༄༅། །ཕྱི་ལོ་ ༢༠༢༡ ཟླ་ ༧ ཚེས་ ༦ ཉིན་སྤྱི་ནོར་ྋགོང་ས་ྋསྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་དགུང་གྲངས་བརྒྱད་ཅུ་གྱ་ལྔར་ཕེབས་པའི་༸སྐུའི་འཁྲུངས་སྐར་དུས་ཆེན་ཐོག་ཞྭ་སེར་བསྟན་པའི་གཙུག་རྒྱན་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་ཐོག་ ༡༠༤ བློ་བཟང་བསྟན་འཛིན་མཆོག་གིས་གནང་བའི་གསུང་འཕྲིན།

འཇམ་དཔལ་རྡོ་རྗེ་ངག་ལ་དབང་འབྱོར་ཞིང། །བློ་གྲོས་བུམ་བཟང་ཡེ་ཤེས་བདུད་རྩིས་གཏམས། །བསྟན་འཛིན་རྒྱ་ཆེན་རོལ་མཚོ་མཛེས་པའི་རྒྱན། །འཕགས་མཆོག་ཕྱག་ན་པདྨོར་གསོལ་བ་འདེབས། །ཞེས་དཔལ་ལྡན་བླ་མ་དམ་པ་༸གོང་ས་༸སྐྱབས་མགོན་༸རྒྱལ་དབང་མཆོག་དང་འཕགས་མཆོག་སྤྱན་རས་གཟིགས་དབང་ཕྱུག་ངོ་བོ་དབྱེར་མེད་དུ་བལྟས་ཏེ་གསོལ་བ་འདེབས་པ་སྔོན་དུ་བཏང་ནས། ད་རིང་འདིར་གང་ཞུ་བར་བྱ་བ་ནི། རང་ཅག་ཁ་བ་རི་པ་རྣམས་ཀྱིས་མེ་ཏོག་གང་ལ་ཕོག་པའི་ལྷ་སྐལ། ས་སྟེང་༸རྒྱལ་བསྟན་ཡོངས་རྫོགས་ཀྱི་མངའ་བདག འཛམ་གླིང་ཞི་བདེའི་དེད་དཔོན་ཆེན་པོ་༸གོང་ས་༸སྐྱབས་མགོན་༸རྒྱལ་དབང་ཐམས་ཅན་མཁྱེན་ཅིང་གཟིགས་པ་ཆེན་པོ་༸རྗེ་བཙུན་འཇམ་དཔལ་ངག་དབང་བློ་བཟང་ཡེ་ཤེས་བསྟན་འཛིན་རྒྱ་མཚོ་སྲིད་གསུམ་དབང་སྒྱུར་མཚུངས་པ་མེད་པའི་སྡེ་དཔལ་བཟང་པོ་མཆོག་བོད་གངས་ཅན་ལྗོངས་སུ་སྐུ་ཡི་མཚན་དཔེེའི་མེ་ཏོག་བཞད་ནས་དགུང་གྲངས་ ༨༦ ལ་ཕེབས་པའི་སྐུའི་འཁྲུངས་སྐར་གྱི་དགའ་སྟོན་རྟེན་འབྲེལ་ལ། དགའ་དད་སྤྲོ་བ་ཆེན་པོའི་ངང་ནས་གུས་བསུ་དང་འཚམས་འདྲིའི་བཀྲིས་བདེ་ལེགས་ཞུ་རྒྱུ་ཡིན།

