༄༅། །ཕྱི་ལོ་ ༢༠༢༡ ཟླ་ ༦ ཚེས་ ༢༩ རེས་གཟའ་མིག་དམར་ཉིན་ཨ་རིའི་ནིའུ་ཡོག་ཏུ་ཡོད་པའི་པེ་ཅིང་དཔྱིད་ཀའི་དུས་དེབ་དང་རྒྱ་ནག་མང་གཙོ་ཚོགས་པ། རྒྱ་ནག་མང་གཙོ་མཉམ་འབྲེལ་ལྷན་ཚོགས་བཅས་ཟུང་སྦྲེལ་ཐོག་རྒྱ་ནག་དམར་ཤོག་གཞུང་བཙུགས་ནས་ལོ་བརྒྱ་འཁོར་བའི་དུས་ཡུན་རིང་རྒྱ་ནག་དམར་ཤོག་གཞུང་གིས་རྒྱལ་ཁབ་གཏོར་སྐྱོན་དང་། མི་རིགས་ལ་གནོད་འཚེ་ཇི་ལྟར་བཏང་བ་སོགས་ཀྱི་ཐད་བགྲོ་གླེང་གོ་སྒྲིག་གནང་ཡོད། མགྲོན་འབོད་གནང་བ་ལྟར་ཨ་རི་དོན་ཁང་གི་རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་མཉམ་ཞུགས་གནང་ཡོད། 

དེ་ཡང་ཚོགས་འདུའི་སྟེང་རྒྱ་རིགས་མང་གཙོ་དོན་གཉེར་བ་དང་ཤེས་ཡོན་པ་བཅས་མི་གྲངས་སུམ་ཅུ་ལྷག་མཉམ་ཞུགས་གནང་ཡོད་པ་དང་། ཁོང་ཚོས་རང་གི་ཉམས་མྱོང་དང་ཞིབ་འཇུག་སོགས་ཀྱི་ཐོག་ནས་རྒྱ་ནག་དམར་ཤོག་གཞུང་གིས་འདས་པའི་ལོ་བརྒྱའི་ནང་མིའི་རིགས་ལ་གནོད་འཚེ་དང་གཏོར་སྐྱོན་ཇི་ལྟར་བཏང་བའི་སྐོར་བགྲོ་གླེང་དང་གསུང་བཤད་གནང་ཡོད།གསུང་བཤད་ཀྱི་ལས་རིམ་སྐབས་པེ་ཅིང་དཔྱིད་ཀའི་དུས་དེབ་རྩོམ་སྒྲིག་པ་གྲགས་ཅན་སྐུ་ཞབས་ཧུ་ཕིང་ལགས་ཀྱིས་རྒྱ་ནག་དམར་ཤོག་གཞུང་ནི་ལོ་རྒྱུས་རྫུན་བཟོ་དང་འཁྱོག་བཤད་བྱེད་མཁན་གཙོ་བོ་དེ་ཡིན་པ་དང་། རྒྱ་ནག་བསྒྱུར་བཅོས་སྒོ་མོ་ཕྱེ་ནས་མི་མང་ལ་གུ་ཡངས་དང་ཡར་རྒྱས་ཀྱི་གནས་བབ་གང་ཙམ་བྱུང་ཡོད་ཀྱང་སྔར་ས་ཞིང་བཅོས་བསྒྱུར་སྐབས་ཀྱི་སྲིད་བྱུས་ཕམ་ཉེས་ཅན་གྱི་དུས་ཚོད་ལ་སླར་ཡང་ཕྱིར་ལོག་ལྟ་བུ་བྱེད་བཞིན་ཡོད་སྐོར་གསུངས། 

དེ་རྗེས་དྲུག་བཞིའི་སློབ་ཕྲུག་གི་དྲག་གནོན་བརྒྱུད་མྱོང་བ་དང་། བོད་ཀྱི་གླུ་གཞས་དང་ཞབས་བྲོ་སོགས་ལ་དགའ་མོས་བྱེད་མཁན་ལྕམ་སྐུ་ལུའི་ཅིན་ཧྭ་ལགས་ཀྱིས་ཁོ་མོས་ཉེ་ཆར་གཉེན་ཆས་(Clubhouse) བེད་སྤྱོད་བྱས་པ་བརྒྱུད་ཕྱི་སྡོད་རྒྱ་རིགས་དང་རྒྱ་ནག་ནང་གི་རྒྱ་རིགས་གང་མང་ལ་གོ་བརྡ་འཕྲོད་ཐུབ་པའི་བསམ་ཚུལ་ཕུལ་བ་དང་། རྒྱ་ནག་དམར་ཤོག་གཞུང་གིས་མི་མང་ཙམ་མ་ཟད། དམར་ཤོག་རང་གི་ལས་བྱེད་པ་ལ་ཡང་གཏོར་སྐྱོན་གཏོང་གི་ཡོད་པ་འགྲེལ་བརྗོད་གནང་། རྒྱ་ནག་གི་ཆབ་སྲིད་དཔྱད་གཏམ་པ་གྲགས་ཅན་སྐུ་ཞབས་ཁྲིན་པོ་ཁུང་ལགས་ཀྱིས་རྒྱ་ནག་དམར་ཤོག་གི་ལོ་བརྒྱ་ནི་རྒྱ་ནག་ལོ་ངོ་ལྔ་སྟོང་གི་ལོ་རྒྱུས་ནང་གི་ཆེས་ངོ་ཚ་དང་མུན་ནག་གི་དུས་རབས་ཡིན་པ་དང་། རྒྱ་ནག་དམར་ཤོག་གི་གཞུང་འཛིན་པ་ཚོས་རང་གི་ནོར་འཁྲུལ་ཤེས་རྟོགས་དགོས་པའི་དུས་ལ་སླེབས་ཡོད། རྒྱ་ནག་མི་མང་གིས་ཀྱང་ནོར་འཁྲུལ་དེ་དག་ཤེས་དགོས་པའི་སྐོར་གསུངས། ཁོང་གིས་ད་ལྟའི་ཆར་རྒྱ་ནག་འདི་བཞིན་ཕྱོགས་མཐའ་ཡོངས་ཀྱི་རྒྱལ་ཁབ་ཚོས་དགྲར་ངོས་འཛིན་བྱེད་བཞིན་ཡོད་པ་མ་ཟད། རྒྱ་ནག་དམར་ཤོག་གི་ཚེ་རྫོགས་ལ་ཉེ་བ་ཡོད། ཅེས་གསུངས།

