༄༅། །ཕྱི་ལོ་ ༢༠༢༡ ཟླ་ ༧ ཚེས་ ༩ ཉིན་ལྷོ་ཨ་ཕི་རི་ཀའི་མང་གཙོ་མནའ་འབྲེལ་ཚོགས་པའི་གྲོས་ཚོགས་ཤོག་ཁག་འགན་འཛིན་ལྕམ་སྐུ་ན་ཏཱ་ཤཱ་མཱ་ཛོན་ (Mrs.Natasha Mazzone) མཆོག་གིས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དགུང་གྲངས་གྱ་དྲུག་ལ་ཕེབས་པའི་༧སྐུའི་འཁྲུངས་སྐར་ལ་འཚམས་འདྲིའི་གསུང་འཕྲིན་ཞིག་ཕུལ་བའི་ནང་འཁོད་དོན། ངས་༧སྐུའི་འཁྲུངས་སྐར་དུས་ཆེན་གྱི་གོ་སྐབས་འདི་བརྒྱུད་མགོན་པོ་གང་ཉིད་ཧ་ཅང་འཕྲོད་བཞེས་བཟང་པོ་དང་སྤྲོ་སྣང་ཡོང་བའི་སྨོན་འདུན་ཞུ་བ་དང་ཆབས་ཅིག་ཏུ། ང་ཚོས་༧གོང་ས་མཆོག་དང་ལྷན་༧སྐུའི་འཁྲུངས་སྐར་དུས་ཆེན་སྲུང་བརྩི་གང་མང་ཞུ་ཐུབ་པའི་སྨོན་ལམ་འདེབས་རྒྱུ་ཡིན།

ངས་ང་ཚོའི་ཆབ་སྲིད་ཚོགས་པའི་ཚབ་ཞུས་ཏེ་དམིགས་བསལ་༧སྐུའི་འཁྲུངས་སྐར་དུས་ཆེན་ཉིན་༧གོང་ས་མཆོག་ལ་དགའ་ཚོར་ཆེན་པོའི་སྒོའི་ནས་འཚམས་འདྲི་ཞུ་རྒྱུ་ཡིན། ཞེས་འཁོད་ཡོད།།