༄༅། །བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཨ་རིའི་རྒྱལ་ས་ཝ་ཤིན་ཊོན་དུ་ཕྱི་ལོ་ ༢༠༢༢ ལོའི་པེ་ཅིང་དགུན་དུས་ཨོ་རྩད་འགྲན་ཚོགས་བཀག་འགོག་ (Stop the 2022 Beijing Genocide Games) གི་ལས་འགུལ་ཐོག་མཉམ་ཞུགས་གནང་ཡོད།

སྐབས་དེར་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས། རྒྱ་ནག་དམར་ཤོག་ཚོགས་པས་བོད་ས་ཡོངས་རྫོགས་དབང་སྒྱུར་བྱས་པ་ནས་བཟུང་ད་བར་བོད་ནང་དྲག་གནོན་ཇི་ལྟར་བྱས་དང་བྱེད་བཞིན་པའི་ལོ་རྒྱུས་སྐོར་ཞིབ་ཕྲ་གསུངས་པ་མ་ཟད། ཕྱི་ལོ་ ༢༠༢༢ ལོའི་པེ་ཅིང་དགུང་དུས་ཨོ་རྩེད་འགྲན་ཚོགས་འདི་བཞིན་ལོ་རྒྱུས་ཁྲོད་གལ་གནད་ཆགས་ཡོད་སྟབས། རྒྱ་ནག་གཞུང་གི་བྱ་སྤྱོད་ངན་པ་རྣམས་རྒྱལ་སྤྱིའི་ཚོགས་པ་ཁག་ནས་བཀའ་འགོག་བྱེད་དགོས། ཞེས་དང་། 

རྒྱ་ནག་རྒྱལ་སྤྱིའི་ཨོ་རྩེད་འགྲན་ཚོགས་ཀྱི་ཚོགས་མི་རྒྱལ་ཁབ་ཡིན་པའི་ཆ་ནས་རྒྱ་ནག་གཞུང་གིས་རྒྱལ་སྤྱིའི་ཚོགས་མིའི་ཐོབ་ཐང་ཁག་ལོངས་སྤྱོད་བྱེད་དགོས་ཚེ། འགྲོ་བ་མིའི་ཐོབ་ཐང་དང་། རང་དབང་། དྲང་བདེན་བཅས་ཚུད་པའི་རྒྱལ་སྤྱིའི་ཁྲིམས་དང་སྒྲིག་གཞི་ཁག་ལ་དོ་སྣང་དང་བརྩི་བཀུར་ངེས་པར་དུ་བྱེད་དགོས། ཞེས་གསུངས། 

གཞན་ཡང་ཁོང་གིས་ཉེ་ཆར་ཨ་རིའི་གྲོས་ཚོགས་ནང་བོད་དང་ཡུ་གུར། ཧོང་ཀོང་། ཐེ་ཝན་བཅས་ཀྱི་ཐོག་ལོ་རྒྱུས་རང་བཞིན་ལྡན་པའི་ཁྲིམས་གཏན་འབེབས་གནང་བར་ཐུགས་རྗེ་ཆེ་ཞུས་པ་དང་། དེ་དག་ལ་བརྟེན་ནས་ང་ཚོར་སེམས་ཤུགས་སྐྱེ་དགོས་པའི་གནད་དོན་ཞིག་ཆགས་ཀྱི་ཡོད། མཐར་ངས་རྒྱལ་སྤྱིའི་མང་ཚོགས་ལ་ང་ཚོའི་མང་གཙོ་དང་འགྲོ་བ་མིའི་ཐོབ་ཐང་ཙམ་མིན་པར། ཁྱེད་ཚོའི་རང་དབང་དང་མང་གཙོའི་རིན་ཐང་ཆེད་ང་ཚོ་དང་ལྷན་དུ་རྒྱབ་སྐྱོར་གནང་སྐྱོང་ཡོང་བའི་འབོད་སྐུལ་ཞུ་རྒྱུ་ཡིན། ཞེས་གསུངས། །