༄༅། །རུ་སོག་སྐུ་ཚབ་དོན་གཅོད་ཏེ་ལོ་རིན་པོ་ཆེ་མཆོག་གིས་ཁཱལ་མུག་སྤྱི་མཐུན་རྒྱ
དེ་ཡང་ཁལ་མུག་ཤེས་རིག་བློན་ཆེན་སྐུ་ཞབས་ (Erdne Barinov) མཆོག་གིས་སྤྱི་ཚོགས་དང་ཚོར་ཤེས། བཟང་སྤྱོད་ཀྱི་ཤེས་ཡོན་སློབ་གསོའི་བསླབ་གཞི་ཕྱག་བསྟར་ཞུ་རྒྱུའི་ཞལ་བཞེས་གནང་ཡོད་པ་མ་ཟད། ཁོང་གིས་ཁལ་མུག་གི་སློབ་གྲྭ་ཡོངས་ནང་བསླབ་གཞི་དེ་ཇི་ལྟར་ཕྱག་བསྟར་གནང་དགོས་མིན་ཐད་ཆེད་ལས་པ་དང་། དེ་བཞིན་དགེ་རྒན་དང་ལྷན་ཚོགས་འདུ་ཚོགས་གནང་རྒྱུ་ཡིན་སྐོར་གསུང་ཡོད།
སྐུ་ཚབ་དོན་གཅོད་ཏེ་ལོ་རིན་པོ་མཆོག་གིས། ག་དུས་ཡིན་ཡང་རྒྱབ་སྐྱོར་ཞུ་རྒྱུ་དང་། དེ་བཞིན་སྦྱོང་བརྡར་དང་། བགྲོ་གླེང་། ཟབ་སྦྱོང་སོགས་གོ་སྒྲིག་ཞུ་རྒྱུའི་གྲ་སྒྲིག་ཡོད་པ་མ་ཟད། དགོས་གལ་ནམ་བྱུང་ལ་ལམ་སྟོན་ཞུ་རྒྱུ་ཡིན་ཞེས་དང་། ཤེས་ཡོན་བསླབ་གཞི་དེ་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སེམས་ཀྱི་སློབ་གསོ་གནང་རྒྱུའི་དགོངས་གཞིའི་ཆ་ཤས་ཤིག་ཡིན་པ་མ་ཟད། བྱམས་སྙིང་རྗེ་གཞི་ལ་བཞག་ནས་ང་ཚོའི་འཇིག་རྟེན་ཡུན་གནས་ཡོང་ཐབས་ཤིག་ཀྱང་ཡིན། ཞེས་དང་། བསླབ་གཞི་དེ་མཐའ་མའི་ཕྱོགས་སྒྲིག་གི་རིམ་པར་སླེབས་ཡོད་པ་དང་། མགྱོགས་མྱུར་པར་འགྲེམས་བྱས་ཏེ་ཨུ་རུ་སུ་ཡོངས་ལ་ངོ་སྤྲོད་གནང་རྒྱུ་ཡིན། ཞེས་གསུངས།
གཞན་ཡང་སྐུ་ཚབ་དོན་གཅོད་ཏེ་ལོ་རིན་པོ་ཆེ་མཆོག་གིས་སྤྱི་ཚོགས་དང་ཚོར་ཤེས། བཟང་སྤྱོད་བཅས་ཀྱི་ཤེས་ཡོན་སློབ་གསོ་ཞེས་ཆོས་ལུགས་ལ་མ་བརྟེན་པའི་བཟང་སྤྱོད་སློབ་སྤེལ་གྱི་བསླབ་གཞིའི་རྒྱབ་ལྗོངས་དང་། འཛམ་གླིང་ཐོག་སློབ་གྲྭ་མང་དག་ཅིག་གི་ནང་ཤེས་ཡོན་གྱི་བསླབ་གཞི་དེ་ལག་བསྟར་བྱེད་བཞིན་ཡོད་སྐོར། ཨུ་རུ་སུའི་སྐད་ཡིག་ནང་ཕབ་སྒྱུར་ཞུས་པའི་སྤྱི་ཚོགས་དང་། སེམས་མྱོང་། བཟང་སྤྱོད་བཅས་ཀྱི་ཤེས་ཡོན་སློབ་གསོ་དེ་བཞིན་རུ་སོག་སྐུ་ཚབ་དོན་ཁང་ནས་གཟིགས་ཞིབ་གནང་ཡོད་པ་དང་། མོ་སི་ཁོ་ནང་རྟེན་གཞི་བྱས་པའི་བོད་སྐྱོབ་དགེ་རྩ་ཚོགས་པས་ (Save Tibet Foundation) ཕབ་སྒྱུར་ཞུ་བཞིན་ཡོད་སྐོར་སོགས་གསུངས། །
