༄༅། །ལ་སྤྱི་ལས་ཁུངས་ནས་རེ་སྐུལ་ཞུས་དོན་ལྟར། ཕྱི་ལོ་ ༢༠༢༡ ཟླ་ ༧ ཚེས་ ༩ ཉིན་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱི་སྡེ་དཔོན་སྐུ་ཞབས་བཀྲ་ཤིས་རྒྱལ་མཚན་ལགས་ཀྱིས་ལ་དྭགས་བསོད་ནམས་གླིང་བོད་མིའི་གཞིས་ཆགས་དང་། ཁྱབ་ཁོངས་དགོན་སྡེ་ཁག་གསུམ། ལ་སྤྱི་ལས་ཁུངས། ས་གནས་འཕྲོད་བསྟེན་ཡན་ལག་སྨན་ཁང་། མཉམ་འབྲེལ་སོགས་སུ་འཚམས་གཟིགས་གནང་ཡོད་པ་མ་ཟད། མི་མང་གི་བསྡེ་སྡུག་དཀའ་ངལ་ཁག་ལ་ཐུགས་ཞིབ་དང་འབྲེལ་དཀའ་ངལ་ཁག་སེལ་རྒྱུའི་ཁས་ལེན་ཡང་གནང་ཡོད། སྐབས་དེར་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱི་སྡེ་དཔོན་སྐུ་ཞབས་བཀྲ་ཤིས་རྒྱལ་མཚན་ལགས་དང་ལྷན་དུ་ལྷན་ཁང་ཁག་བཞིའི་ཚོགས་མི་དང་། ཁྲལ་བསྡུ་ལས་ཁུངས་ཀྱི་སྤྱི་ཁྱབ་པའི་ཕྱག་རོགས་བཅས་ཕེབས་ཡོད། འཚམས་གཟིགས་གྲུབ་མཚམས་ལ་སྤྱི་ལས་ཁུངས་ནས་གུང་ཚིགས་འདེགས་འབུལ་ཞུས་ཡོད་པ་བཅས། །