༄༅། །ལོ་ལྟར་ཟླ་ ༧ ཚེས་ ༢༨ ཉིན་འཛམ་གླིང་ས་ཕྱོགས་ཁྱོན་ཡོངས་སུ་འཛམ་གླིང་མཆིན་ནད་དུག་ཐབས་ཉིན་མོ་ (World Hepatitis Day) ཞེས་སྲུང་བརྩི་ཞུས་ཏེ་སྲོག་ཉེན་ཆེ་བའི་མཆིན་པའི་གཉན་ཚད་ཀྱི་ནད་གཞི་དང་འབྲེལ་བའི་ཐོག་གོ་རྟོགས་ཀྱི་ལས་གཞི་གཟབ་རྒྱས་སྤེལ་བཞིན་ཡོད། འདི་ལོའི་འཛམ་གླིང་མཆིན་ནད་དུག་ཐབས་ཉིན་མོའི་བརྗོད་གཞི་ནི་མཆིན་ནད་དུག་ཐབས་སྒུག་མི་ཐུབ་ (Hepatitis Can’t Wait) ཞེས་ཡིན།  མཆིན་ནད་དུག་ཐབས་ཀྱི་ནད་གཞི་རྐྱེན་པས་འཛམ་གླིང་ཁྱོན་ཡོངས་ནང་དུས་ཡུན་སྐར་ཆ་ ༣༠ ནང་མི་རེ་འདས་གྲོངས་སུ་འགྱུར་བཞིན་ཡོད། དེ་ཡང་གོང་ཚེས་ཉིན་འཕྲོད་བསྟེན་ལས་ཁུངས་ནས་དྲ་ལམ་བརྒྱུད་གསུང་བཤད་ལས་རིམ་ཞིག་གོ་སྒྲིག་གནང་བའི་ཐོག་ཏན་ཌར་ (Tanda) རྟེན་གཞི་བྱས་པའི་ཌོག་ཌར་རཱཇེནྡྲ་པྲཱ་སཱད་གཞུང་གི་སྨན་པའི་མཐོ་སློབ་ (Dr. Rajendra Prasad Govt. Medical College) ཀྱི་སློབ་དཔོན་ (Dr. Baldev Singh Rana) ལགས་ཀྱིས་མཆིན་ནད་གཉན་ཚན་བིའི་སྐོར་གསུང་བཤད་གནང་ཡོད་པ་མ་ཟད། འཕྲོད་བསྟེན་ལས་ཁུངས་ཀྱི་འབྲེལ་ཡོད་ལས་བྱེད་རྣམས་ནས་མཆིན་པའི་གཉན་ཚད་ཀྱི་སྐོར་གོ་རྟོགས་ལས་གཞི་སྤེལ་ཡོད། ཕྱོགས་མཚུངས་རྒྱ་གར་དུ་ཡོད་པའི་བཙན་བྱོལ་བོད་མིའི་གཞིས་ཆགས་ཁག་ནས་ཀྱང་འཛམ་གླིང་མཆིན་ནད་དུག་ཐབས་ཉིན་མོ་སྲུང་བརྩི་ཞུས་ཡོད་པ་བཅས། །