༄༅། །ཨུ་རུ་སུའི་འཚོལ་བྱེད་འཕྲུལ་འཁོར་ཆེ་ཤོས་ (Yandex) ཞེས་པས་རུ་སོག་སྐུ་ཚབ་དོན་གཅོད་ཏེ་ལོ་རིན་པོ་ཆེ་མཆོག་ཁོང་ཚོའི་སྤྱི་ཁྱབ་ལས་ཁུངས་སུ་གདན་ཞུ་གནང་སྟེ། (Yandex) ཞེས་པས་ (Yandex Zen) བརྒྱུད་དྲ་ཐོག་ཞབས་ཞུ་གནང་བཞིན་པའི་ཐད་ཡར་རྒྱས་ཅི་ཞིག་གཏོང་དགོས་མིན་ཐད་གྲོས་བསྡུར་གནང་ཡོད།

(Yandex) ཞེས་པ་ནི་ཨུ་རུ་སུའི་འཕྲུལ་རིག་བཟོ་སྐྲུན་ཁང་ཆེ་ཤོས་དང་། ཨུ་རུ་སུའི་ནང་དྲ་རྒྱའི་འཚོལ་བྱེད་འཕྲུལ་འཁོར་ཆེ་ཤོས་དེ་ཡིན་ལ།  ཨུ་རུ་སུ་དང་དེ་སྔོན་སྤྱི་མཐུན་རྒྱལ་ཁབ་ཁག་ནང་དྲ་རྒྱའི་འཚོལ་བྱེད་འཕྲུལ་འཁོར་ཁྲོད་ཀྱི་ཚོང་རའི་ཐོབ་སྐལ་ཆེ་ཤོས་ཤིག་ཀྱང་ཡིན། གཟའ་འཁོར་རེར་ (Yandex Zen) ཞེས་པའི་དྲ་ཐོག་ཞབས་ཞུ་བེད་སྤྱོད་གཏོང་མཁན་ས་ཡ་ ༢༠ ལྷག་ཡོད།

དེ་ཡང་ཐོག་མར་རུ་སོག་སྐུ་ཚབ་དོན་གཅོད་ཏེ་ལོ་རིན་པོ་ཆེ་མཆོག་གིས་སྤྱི་ཁྱབ་ལྷན་ཁང་དུ་གཟིགས་སྐོར་གནང་གྲུབ་རྗེས། ནང་ཆོས་དང་ཤེེས་ཡོན་གྱི་ལས་གཞི་ཇི་ལྟར་གོང་སྤེལ་གཏོང་དགོས་པ་དང་། བོད་ཀྱི་འཐབ་རྩོད་ཐད་གོ་རྟོགས་ཇི་ལྟར་སྤེལ་དགོས་པ། དེ་བཞིན་ (Yandex) ནས་ལག་རྩལ་ཐད་རོགས་སྐྱོར་ཇི་ལྟར་མཁོ་འདོན་བྱེད་དགོས་པའི་སྐོར་གྲོས་བསྡུར་གནང་ཡོད།

སྐུ་ཚབ་དོན་གཅོད་ཏེ་ལོ་རིན་པོ་ཆེ་མཆོག་གིས། (Yandex) འཚོལ་བྱེད་འཕྲུལ་འཁོར་གྱི་རྣམ་གྲངས་དང་བེད་སྤྱོད་གཏོང་མཁན་ལ་གཞིག་ན། འཕྲུལ་རིག་བེད་སྤྱོད་བྱས་ཏེ་བོད་ཀྱི་རྩ་དོན་གོ་རྟོགས་རྒྱ་ཆེ་སྤེལ་རྒྱུ་དང་། དེང་གི་དུས་རབས་འདིར་དོན་སྙིང་ལྡན་པའི་ནང་བསྟན་ཆོས་ལུགས་ཀྱི་ཤེས་རབ་ཁྱབ་གདལ་གཏོང་རྒྱུའི་ཐོག་འཚོལ་ཞིབ་བྱེད་རྒྱུ་ཧ་ཅང་མང་པོ་ཡོད་ཅེས་དང་། ང་ཚོས་གོ་ལ་ཡོངས་ཀྱི་མི་ཚོགས་རྣམས་མཐུན་ལམ་ཡོང་ཆེད་ (Yandex) དང་ལྷན་མཉམ་ལས་བྱེད་རྒྱུ་རེ་སྒུག་བྱེད་ཀྱི་ཡོད་ཅེས་གསུངས།

མཐའ་དོན་མི་འགྱངས་པར་ཚོགས་འདུ་འཚོགས་ཏེ་བསམ་ཚུལ་འདྲ་མིན་ཐོག་གྲོས་བསྡུར་གནང་རྒྱུ་ཡིན་པ་མོས་མཐུན་བྱས་ཏེ་ད་ལན་གྱི་ཚོགས་འདུ་དེ་མཇུག་སྡོམ་གནང་ཡོད་པ་བཅས།