༄༅། །ཕྱི་ལོ་ ༢༠༢༡ ཟླ་ ༧ ཚེས་ ༡ ཉིན་འཇར་མན་གྲོས་ཚོགས་ (German Bundestag) ཀྱི་ཚོགས་གཞོན་ལྕམ་སྐུ་ཀ་ལའོ་ཌི་ཡ་རོ་ཐི་ (Ms Claudia Roth) མཆོག་དང་། འཇར་མན་གྲོས་ཚོགས་ཀྱི་འགྲོ་བ་མིའི་ཐོབ་ཐང་དང་འགྲོ་བ་མིའི་བདེ་སྡུག་རོགས་སྐྱོར་ཚན་པའི་མགྲིན་ཚབ་པ་གྲོས་ཚོགས་འཐུས་མི་ལྕམ་སྐུ་མར་གྷ་རེ་ཏི་བྷོ་སོ་ (Ms. Margareta Bause) མཆོག འཇར་མན་གྲོས་ཚོགས་ཀྱི་འཕྲོད་བསྟེན་སྲིད་བྱུས་ཚན་པའི་མགྲིན་ཚབ་པ་ལྕམ་སྐུ་མེ་རི་ཡ་ (Maria Klein-Schmeink) མཆོག་བཅས་ནས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ལ་འཚམས་འདྲིའི་གསུང་འཕྲིན་གནང་བའི་ནང་འཁོད་དོན། སྐུ་ཉིད་བོད་མིའི་སྒྲིག་འཛུགས་ཀྱི་སྲིད་སྐྱོང་ལ་བདམས་ཐོན་བྱུང་བར་ང་ཚོས་འཚམས་འདྲི་དང་སྦྲགས་སྐུ་ཉིད་ཀྱི་མ་འོངས་ལས་དོན་རྣམས་ལམ་ལྷོངས་ཡོང་བའི་སྨོན་འདུན་ཞུ་རྒྱུ་ཡིན།

སྐུ་ཉིད་ལ་འོས་བསྡུའི་རྒྱལ་ཁ་ཐོབ་ཡོད་སྟབས་འཛམ་གླིང་གང་སར་གནས་པའི་བོད་མི་ཚོས་རེ་བ་ཆེན་པོ་གནང་གི་ཡོད། དེ་དང་ཆབས་ཅིག་སྐུ་ཉིད་ཀྱིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་སྐུ་ཚབ་དང་རྒྱ་ནག་གཞུང་གི་སྐུ་ཚབ་དབར་གྲོས་མོལ་ཡོང་ཐབས་དང་། མགོན་པོ་གང་ཉིད་མཆོག་གི་མ་འོངས་ཡང་སྲིད་ཀྱི་གནད་དོན། དེ་བཞིན་བོད་མི་ཡོངས་ལ་གཞི་རྩའི་འགྲོ་བ་མིའི་ཐོབ་ཐང་སླར་གསོ་གནང་རྒྱུའི་མཚོན་པའི་གདོང་ལེན་གནང་དགོས་པའི་གནད་དོན་ཆེན་པོའི་རིགས་ཀྱང་ཡོད།

ང་ཚོས་སྐུ་ཉིད་ཀྱིས་གཉིས་སྨན་དབུ་མའི་ལམ་ལ་དམིགས་ཏེ་ལས་དོན་གནང་བཞིན་པ་མཐའ་དག་ལམ་ལྷོངས་ཡོང་བའི་སྨོན་འདུན་ཞུ་རྒྱུ་དང་། སྐུ་ཉིད་ཀྱིས་གཙོས་འཛམ་གླིང་གང་སར་གནས་པའི་བོད་མི་ཡོངས་ལ་གདུང་སེམས་མཉམ་སྐྱེ་དང་རྒྱབ་སྐྱོར་ཞུ་རྒྱུའི་ཆོད་སེམས་བརྟན་པོ་ཡོད། ཅེས་འཁོད་ཡོད་པ་བཅས།།