༄༅། །ཕྱི་ལོ་ ༢༠༢༡ ཟླ་ ༧ ཚེས་ ༡༥ ཉིན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཏོག་དབྱིབས་གཉན་རིམས་ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ ༦༨ དེ་སྤེལ་ཡོད་པ་དང་། གསལ་བསྒྲགས་གནང་མཁན་ལས་དོན་ཚོགས་ཆུང་གི་གསར་འགོད་འབྲེལ་མཐུད་པ་སྨན་པ་ཚེ་རིང་མཚམས་གཅོད་ལགས་དང་སྨན་པ་བསྟན་འཛིན་རྣམ་གྲོལ་ལགས་བཅས་ཡིན།
དེ་ཡང་ལས་དོན་ཚོགས་ཆུང་གི་གསར་འགོད་འབྲེལ་མཐུད་པ་སྨན་པ་ཚེ་རིང་མཚམས་གཅོད་ལགས་ཀྱིས་འདས་པའི་བདུན་ཕྲག་གཅིག་ནང་ཚོགས་ཆུང་གི་སྙན་ཐོའི་སྐོར་གསུང་དོན། འདས་པའི་བདུན་ཕྲག་ནང་རྒྱ་གར་ནང་གི་བཙན་བྱོལ་བོད་མིའི་གཞིས་ཆགས་ཁག་གྲངས་ ༡༢ དང་། བལ་ཡུལ་ནང་གི་བཙན་བྱོལ་བོད་མིའི་གཞིས་ཆགས་ཁག་གྲངས་ ༦ བཅས་ཁྱོན་བཙན་བྱོལ་བོད་མིའི་གཞིས་ཆགས་ཁག་གྲངས་ ༡༨ ནང་གི་བོད་མི་རང་ཁྱིམ་དུ་མི་གྲངས་ ༤༩༥ དང་སྒྲིག་འཛུགས་ནས་མཐུན་འགྱུར་སྦྱར་བའི་འགོག་དབྱེ་ཟུར་འཇོག་ཁང་དུ་བཞུགས་མཁན་མི་གྲངས་ ༥༣༧ བཅས་ཁྱོན་བསྡོམས་བོད་མི་གྲངས་ ༡༠༣༢ འགོག་དབྱེ་ཟུར་བཀག་ཐོག་བཞུགས་ཡོད། ད་བར་རྒྱ་གར་དང་བལ་ཡུལ་ནང་ཁྱོན་བསྡོམས་མི་གྲངས་ ༢༦༠༩༤ འགོག་དབྱེ་ཟུར་འཇོག་ཁང་དུ་བཞུགས་ཡོད།
ད་བར་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་དང་དབུས་བོད་ཀྱི་སྨན་རྩིས་ཁང་ནས་གསོ་རིག་ལུས་སེམས་ནུས་གསོའི་སྨན་ཁྱོན་བསྡོམས་མི་གྲངས་ ༣༨༡༢༥ ལ་རིན་མེད་བགོ་འགྲེམས་གནང་ཡོད། དེ་བཞིན་བཙན་བྱོལ་བོད་མིའི་གཞིས་ཆགས་ཁག་དང་སློབ་གྲྭ་ཁག་གི་འགན་འཛིན་དང་སློབ་སྤྱི་བརྒྱུད་རང་ལོ་ ༤ ནས་ ༡༧ བར་གྱི་ཕྲུ་གུ་རྣམས་ལ་གསོ་རིག་ལུས་སེམས་ནུས་གསོའི་སྨན་མུ་མཐུད་བགོ་འགྲེམས་ཞུ་བཞིན་ཡོད། གཞན་ཡང་འདི་ལོའི་ཕྱི་ཟླ་ ༦ བར་ཏོག་དབྱིབས་གཉན་རིམས་ཀྱི་ནད་གཞི་ཕོག་པ་རྣམས་ལ་དབུས་བོད་ཀྱི་སྨན་རྩིས་ཁང་ནས་མི་རིགས་སོགས་དབྱེ་འབྱེད་མེད་པར་གསོལ་སྨན་རིན་མེད་ཐོག་མི་གྲངས་ ༥༥༦༧ ལ་གནང་ཡོད།
སེམས་ཁམས་འཕྲོད་བསྟེན་དང་འབྲེལ་འདས་པའི་བདུན་ཕྲག་འདིའི་ནང་མི་གྲངས་ ༣༤ ལ་སེམས་ཁམས་འཕྲོད་བསྟེན་དང་འབྲེལ་བའི་ལམ་སྟོན་སློབ་གསོ་གནང་ཐུབ་པ་བྱུང་ཡོད་པ་མ་ཟད། ནད་ཡམས་ཁྱབ་བརྡལ་སྔོན་འགོག་སླད་བདུན་ཕྲག་འདིའི་ནང་རྒྱ་གར་ནང་གི་ས་གནས་གྲངས་ ༡༡ དང་བལ་ཡུལ་ནང་གི་ས་གནས་༣ བཅས་ཀྱི་བོད་མི་གྲངས་ ༦༠༣ ལ་ནད་གཞི་ཕོག་ཡོད་མེད་བརྟག་དཔྱད་གནང་ཐུབ་པ་བྱུང་ཡོད།
དེ་བཞིན་སྔོན་འགོག་སྨན་ཁབ་རྒྱག་སྒོ་ཚུགས་པ་ནས་བཟུང་ད་བར་རྒྱ་གར་ནང་གི་བོད་མི་གྲངས་༡༩༧༧༡ ལ་སྔོན་འགོག་སྨན་ཁབ་རིམ་པ་དང་པོ་དང་གཉིས་པ་གཉིས་ཀར་བརྒྱབ་ཟིན་པ་དང་། བལ་ཡུལ་ནང་སྔོན་འགོག་སྨན་ཁབ་རིམ་པ་དང་པོ་དང་གཉིས་པ་གཉིས་ཀར་ཐོབ་པ་མི་གྲངས་ ༤༠༣ དང་། སྔོན་འགོག་སྨན་ཁབ་རིམ་པ་དང་པོ་ཐོབ་པ་མི་གྲངས་ ༡༠༤༥ ཆགས་ཀྱི་འདུག
འདས་པའི་བདུན་ཕྲག་གཅིག་གི་ནང་རྒྱ་གར་དང་བལ་ཡུལ་ནང་ནད་གཞི་ཕོག་པ་ར་འཕྲོད་བྱུང་བ་མི་གྲངས་ ༡༤༨ བྱུང་ཡོད་པ་ལས་སྐྱེས་པ་གྲངས་ ༨༢ དང་། བུད་མེད་གྲངས་ ༦༦ དེའི་ནང་ནས་དགུང་ན་མཐོ་ཤོས་དེ་ ༩༦ དང་ཆུང་ཤོས་དེ་ཟླ་བ་ ༦ ཡིན། སྟབས་ལེགས་པ་ཞིག་ལ་བདུན་ཕྲག་འདིའི་ནང་ཏོག་དབྱིབས་གཉན་རིམས་ཀྱིས་རྐྱེན་པས་མི་གྲངས་གཅིག་ཀྱང་འདས་གྲོངས་སུ་གྱུར་མེད།
