༄༅། །རྒྱ་ནག་གི་སྲིད་འཛིན་ཞི་ཅིན་ཕིང་བོད་ཀྱི་རྒྱལ་ས་ལྷ་ས་དང་བོད་ཉིང་ཁྲི་ས་ཁུལ་དུ་འབྱོར་ཡོད། རྒྱ་ནག་གི་སྲིད་འཛིན་ཞི་ཅིན་ཕིང་ཐེངས་འདིར་བོད་ཀྱི་རྒྱལ་ས་ལྷ་སར་བསྐྱོད་པའི་སྐོར་བོད་མིའི་སྒྲིག་འཛུགས་ཀྱི་མགྲིན་ཚབ་པ་ཕྱི་དྲིལ་དྲུང་འཕར་བསྟན་འཛིན་ལེགས་བཤད་ལགས་ཀྱིས་གསུང་དོན། རྒྱ་ནག་གི་སྲིད་འཛིན་ཞི་ཅིན་ཕིང་བོད་ཉིང་ཁྲི་ས་ཁུལ་དང་བོད་ཀྱི་རྒྱལ་ས་ལྷ་སའི་གྲོང་ཁྱེར་དུ་འཚམས་གཟིགས་སུ་ཕེབས་ཡོད། འདི་ལོར་ཆ་བཞག་ན་རྒྱ་ནག་གཞུང་གིས་བོད་ཞི་བའི་བཅིངས་གྲོལ་བཏང་ནས་ལོ་ངོ་བདུན་ཅུ་འཁོར་ཚུལ་སྒྲོག་བཞིན་ཡོད་པ་མ་ཟད། དེའི་དུས་དྲན་སྲུང་བརྩི་ཞུ་རྒྱུའི་ངོ་བོ་ཞིག་མཚོན་གྱི་ཡོད་འདུག གང་ལྟར་ཞི་ཅིན་ཕིང་རྒྱ་ནག་གི་སྲིད་འཛིན་ཆགས་ཏེ་ད་བར་བོད་ནང་ཕེབས་ཐུབ་མེད། ད་རེས་ཐེངས་དང་པོ་ཆགས་ཀྱི་ཡོད། ང་ཚོའི་རེ་བར་ཞི་ཅིན་ཕིང་བོད་དུ་ཕེབས་དུས་གོ་སྐབས་བཟང་པོ་ཞིག་རགས་ཡོད་བསམ་གྱི་འདུག གོ་སྐབས་འདིའི་ཐོག་ནས་བོད་མིའི་མངོན་འདོད་གང་ཡིན་པ་སྲིད་འཛིན་ཞི་ཅིན་ཕིང་གིས་རྟོགས་ཐུབ་དགོས་པའི་གནས་སྟངས་གལ་ཆེན་པོ་ཞིག་ལ་བརྩིས་དགོས།
ད་ཆ་རྒྱ་ནག་ནང་ཆུ་ལོག་དང་འབྲེལ་བའི་དཀའ་ངལ་ཤུགས་ཆེན་པོ་ཡོང་གི་ཡོད་ནའང་བོད་ཀྱི་གནད་དོན་འདི་བཞིན་རྒྱ་ནག་ལ་གལ་ཆེན་པོ་ཡིན་པ་ཆབ་སྲིད་ཀྱི་ཐོག་ནས་མཚོན་ཐུབ་ཀྱི་ཡོད། རྒྱ་ནག་གཞུང་གིས་ལོ་ངོ་ ༧༠ རིང་བོད་ནང་མཁྲེགས་འཛིན་ཅན་གྱི་སྲིད་བྱུས་ལག་བསྟར་བྱེད་བཞིན་པ་དེར་བོད་མི་ཚོས་གདོང་ལེན་བྱས་པའི་ཐོག་ནས་ད་ལྟའང་དཀའ་རྙོག་ཅིག་འཕྲད་བཞིན་ཡོད། དེར་བརྟེན་ཞི་ཅིན་ཕིང་བོད་ཉིང་ཁྲི་ས་ཁུལ་དང་ལྷ་སར་ཕེབས་ཏེ་འཛུགས་སྐྲུན་གྱི་ལས་གཞི་ཁག་ལ་གཟིགས་པ་ཙམ་མིན་པར་བོད་མི་དང་ལྷན་ཐད་ཀར་བཀའ་མོལ་ཞུས་ཏེ་བོད་མིའི་དཀའ་ངལ་དང་གནས་སྟངས་སོགས་ལ་མཐུན་རྐྱེན་སྦྱར་ཐུབ་ཚེ་ཕན་ཐོགས་ཀྱི་རེད་བསམ་གྱི་འདུག
ཕྱི་ལོ་ ༢༠༡༠ ནས་བཟུང་བོད་རྒྱ་ཞི་མོལ་བྱུང་མེད། ཕྱོགས་མཚུངས་ཞི་ཅིན་ཕིང་རྒྱ་ནག་གི་སྲིད་འཛིན་ཆགས་པ་ནས་བཟུང་བོད་རྒྱ་གཉིས་དབར་ཞི་བའི་གྲོས་མོལ་བྱུང་མེད་སྟབས། ད་རེས་བོད་དུ་ཕེབས་ཏེ་བོད་རྒྱ་ཞི་མོལ་འགོ་བཙུགས་ཐུབ་པ་ཡིན་ན་ཞི་ཅིན་ཕིང་གི་བྱས་རྗེས་ཤིག་ལ་ངོས་འཛིན་བྱེད་ཐུབ་པ་ཞིག་ཡོད་པར་བརྟེན་ང་ཚོའི་རེ་བར་ཞི་ཅིན་ཕིང་བོད་དུ་ཕེབས་ནས་བོད་རྒྱ་ཞི་མོལ་བསྐྱར་དུ་བྱེད་ཐུབ་ན། མ་འོངས་པར་བོད་དང་རྒྱ་ནག་གཉིས་ཀར་ཐུགས་ཕན་གསོ་ཡི་རེད། ཅེས་གསུངས། །