སྐབས་དེར་རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་ཀྱིས་གསུང་དོན།  བོད་ལ་རྒྱ་དམར་གྱི་གཏོར་སྐྱོན་བཏང་བ་ཡོངས་གྲགས་ནི་ཕྱི་ལོ་ ༡༩༤༩ ལོ་ནས་དམར་དམག་གིས་བོད་ཀྱི་མདོ་སྟོད་སྨད་ཀྱི་ས་ཆ་བཙན་འཕྲོག་བྱས་པ་ནས་འགོ་ཚུགས་ཡོད་པ་དང་། ཕྱི་ལོ་ ༡༩༥༡ ལོའི་ཆིངས་ཡིག་དོན་ཚན་ ༡༧ རྒྱ་ནག་གིས་བཙན་འོག་ནས་བཞག་པ་དེ་རྒྱ་ནག་དམར་ཤོག་གིས་བརྩི་སྲུང་མ་བྱས་པར་རྡོག་རོལ་བཏང་བ། གཏོར་སྐྱོན་གྲངས་མེད་ཡོད་པའི་ནང་ནས་བོད་མི་ཚོའི་སེམས་ནང་བསུབ་ཐབས་མེད་པ་ནི་ཕྱི་ལོ་ ༡༩༥༩ ལོར་༸གོང་ས་མཆོག་མེད་པ་བཟོ་ཐབས་ཀྱི་གཡོ་ཇུས་དང་མགོན་པོ་གང་ཉིད་སྐྱབས་བཅོལ་དུ་ཕེབས་དགོས་བཟོས་ཡོད་སྐོར་དང་། 

གཞན་ཡང་ཁོང་གིས། རྒྱ་ནག་གཞུང་གིས་བོད་ཀྱི་ནང་ཆོས་དང་རིག་གཞུང་། སྐད་ཡིག ཁོར་ཡུག་སོགས་གཏོར་སྐྱོན་བློ་ཡུལ་ལ་མི་ཤོང་བ་བཏང་ཡོད་སྟབས། བོད་གཞིས་ལུས་མི་མང་ནས་རྒྱ་ནག་གི་དྲག་གནོན་ལ་མ་བཟོད་པར་ཞི་བའི་ངོ་རྒོལ་རབ་དང་རིམ་པ་གནང་ཡོད། རྒྱ་ནག་གིས་བོད་མིའི་ཞི་བའི་ངོ་རྒོལ་ལ་དྲག་གནོན་བྱས་པར་བརྟེན་ཕྱི་ལོ་ ༢༠༠༩ ལོ་ནས་ད་བར་བོད་མི་ ༡༥༥  ནས་སྐུ་ལུས་མེར་སྲེག་གནང་ཡོད་པ་སོགས་ཀྱི་སྐོར་འགྲེལ་བརྗོད་གནང་།

ཕྱོགས་མཚུངས་ཚུལ་ཁྲིམས་རྒྱ་མཚོ་ལགས་ཀྱིས་སྤྱི་ནོར་༸གོང་ས་༧སྐྱབས་མགོན་ཆེན་པོ་མཆོག་གིས་ལམ་སྟོན་དང་། བོད་མི་མང་སྤྱི་འཐུས་ལྷན་ཚོགས་ནས་སྤྱི་མོས་ཐོག་གཏན་འབེབས་གནང་བའི་དབུ་མའི་ལམ་གྱི་སྲིད་བྱུས་ད་ཆ་བོད་མིའི་སྒྲིག་འཛུགས་ནས་ལག་བསྟར་བྱེད་བཞིན་པ་མ་ཟད། དེ་ནི་དངོས་ཡོད་གནས་ཚུལ་དང་མཐུན་པའི་གཉིས་སྨན་གྱི་ཐབས་ལམ་ཡིན་པ་རྒྱ་རིགས་གྲོགས་པོ་རྣམས་ནས་རྒྱ་རིགས་གང་མང་ལ་ཁྱབ་སྤེལ་གནང་དགོས་པའི་འབོད་སྐུལ་ཞུས་གནང་ཡོད། 

ཆོགས་འདུའི་ཐོག་ཐའེ་ཝན་དང་ཧོང་ཀོང་གཉིས་ཀྱི་སྐུ་ཚབ་སོགས་ནས་ཀྱང་གསུང་བཤད་གནང་ཡོད། གསུང་བཤད་ཀྱི་ལས་རིམ་གྲོལ་རྗེས་ཚོགས་ཞུགས་པ་རྣམས་ཀྱིས་མུ་མཐུད་བགྲོ་གླེང་གནང་སྟེ་ཚོགས་འདུ་ཚགས་ཚུད་ངང་ལེགས་གྲུབ་བྱུང་ཡོད་པ་བཅས། །