ད་བར་རྒྱ་གར་དང་བལ་ཡུལ་ནང་གི་བོད་མི་ནད་གཞི་ཕོག་པ་ཁྱོན་མི་གྲངས་ ༥༣༥༦ དང་། དྲག་སྐྱེད་བྱུང་བ་མི་གྲངས་ ༤༨༩༧ ། འདས་གྲོངས་སུ་གྱུར་བ་མི་གྲངས་ ༡༣༢ ། ད་ལྟ་ནད་མནར་གསོ་བཅོས་བྱེད་བཞིན་པ་མི་གྲངས་ ༣༢༧ ཡོད། མི་མང་ལ་ཐུགས་སྣང་ལམ་སྟོན་ཞུ་རྒྱུར། ད་བར་འཛམ་གླིང་ཁྱོན་ཡོངས་ནང་ནད་གཞི་འདི་ཕོག་པའི་མི་གྲངས་ས་ཡ་ ༡༨༧ ཙམ་དང་ཨ་རིའི་ནང་ནད་གཞི་འདི་ཕོག་པ་མི་གྲངས་ས་ཡ་ ༣༣ བྱུང་ཡོད། འདས་པའི་ཆུ་ཚོད་ཉི་ཤུ་རྩ་བཞི་ནང་རྒྱ་གར་ནང་ནད་གཞི་གསར་པ་ཕོག་མཁན་མི་གྲངས་ ༤༡༨༠༦ བྱུང་ཡོད་པ་མ་ཟད། མི་གྲངས་ ༥༨༡ འདས་གྲོངས་སུ་གྱུར་ཡོད།ཅེས་སོགས་གསུངས།
མཐར་རྡ་ས་བདེ་ལེགས་སྨན་ཁང་གི་སྨན་པ་བསྟན་འཛིན་རྣམ་གྲོལ་ལགས་ཀྱིས་ལམ་སྟོན་གནང་དོན། སྤྱིར་རྒྱ་གར་ནང་ཏོག་དབྱིབས་གཉན་རིམས་ཕོག་པའི་མི་གྲངས་ཉུང་དུ་འགྲོ་བཞིན་ཡོད་ནའང་ཚང་མས་སྔོན་འགོག་གི་ཐབས་ལམ་ཁག་མུ་མཐུད་བསྟེན་དགོས་རྒྱུ་ཧ་ཅང་གལ་ཆེན་པོ་ཡིན། དེ་བཞིན་ཏོག་དབྱིབས་གཉན་རིམས་ཀྱི་ནད་རྟགས་འཐོན་པ་ཡིན་ན་འཕྲལ་དུ་བརྟག་དཔྱད་གནང་དགོས་རྒྱུ་གལ་ཆེན་པོ་ཆགས་ཀྱི་འདུག ད་ལྟའི་ཆར་སྔོན་འགོག་གི་ཐབས་ལམ་བཟང་ཤོས་ནི་སྔོན་ཁབ་བརྒྱག་རྒྱུ་དེ་ཡིན་སྟབས། ཚང་མས་སྔོན་འགོག་སྨན་ཁབ་ངེས་པར་དུ་བརྒྱག་རོགས་ཞེས་ཞུ་རྒྱུ་ཡིན། རྒྱ་གར་ནང་སྔོན་འགོག་སྨན་ཁབ་དང་པོ་དེ་ (COVIDSHIELD) བརྒྱབ་ནས་ཉིན་གྲངས་ ༨༤ རྗེས་སྔོན་འགོག་སྨན་ཁབ་གཉིས་པ་བརྒྱག་གི་ཡོད། འོན་ཀྱང་རྒྱ་གར་ནས་ཕྱིའི་རྒྱལ་ཁབ་ཁག་ཏུ་སློབ་སྦྱོང་དང་ལས་དོན་སོགས་ཀྱི་སླད་བསྐྱོད་མཁན་རྣམས་ལ་སྔོན་འགོག་སྨན་ཁབ་དང་པོ་དང་གཉིས་པའི་དབར་ཉིན་གྲངས་ ༨༤ རིང་གི་བར་མཚམས་འཇོག་མི་དགོས་པར་ཁབ་བརྒྱག་ཆོག་པའི་དམིགས་བསལ་མཐུན་རྐྱེན་སྦྱར་ཡོད་ཀྱང་ཡིག་ཆ་སྟོན་དགོས་པའི་ལམ་སྟོན་གནང་ཡོད། ཅེས་སོགས་གསུངས།།
