༄༅། །ཕྱི་ལོ་ ༢༠༢༡ ཟླ་ ༧ ཚེས་ ༦ ཉིན་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་དགུང་གྲངས་བརྒྱད་ཅུ་གྱ་དྲུག་ལ་ཕེབས་པའི་༸སྐུའི་འཁྲུངས་སྐར་དུས་ཆེན་ཐོག་དཔལ་ས་སྐྱ་༸གོང་མ་ཁྲི་འཛིན་རིན་པོ་ཆེ་མཆོག་གིས་གསུང་འཕྲིན་གནང་དོན།
ལྷར་བཅས་སྲིད་ཞིའི་གཙུག་རྒྱན། ༧གོང་ས་ལྷ་མིའི་རྣམ་འདྲེན། ༸རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་གི་ཞབས་ཀྱི་པད་མོར་སྒོ་གསུམ་གུས་ཕྱག་སྔོན་དུ་ཕུལ་བའི་ཐོག་ནས། ད་རེས་སྤྱི་ནོར་༧གོང་ས་༸སྐྱབས་མགོན་ཆེན་པོ་མཆོག་གི་ངོ་མཚར་མཚན་དཔེའི་གཟུགས་སྐུ་གསར་དུ་བཞད་ནས་དགུང་གྲངས་ ༨༦ ཧྲིལ་པོར་འཁོར་བའི་དུས་བཟང་ཁྱད་པར་ཅན་གྱི་དགའ་སྟོན་འདིའི་ཐོག་ངས་དཔལ་ལྡན་ས་སྐྱ་པའི་ཆོས་བརྒྱུད་ཡོངས་ཀྱི་ཚབ་ཞུས་ཏེ་དད་གུས་ཆེན་པོའི་མཚོ་ལས་སྐྱེས་པའི་བཀྲ་ཤིས་སྨོན་ཚིག་གི་མེ་ཏོག་མངོན་པར་འཐོར་བ་དང་ལྷན་ཅིག་མགོན་པོ་མཆོག་བསྟན་འགྲོའི་དོན་དུ་སྐུ་ཚེ་ཞབས་པད་བསྐལ་བརྒྱར་བརྟན་ཅིང་ཐུགས་བཞེད་མཐའ་དག་ལྷུན་གྱིས་གྲུབ་པའི་གསོལ་བ་སྨོན་ལམ་རྩེ་གཅིག་ཏུ་འདེབས་པ་དང་ཆབས་ཅིག་དྲྭ་ལམ་བརྒྱུད་གསན་གཟིགས་གནང་མཁན་ཡོངས་ལ་མཛའ་བརྩེའི་མཚམས་འདྲི་དང་འབྲེལ་བའི་ཐོག་ནས་བཀྲ་ཤིས་བདེ་ལེགས་ཞུ་གྱི་ཡོད།
དཔལ་ལྡན་བོད་མིའི་སྒྲིགས་འཛུགས་ཀྱི་ཕྱི་དྲིལ་ལས་ཁུངས་ནས་རེ་སྐུལ་གནང་བ་བཞིན་ངས་ཚིག་ཁ་ཤས་ཤིག་ཞུ་རྒྱུར། སྤྱིར་བཏང་ཚང་མའི་མཁྱེན་གསལ་ལྟར། འཕགས་མཆོག་སྤྱན་རས་གཟིགས་ཀྱི་རྣམ་སྤྲུལ་བོད་གངས་ཅན་གྱི་ལྗོངས་སུ་རླབས་ཆེན་གྱི་མཛད་འཕྲིན་མཐའ་ཡས་པ་ཞིག་བསྐྱངས་གནང་ཡོད་པ་རེད། དེ་བཞིན་༸རྒྱལ་དབང་སྐུ་ཕྲེང་རིམ་བྱོན་གྱིས་རྣམ་པ་རོལ་པའི་ཐོག་ནས་རླབས་ཆེན་གྱི་མཛད་འཕྲིན་བསྐྱང་གནང་ཡོད། དེའི་ནང་ནས་རྒྱལ་མཆོག་༸སྐུ་ཕྲེང་བཅུ་བཞི་པ་ཆེན་པོ་མཆོག་གི་མཛད་པ་རྣམ་ཐར་བསམ་གྱིས་མི་ཁྱབ་པ་ཡོད། ཆ་ཤས་ཙམ་ཞུ་ཚེ། ༸རྒྱལ་དབང་སྐུ་ཕྲེང་བཅུ་བཞི་པ་ཆེན་པ་ོམཆོག་གིས་དུས་རྟག་