞིག་བྱུང་གི་རེད། བློ་ཕམ་ག་འདྲ་ཞིག་ཡོང་གི་རེད། འདི་ཚང་མས་ཤེས་གསལ་ལྟར་རེད། དེ་ལྟ་བུའི་གནད་དོན་འདི་ལ་མགྱོགས་ནས་མྱུར་ཏུ་སེལ་བའི་ཐབས་ལམ་ཞིག་ལ་འབད་རྒྱུར་གུས་པ་བདག་གིས་སྙིང་ཐག་པ་ནས་ཐལ་མོ་སྙིང་ཀར་སྦྱར་ཏེ་རེ་བ་ཞུ་ཡི་ཡོད། དེ་ང་རང་གི་གནས་སྐབས་ཀྱི་རེ་ཞུ་ཙམ་ཡིན། ང་མི་ཆུང་ཆུང་ཞིག་གིས་བསམ་པ་ཆེན་པོའི་ཚུགས་ག་བྱས་ནས་ཚང་མ་ལ་གསོལ་བ་འདེབས་ཀྱིན་ཡོད།

ང་རང་ཚོ་བོད་གངས་ཅན་ལྗོངས་ཀྱི་༸གོང་ས་ལྷ་མིའི་རྣམ་འདྲེན་མཆོག་གི་ཐུགས་བསྐྱེད་དགོངས་པ་དམ་བཅའ་བཞི་ལ་སོགས་པའི་མཛད་པ་འདི་ནི་བསམ་གྱིས་མི་ཁྱབ་པ་ང་རང་ཚོ་བོད་གངས་ཅན་པ་ས་ཡ་དྲུག་གི་དོན་ཙམ་མ་ཟད་འཛམ་གླིང་སྤྱི་ལ་ཕན་ཐོགས་པ་དང་། འཛམ་གླིང་སྤྱིའི་ཞི་བདེ་བརྟན་གནས། མཉམ་འབྲེལ་ལ་སོགས་པ་ལ་ཐུགས་བསམ་བཞེས་ནས་ཕྱག་ལས་གནང་གི་ཡོད་པ་ཞུ་མི་དགོས་པ་ཞིག་རེད། དེ་ལྟ་བུའི་འདོད་དོན་ཐུགས་བཞེད་ལྷུན་གྱིས་འགྲུབ་པ་དང་། ང་རང་ཚོ་ཡིན་ནའང་དབུ་འོག་དཔུང་འདེགས་ཀྱིས་ཞབས་ཕྱི་སྒྲུབ་དགོས་པ་དེ་ང་ཚོ་བོད་མི་སྤྱི་བོ་གནམ་བསྟན་ཚང་མའི་ལས་འགན་ཆགས་ཀྱི་ཡོད།

མདོར་ན་མཉམ་རུབ་ཀྱི་ཐོག་ནས༸གོང་ས་ལྷ་མིའི་རྣམ་འདྲེན་མཆོག་གི་ཐུགས་དགྱེས་པའི་མཆོད་སྤྲིན་དུ་འགྱུར་བའི་བྱ་བ་གཅིག་དང་། གཞུང་གི་སྒྲིག་འཛུགས་ཡིན་ནའང་འཐུས་ཤོར་མི་འགྲོ་བ་ཞིག ༸གོང་ས་ལྷ་མིའི་རྣམ་འདྲེན་མཆོག་གི་ཐུགས་དགྱེས་པའི་མཆོད་སྤྲིན་དུ་འགྱུར་ཐུབ་པ་ལ་ཚང་མར་རེ་བ་རྒྱག་གི་ཡོད། དེ་མ་གཏོགས་ཞུ་ཤེས་ཀྱི་མི་འདུག་ལ་ཞུ་རྒྱུ་མེད། ༸གོང་ས་ལྷ་མིའི་རྣམ་འདྲེན་མཆོག་སྐུ་ཚེ་མི་འགྱུར་རྡོ་རྗེ་ཁམས་སུ་བརྟན་ཅིང་། མཛད་པ་འཕྲིན་ལས་ཉི་ཟླ་ལྟར་གསལ་བ་དང་བོད་ཀྱི་བདེན་མཐའ་མྱུར་དུ་གསལ་ནས་གཞིས་བྱེས་མཉམ་འཛོམས་ཀྱི་ཉི་མ་མྱུར་དུ་ཤར་བའི་སྨོན་ལམ་གྲངས་མེད་དང་བཅས་ཞུ་རྒྱུ་ཡིན། བཀྲ་ཤིས་བདེ་ལེགས། ཕུན་སུམ་ཚོགས་པར་སྨོན། །