༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༦ ལ་ཕེབས་པའི་ྋསྐུའི་འཁྲུངས་སྐར་གྱི་དུས་ཆེན་ཉིན་ཤིས་ལོངས་ས་གནས་འགོ་འཛིན་པདྨ་དོན་གྲུབ་ལགས་ཀྱིས་མེ་གྷ་ལ་ཡ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ཀོན་རཌ་སང་མ་ (Shri Conrad K Sangma) མཆོག་དང་མཇལ་འཕྲད་ཀྱིས་༧སྐུའི་འཁྲུངས་སྐར་དུས་ཆེན་སྲུང་བརྩི་ཞུས་ཡོད། དེ་ཡང་རྒྱ་གར་གཞུང་མང་གཉིས་ནས་བོད་མིར་གནས་ཚང་གཡར་བ་དང་བོད་དོན་སླད་རྒྱབ་སྐྱོར་གནང་བར་བཀའ་དྲིན་རྗེས་དྲན་ཞུ་སླད་ཤིས་ལོངས་ས་གནས་འགོ་འཛིན་པདྨ་དོན་གྲུབ་ལགས་ཀྱིས་མེ་གྷ་ལ་ཡ་མངའ་སྡེའི་སྤྱི་ཁྱབ་བློན་ཆེན་ཀོན་རཌ་སང་མ་མཆོག་ལ་ཁ་བཏགས་དང་དྲན་རྟེན་ལེགས་སྐྱེས་ཕུལ་ཏེ་ཐུགས་རྗེ་ཆེ་ཞུས་གནང་ཡོད། དེ་བཞིན་ས་གནས་འགོ་འཛིན་པདྨ་དོན་གྲུབ་ལགས་ཀྱིས་ས་གནས་རྫོང་དཔོན་གཞོན་པ་ཨི་ས་ཝན་ཌ་ལ་ལོ་ (Ms Isawanda Laloo) ལགས་དང་། ཉེན་རྟོག་པ་སྤྱི་ཁྱབ་ (Superintendent of Police Shri Sylvester Nongtnger) ལགས། ས་གནས་གྲོང་ཁྱེར་ཉེན་རྟོགས་པ་སྤྱི་ཁྱབ་ (Shri Vivek Syiem) ལགས། ཕྱི་མི་དེབ་སྐྱེལ་ལས་ཁུངས་ཀྱི་ཉེན་རྟོག་པ་སྤྱི་ཁྱབ་ (DySP Shri T.D Myrboh) ལགས་བཅས་དང་མཇལ་འཕྲད་ཀྱིས་དྲན་རྟེན་ལེགས་སྐྱེས་ཕུལ་ཏེ་༧སྐུའི་འཁྲུངས་སྐར་སྲུང་བརྩི་ཞུས་ཡོད། ཤིས་ལོངས་ས་གནས་འགོ་འཛིན་པདྨ་དོན་གྲུབ་ལགས་དང་ལྷན་ལས་དྲུང་བསྟན་འཛིན་དབྱངས་ཅན་ལགས་ཕེབས་ཡོད་པ་བཅས།།