༄༅། །བོད་མིའི་སྒྲིག་འཛུགས་ནས་ཕྱི་ལོ་ ༢༠༢༠ ཟླ་ ༧ ཚེས་ ༡ ནས་ ༢༠༢༡ ཟླ་ ༦ ཚེས་ ༣༠ བར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་གི་བཀའ་དྲིན་རྗེས་དྲན་གྱི་ལོར་སྲུང་བརྩི་ཞུས་པའི་ལས་རིམ་གྱི་ཆ་ཤས་སུ།  སུད་སི་དང་ལིག་ཏེན་སིཊཡན་ཁུལ་གྱི་བོད་མི་ཡོངས་ནས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བཀའ་དྲིན་རྗེས་དྲན་མཚོན་བྱེད་དུ་གསེར་ཚོན་བཏང་བའི་མགོན་པོ་གང་ཉིད་ཀྱི་སྐུ་བརྙན་ཞིག་ཕུལ་ཡོད།དེ་ཡང་འདི་ལོའི་ཕྱི་ཟླ་ ༧ ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༦ ལ་ཕེབས་པའི་༸སྐུའི་འཁྲུངས་སྐར་དུས་ཆེན་ཁྱད་པར་ཅན་དང་བསྟུན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་ཁ་བ་གངས་ཅན་དང་། ལྷག་པར་བོད་མིའི་འཕྲལ་ཕུགས་ཀྱི་བདེ་རྩར་ཐུགས་ཁུར་ཆེ་བཞེས་ཀྱིས་མཛད་འཕྲིན་བསྐྱངས་དང་སྐྱོང་བཞིན་པ་དང་། དེ་བཞིན་འགྲོ་བ་མི་སྤྱིའི་ཁེ་ཕན་སླད་ཀུན་ཁྱབ་འགན་ཁུར་དང་། འཛམ་གླིང་ཞི་བདེ། བྱམས་སྙིང་རྗེ་བཅས་གོང་མཐོར་གཏོང་རྒྱུའི་ཐོག་སྐུ་ངལ་འཛེམས་མེད་ཀྱིས་མཛད་པ་བསྐྱངས་དང་སྐྱོང་བཞིན་པར་ས་གནས་བོད་མིས་མགོན་པོ་གང་ཉིད་ལ་བཀའ་དྲིན་རྗེས་དྲན་གྱི་སྐུ་བརྙན་ཞིག་ཕུལ་ཡོད།

དེ་བཞིན་མགོན་པོ་གང་ཉིད་ཀྱིས་ཐུགས་བསྐྱེད་དམ་བཅའ་བཞི་སྟེ་འགྲོ་བ་མིའི་རྒྱུད་ཀྱི་བཟང་སྤྱོད་དང་། ཆོས་ལུགས་མཐུན་སྒྲིལ། བོད་ཀྱི་ཆོས་རིག་འཛིན་སྐྱོང་སྤེལ་གསུམ། རྒྱ་གར་གྱི་དཔལ་ནཱ་ལེནྡྲའི་གནའ་བོའི་རིག་གཞུང་བཅས་གོང་མཐོར་མཛད་བཞིན་པ་སོགས་ཀྱི་བཀའ་དྲིན་རྗེས་དྲན་མཚོན་བྱེད་དུ་སུད་སི་དང་ལིག་ཏེན་སིཊཡན་ཁུལ་གྱི་བོད་མིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་༸རྒྱལ་བའི་སྐུ་བརྙན་ཞིག་ཕུལ་ཏེ་མགོན་པོ་གང་ཉིད་སྐུ་ཚེ་ཞབས་པད་བསྐལ་བརྒྱར་བརྟན་པ་དང་ཐུགས་ཀྱི་བཞེད་དགོངས་མཐའ་དག་ལྷུན་གྱིས་འགྲུབ་པའི་གསོལ་འདེབས་ཞུས་ཡོད་པ་བཅས། །