༄༅། །ཕྱི་ལོ་ ༢༠༢༡ ཟླ་ ༧ ཚེས་ ༦ ཉིན་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་དགུང་གྲངས་བརྒྱད་ཅུ་གྱ་དྲུག་ལ་ཕེབས་པའི་༸སྐུའི་འཁྲུངས་སྐར་དུས་ཆེན་ཐོག་སྒྲུབ་བརྒྱུད་བསྟན་པའི་གསལ་བྱེད་༧དཔལ་རྒྱལ་བ་ཀརྨ་པ་སྐུ་ཕྲེང་བཅུ་བདུན་པ་ཨོ་རྒྱན་འཕྲིན་ལས་རྡོ་རྗེ་མཆོག་གིས་གནང་བའི་གསུང་འཕྲིན་ནང་འཁོད་དོན། འཇིག་རྟེན་ཞི་བདེའི་དེད་དཔོན། བོད་ཁ་བ་གངས་ཅན་པའི་མགོན་དང་སྐྱབས་གནས་གཅིག་པུ་༧གོང་ས་༧སྐྱབས་མགོན་རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་དགུང་གྲངས་བརྒྱད་ཅུ་གྱ་དྲུག་ལ་ཕེབས་པའི་༧སྐུའི་འཁྲུངས་སྐར་དུས་སྟོན་ལ་ལྷ་ཕྱག་གྲངས་མེད་སྔོན་དུ་བཏང་ནས་འཚམས་འདྲིའི་བཀྲ་ཤིས་བདེ་ལེགས་གྲངས་མེད་ཞུ་བ་དང་ཆབས་ཅིག་ཏུ། མགོན་པོ་གང་གི་མཁའ་ཁྱབ་བསྟན་འགྲོའི་དོན་དུ་ཐུགས་ཀྱི་བཞེད་དགོངས་ཇི་ཡོད་པ་ཐམས་ཅད་འབད་མེད་ལྷན་གྱིས་གྲུབ་པ་དང་། བསྟན་པ་དང་འགྲོ་བའི་དོན་དུ་སྐུ་ཚེ་ཞབས་པད་བསྐལ་བརྒྱར་བརྟན་ནས་མཛད་འཕྲིན་ཕྱོགས་ཐམས་ཅད་དུ་རྒྱས་པའི་སྨོན་འདུན་ཤུགས་དྲག་ཞུ་རྒྱུ་ཡིན།
དེ་དང་ཆབས་ཅིག་ཏུ། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ཐུགས་བཞེད་གཙོ་བོ་དེ་ང་རང་ཚོ་བོད་གངས་ཅན་ལྗོངས་ཀྱི་སྐྱབས་འགྲོ་ཐམས་ཅད་ཆོལ་ཁ་དང་ཆོས་ལུགས་ཀྱི་དབྱེ་བ་མེད་པར་ཚང་མས་རྡོག་རྩ་གཅིག་སྒྲིལ་གྱི་ཐོག་ནས་བོད་གངས་ཅན་ལྗོངས་ཀྱི་ཕྱི་ནང་གི་སྣོད་བཅུད་དང་བཅས་པའི་ཕན་བདེའི་དོན་དུ་འབད་དགོས་པ་དེ་ཐུགས་བཞེད་གཙོ་བོ་ཆགས་ཡོད།
དེར་བརྟེན་ཚང་མས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་བཀའ་དྲིན་སྙིང་བཅངས་ཐོག་ཚང་མ་མཐུན་སྒྲིལ་རྡོག་རྩ་གཅིག་སྒྲིལ་དང་། ༧སྐྱབས་མགོན་རིན་པོ་ཆེའི་དགོངས་བཞེད་ག་རེ་ཡོད་པ་ཚང་མ་ང་ཚོ་ཚང་མས་དཔུང་པ་མཉམ་གཤིབས་ཀྱི་ཐོག་ནས་བསྒྲུབ་རྒྱུའི་ཆོད་སེམས་བརྟན་པོ་ཡོད་དགོས་པ་དེ་གལ་ཆེན་པོ་རེད་ཅེས་འབོད་སྐུལ་ཞུ་འདོད་བྱུང་།
མཐའ་དོན་ཡང་བསྐྱར་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་སྐུ་ཚེ་ཞབས་པད་བརྟན་རྒྱུ་དེ་འཛམ་གླིང་སྤྱི་དང་། ཡང་སྒོས་སུ་ང་ཚོ་བོད་གངས་ཅན་པའི་ཕན་བདེའི་སྲོག་རྩ་ལྟ་བུ་ཆགས་ཡོད། རྒྱུ་མཚན་དེ་ལ་བརྟེན་ནས་ང་ཚོ་བོད་མི་མགོ་ནག་ཐམས་ཅད་ཀྱིས་མགྲིན་གཅིག་པའི་སྒོ་ནས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་བསྐལ་པ་ཇི་སྲིད་ཀྱི་བར་དུ་བརྟན་ཅིང་བཞུགས་པའི་གསོལ་འདེབས་ཞུ་རྒྱུ་ཡིན། ཐུགས་རྗེ་ཆེ།།