ཀུན་གྱི་མཁྱེན་གསལ་ལྟར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནི་སྐྱེ་འགྲོ་སེམས་ཅན་སྤྱི་དང་། ལྷག་པར་བོད་གངས་ཅན་པ་ལ་ཆོས་དང་ཆབ་སྲིད་གང་ཅིའི་ཆ་ནས་བཀའ་དྲིན་ཧ་ཅང་ཆེན་པོ་བསྐྱངས་དང་སྐྱོང་བཞིན་པ་ཡིན་པས་དུས་དང་རྣམ་པ་ཀུན་ཏུ་ཁོང་གི་བཀའ་དྲིན་རྗེས་སུ་དྲན་པའི་སྒོ་ནས་ལག་བསྟར་གང་དང་གང་གནང་དགོས་ཤེ་ན། ༸རྒྱལ་དབང་མཆོག་གི་ཐུགས་ཀྱི་བཞེད་དགོངས་གཙོ་བོར་ཐུགས་བསྐྱེད་དམ་བཅའ་བཞི་ཡོད་པ་དེ་དག་ལ་ང་རང་ཚོའི་ངོས་ནས་གང་ཐུབ་ཐུབ་བསྒྲུབ་དགོས་པ་དེ་འཁྲུངས་སྐར་སྲུང་བརྩི་གཙོ་བོ་དེ་ཡིན་པ་དང་།  དེའི་ནང་ནས་ཀྱང་འཛམ་གླིང་ཡོངས་ཀྱི་ཆོས་ལུགས་སྤྱིའི་མཐུན་འབྲེལ་དང་།  བྱེ་བྲག་བོད་གངས་ཅན་ལྗོངས་སུ་དར་བའི་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་དང་བཅས་པ་ནི། རང་རེའི་ཐུན་མོང་མ་ཡིན་པའི་ཁྱད་ཆོས་ལྡན་པའི་ཆོས་དང་རིག་གཞུང་དེང་འཛམ་གླིང་ནང་ངོམས་སུ་ཆོག་པ་འདི་ཉིད་ཡིན་སྟབས། དེ་དག་འཛིན་སྐྱོང་སྤེལ་གསུམ་བྱེད་པ་ནི་༸རྒྱལ་དབང་དགྱེས་པའི་མཆོད་སྤྲིན་ཡིན་པས་ཚང་མས་ཧུར་ཐག་གནང་དགོས་པ་ཧ་ཅང་གལ་ཆེན་པོ་ཡིན་པས་ཐུགས་ལ་འཇགས་པ་གནང་རོགས་ཞུ།

དེ་བཞིན་ང་ཚོ་ཚང་མ་བོད་ཅེས་པའི་ཚིག་གཅིག་གི་འོག་ནས་ཕྱི་ལོ་ ༡༩༥༩ ལོར་བོད་ནས་བཙན་བྱོལ་དུ་ཡོང་བ་རེད་ལ། གདོད་མའི་ལོ་རྒྱུས་ཀྱི་ཐོག་ནས་ཀྱང་ཕ་སྤྲེལ་རྒན་བྱང་ཆུབ་སེམས་དཔའ་དང་མ་བྲག་སྲིན་མོ་ལས་བྱུང་བའི་ཕ་གཅིག་མ་གཅིག་གི་བོད་རིགས་སྤུན་ཟླ་ཞེས་ཡོངས་སུ་གྲགས་པ་ལྟར། ད་ལྟ་ང་ཚོ་དུས་ཚོད་གཉེན་འཕྲང་ཅན་ཞིག་གི་སྒང་ལ་ཡོད་སྟབས། ཚང་མས་འཆམ་མཐུན་དང་གོང་བུའི་ནུས་པ་གཅིག་ཏུ་བསྒྲིལ་ནས་བོད་ཀྱི་རྩ་དོན་ཐོག་ཤུགས་རྒྱག་དགོས་པ་དེ་ཧ་ཅང་གི་གལ་ཆེན་པོ་འདུག་ལ། ༸རྒྱལ་བའི་འཁྲུངས་སྐར་སྲུང་བརྩི་ངོ་མ་དེ་ཡང་ཡིན་དུས་དོན་ཆེན་འདི་ཚོ་ཚང་མས་ཐུགས་ལ་བཅངས་ནས་ཕྱག་ལེན་ལ་འཁེལ་བ་གནང་རོགས་ཞེས། ད་ལན་གྱི་གོ་སྐབས་འདི་བརྒྱུད་ནས་ནན་ཏན་ཆེན་པོས་འབོད་སྐུལ་ཞུ་གི་ཡིན། སྔར་ཆོས་རྒྱལ་ཚོའི་སྐབས་ལའང་གོང་བུའི་ནུས་པ་ལ་བརྟེན་ནས་སྟོབས་ཤུགས་ཆེན་པོ་བྱུང་བ་དེ་འདྲ་རེད།
མཐའ་དོན་༸སྐྱབས་མགོན་༸རྒྱལ་བའི་དབང་པོ་མཆོག་གིས་དབུས་རིས་སུ་མ་ཆད་པའི་བསྟན་འཛིན་གྱི་སྐྱེས་བུ་དམ་པ་རྣམས་སྐུ་ཚེ་ཞབས་པད་བརྟན་ཅིང་མཛད་འཕྲིན་རྒྱས་པ་དང་། རླབས་ཆེན་གྱི་མི་རིགས་ཡིན་པའི་བོད་པ་རྣམས་ཕན་ཚུན་ཕ་མ་གཅིག་གི་ཕུ་ནུའི་འདུ་ཤེས་བཟང་པོའི་རྒྱ་ལས་མ་འདས་པར་ཆོལ་གསུམ་གོང་བུའི་ནུས་པ་གཅིག་ཏུ་བསྒྲིལ་ནས་བོད་དོན་བདེན་མཐའ་མྱུར་དུ་གསལ་བའི་སྨོན་འདུན་ཞུ།  བཀྲིས་བདེ་ལེགས། །