༄༅། །ཕྱི་ལོ་ ༢༠༢༡ ཟླ་ ༧ ཚེས་ ༡༦ རེས་གཟའ་པ་སངས་ཉིན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་གོ་སྒྲིག་འོག་ཉེ་ཆར་ཨ་རི་ནེའུ་ཡོག་དང་ནེའུ་ཇར་སི་བོད་རིགས་སྨན་ཞབས་ཚོགས་པ་དང་། བྱང་ཀེ་ལི་ཕོར་ནི་ཡ་བོད་རིགས་སྤྱི་མཐུན་འཕྲོད་བསྟེན་ཚོགས་ཆུང་གི་དང་བླངས་སྨན་ཞབས་པ་བདུན་དང་རྒྱ་གར་ནང་གི་སྨན་ཞབས་པ་བདུན་བཅས་ཁྱོན་སྨན་ཞབས་པ་ ༡༤ ནས་བོད་མིའི་སྤྱི་ཚོགས་ཁྲོད་དང་བླངས་ཐོག་ཞབས་ཞུ་སྒྲུབ་པར་ཐུགས་རྗེ་ཆེ་ཞུའི་མཛད་སྒོ་ཞིག་ཚོགས་གནང་ཡོད།
དེ་ཡང་གོང་ཚེས་ཉིན་གྱི་ཕྱེད་ཡོལ་ཆུ་ཚོད་ ༡༢།༣༠ ཙམ་ལ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་། འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས་དང་དྲུང་གཞོན་བསྟན་འཛིན་ཀུན་བཟང་ལགས། བདེ་ལེགས་སྨན་ཁང་གི་འགན་འཛིན་ཟླ་བ་ཕུན་སྐྱིད་ལགས། སྨན་པ་བསྟན་འཛིན་བཙོན་འགྲུས་ལགས། བོད་ཀྱི་སྨན་རྩིས་ཁང་གི་འགན་འཛིན་བཀྲ་ཤིས་ཚེ་རིང་ལགས། བཀའ་དྲུང་ཡིག་ཚང་གི་དྲུང་འཕར་ཚེ་རིང་ཆོས་འཛོམས་ལགས། དང་བླངས་སྨན་ཞབས་པ། གཞན་ཡང་འཕྲོད་བསྟེན་ལས་ཁུངས་ཀྱི་ལས་བྱེད་བཅས་ཚང་འཛོམས་ཀྱིས་མཛད་སྒོ་དབུ་འཛུགས་ཀྱི་ཐོག་མར་དང་བླངས་སྨན་ཞབས་པ་རྣམས་ཀྱིས་རང་ཉིད་ཀྱི་མྱོང་ཚོར་ངོ་སྤྲོད་དང་ལས་བསྡོམས་སྙན་སྒྲོན་གནང་བ་དང་འབྲེལ། ས་གནས་དང་ཚོགས་པ་སོ་སོའི་ངོས་ནས་མཐུན་འགྱུར་ཧ་ཅང་ཡག་པོ་གནང་བར་ཐུགས་རྗེ་ཆེ་ཞུས་ཡོད་པ་དང་། སློབ་ཕྲུག་རྣམས་ནས་ཁ་རས་ངེས་པར་དུ་གྱོན་རྒྱུ་དགོས་གལ་ཆེན་པོ་ཡིན་སྐོར་དང་། སློབ་གྲྭའི་འབྲེལ་ཡོད་ལས་བྱེད་ནས་སློབ་ཕྲུག་རྣམས་ལ་ཁ་རས་ངེས་པར་དུ་གྱོན་དགོས་སྐོར་ལམ་སྟོན་ནན་པོ་གནང་སྐྱོང་ཡོང་བའི་འབོད་སྐུལ་གནང་སོང་། 
གཞན་ཡང་ཨ་རི་ནེའུ་ཡོག་དང་ནེའུ་ཇར་སི་བོད་རིགས་སྨན་ཞབས་ཚོགས་པ་དང་བྱང་ཀེ་ལི་ཕོར་ནི་ཡ་བོད་རིགས་སྤྱི་མཐུན་འཕྲོད་བསྟེན་ཆོགས་ཆུང་གི་དང་བླངས་སྨན་ཞབས་པ་ཚོགས་པས་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ལ་པར་ཆས་དང་ (Tripod) གནང་བ་མ་ཟད། རྡ་ས་ནས་སྨན་ཞབས་པ་བཞི་དང་རྒྱ་གར་ལྷོ་ཕྱོགས་བོད་མིའི་གཞིས་ཆགས་ནས་སྨན་ཞབས་པ་གཉིས་བཅས་ལ་ཟླ་བ་གཉིས་རིང་གི་གླ་ཕོགས་དང་། དེ་བཞིན་ཚོགས་པའི་ལྷག་བསྡད་མ་དངུལ་འབུམ་དྲུག་ཞལ་འདེབས་སུ་ཕུལ་ཡོད།