ཏུ་སེམས་ཅན་ཐམས་ཅད་ལ་ཉེ་རིང་མེད་པའི་བྱམས་པ་དང་བརྩེ་བ་འདི་ཀུན་ནས་བླངས་པའི་བྱང་ཆུབ་ཀྱི་སེམས་ཉམས་བཞེས་མཛད་པ་ལ་བརྟེན་ནས་ང་རང་ཚོ་ནང་པའི་ཆོས་བརྒྱུད་འཛིན་པ་ཙམ་མ་ཡིན་པར་འཛམ་གླིང་སྐྱེ་འགྲོ་ཡོངས་ལ་ཕན་བདེ་བསྐྲུན་རྒྱུའི་དགོངས་བཞེད་རླབས་པོ་ཆེ་བཞེས་པའི་སྒོ་ནས་འགྲོ་བ་མིའི་རིགས་ཀྱི་རིན་ཐང་གོང་མཐོར་སྤེལ་རྒྱུའི་མཚོན་པའི་ཐུགས་བསྐྱེད་མཛད་ཡོད།
འཛམ་བུ་གླིང་གི་ཆོས་ལུགས་ནང་ཕན་ཚུན་མཐུན་སྒྲིལ་ཡོང་རྒྱུ་དང་བོད་ཀྱི་ཆོས་དང་རིག་གཞུང་འཛིན་སྐྱོང་། དཔལ་ནཱ་ལེནྲའི་ཆོས་བརྒྱུད་ཀྱི་རྒྱུན་མི་ཉམས་རྒྱུན་འཛིན་གྱི་ཐུགས་བསྐྱེད་དམ་བཅའ་བཞི་ལ་བརྟེན་ནས་ང་རང་ཚོ་ཚང་མར་གནས་སྐབས་དང་མཐར་ཐུག་གི་ཕན་བདེ་སྒྲུབ་པའི་མཛད་པ་རླབས་ཆེན་པོ་བསྐྱངས་གནང་ཡོད།
མདོར་ན་དེ་དང་དེའི་མཚོན་པའི་རླབས་ཆེན་གྱི་མཛད་པ་མཐའ་དག་ང་ཚོའི་བསམ་ཡུལ་ལས་འདས་པ་ཞིག་ཡིན་སྟབས། ང་རང་ཚོའི་ངོས་ནས་བཀའ་དྲིན་ཞལ་མི་ཐུབ་པའི་བཀའ་དྲིན་ཆེན་པོ་ཞིག་བསྐྱངས་གནང་ཡོད། ཡིན་ནའང་བཀའ་དྲིན་གྱི་ཆ་ཤས་ཕྲ་མོ་ཙམ་ཞལ་བའི་ཆེད་ང་ཚོ་ངོས་ནས་༸རྒྱལ་བ་རིན་པོ་ཆེ་མཆོག་གི་ཞལ་ནས་གསུངས་པ་ལྟར། ཕྱག་རྟགས་ཡག་ཤོས་འདི་ནི་སེམས་པ་བཟང་པོ་བྱེད་རྒྱུ་ཡིན། དམིགས་བསལ་ནང་པ་སངས་རྒྱས་པ་ཚོ་ལ་བྱང་ཆུབ་ཀྱི་སེམས་ཉམས་ལེན་བྱེད་རྒྱུ་སོགས། དེའི་ཐོག་ནས་སྤྱོད་པ་བཟང་པོ་བྱེད་རྒྱུ་ཙམ་དུ་མ་ཟད། ང་ཚོའི་ངོས་ནས་ཉིན་ལྟར་༸རྒྱལ་བ་རིན་པོ་ཆེ་མཆོག་གི་ཞབས་བརྟན་རྒྱས་བསྡུས་གང་རུང་མ་ཆད་པའི་ཐོག་ནས་འདོན་རྒྱུ་གལ་ཆེན་པོ་ཡིན་པ་དང་། ང་རང་ཡང་ཞབས་བརྟན་མ་ཆད་པར་ཉིན་ལྟར་འདོན་གྱི་ཡོད། ཐམས་ཅད་ཀྱིས་ཉིན་ལྟར་ཞབས་བརྟན་གསུང་ཐུབ་ཚེ་ཉིན་མ་རེ་རེ་བཞིན་ཞབས་བརྟེན་འབུམ་ཐེར་མང་པོའི་ཕན་རླབས་ལ་བརྟེན་ནས་༸རྒྱལ་བ་རིན་པོ་ཆེ་སྐུ་ཚེ་ཞབས་པད་བསྐལ་བརྒྱར་བརྟན་པ་དང་ཐུགས་བཞེད་མཐའ་དག་ལྷུན་གྱིས་གྲུབ་ཐུབ་རྒྱུའི་སྨོན་ལམ་དང་ཡིད་ཆེས། རེ་བ་ཞུ་གི་ཡོད། ཐུགས་རྗེ་ཆེ། །