སྐབས་དེར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་གསུང་དོན། མིའི་མི་ཚེ་ནང་ནད་ན་ཚ་ཕོག་པའི་སྐབས་ཀྱི་དཀའ་ངལ་དང་། བཟའ་བཏུང་མེད་པ་བཅས་ཀྱི་དཀའ་ངལ་འདི་བཞིན་དཀའ་ངལ་ཆེ་ཤོས་ཤིག་ཆགས་ཀྱི་ཡོད། དཀའ་ངལ་འཕྲད་དུས་རོགས་པ་བྱེད་མཁན་དེ་བོད་མི་ཡིན་པ་ཙམ་དུ་མ་ཟད་ང་ཚོའི་བརྒྱུད་ལ་བྱམས་སྙིང་རྗེའི་རང་བཞིན་ཡོད་པ་དེ་མངོན་གྱི་ཡོད། བོད་མི་མང་ཚོགས་ལ་ཏོག་དབྱིབས་གཉན་རིམས་ཀྱི་ཛ་དྲག་དཀའ་ངལ་འཕྲད་པའི་སྐབས་འདིར་ཨ་རི་ནས་ཕེབས་པའི་སྨན་ཞབས་དང་རྒྱ་གར་ནང་གི་སྨན་ཞབས་པས་དང་བླངས་ཐོག་འགན་ཁུར་བཞེས་ཏེ་ཕྱག་ལས་ཧུར་ཐག་གནང་བར་ངས་འཛིན་སྐྱོང་བཀའ་ཤག་དང་བོད་མིའི་སྒྲིག་འཛུགས་ཀྱི་ངོས་ནས་ཐུགས་རྗེ་ཆེ་ཞུ་རྒྱུ་ཡིན། ཐེངས་འདིར་ཨ་རི་ནེའུ་ཡོག་དང་ནེའུ་ཇར་སི་བོད་རིགས་སྨན་ཞབས་ཚོགས་པ་དང་བྱང་ཀེ་ལི་ཕོར་ནི་ཡ་བོད་རིགས་སྤྱི་མཐུན་འཕྲོད་བསྟེན་ཆོགས་ཆུང་ནས་གོ་སྒྲིག་གནང་ཡོད། མ་འོངས་པར་འདི་ལྟ་བུ་གོ་སྒྲིག་གནང་དགོས་བྱུང་ཚེ་རྒྱ་ཆེ་ས་ནས་བོད་མི་ནང་ཁུལ་གྲོས་བསྡུར་གྱིས་ལས་དོན་བྱེད་ཕྱོགས་ཐད་རང་བཞིན་གྱི་རླབས་ཆེ་བ་ཞིག་ཡོང་ཐུབ་ཀྱི་རེད། བོད་པའི་སྤྱི་ཚོགས་ཡར་རྒྱས་ཇི་ལྟར་གཏོང་དགོས་ཕྱོགས་ཐད་གཞན་རྟེན་གྱི་བསམ་བློ་དོར་ཏེ་ང་རང་ཚོ་བོད་མི་ནང་ཁུལ་ཕན་ཚུན་རོགས་པ་བྱ་རྒྱུ་ཤུགས་ཆེ་རུ་གཏང་ཚེ་ཁ་ཡོད་ལག་ཡོད་ཀྱི་རང་ཁ་རང་གསོ་ཡོང་གི་རེད། རང་ཉིད་ཀྱི་ལས་དོན་རྣམས་གཞན་རྟེན་དུ་མ་བཅོལ་བར་རང་ངོས་ནས་སྒྲུབ་རྒྱུའི་འབད་བརྩོན་བྱེད་དགོས། ཅེས་སོགས་ཀྱི་གསུང་བཤད་གནང་སྟེ་དང་བླངས་སྨན་ཞབས་པ་རྣམས་ལ་ཐུགས་རྗེ་ཆེ་ཞུའི་ཕྱག་འཁྱེར་གནང་ཡོད།
མཐར་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་གྲུབ་མཚམས་བོད་ཀྱི་སྨན་རྩིས་ཁང་ནས་དང་བླངས་སྨན་ཞབས་པ་རྣམས་ལ་ཐུགས་རྗེ་ཆེ་ཞུའི་ཕྱག་རྟགས་གནང་ཡོད་པ་བཅས། །
