༄༅། །ཕྱི་ལོ་ ༢༠༢༡ ཟླ་ ༧ ཚེས་ ༡ ཉིན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཏོག་དབྱིབས་གཉན་རིམས་ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ ༦༦ དེ་སྤེལ་ཡོད་པ་དང་། གསལ་བསྒྲགས་གནང་མཁན་འཕྲོད་བསྟེན་ལས་ཁུངས་ཀྱི་དྲུང་གཞོན་བསྟན་འཛིན་ཀུན་བཟང་ལགས་དང་། སྨན་པ་ཚེ་རིང་མཚམས་གཅོད་ལགས། སྨན་པ་བསྟན་འཛིན་བརྩོན་འགྲུས་ལགས་བཅས་ཡིན།
དེ་ཡང་འཕྲོད་བསྟེན་ལས་ཁུངས་ཀྱི་དྲུང་གཞོན་བསྟན་འཛིན་ཀུན་བཟང་ལགས་ཀྱིས་གསུང་དོན། དེ་རིང་ནི་རྒྱ་གར་རྒྱལ་ཡོངས་ནང་སྨན་པའི་ཉིན་མོ་སྲུང་བརྩི་ཞུ་བཞིན་ཡོད་སྟབས། རང་རེའི་སྤྱི་ཚོགས་ནང་ཞབས་ཕྱི་ཞུ་བཞིན་པའི་སྨན་པ་ཡོངས་ལ་འཚམས་འདྲིའི་བཀྲ་ཤེས་བདེ་ལེགས་ཞུ་རྒྱུ་ཡིན།
མཁས་དབང་སོགས་ཀྱིས་ནད་རླབས་གསུམ་པ་ཞིག་སླེབ་རྒྱུའི་ཉེན་ཁ་ཡོད་སྐོར་ཚོད་དཔག་གནང་བཞིན་ཡོད་སྟབས། ཚང་མས་སྔོན་འགོག་གི་ཐབས་ལམ་རྣམས་མུ་མཐུད་བསྟེན་དགོས་རྒྱུ་ཧ་ཅང་གལ་ཆེན་པོ་ཡིན། ད་བར་བཙན་བྱོལ་བོད་མི་མང་དག་ཅིག་གིས་ཏོག་དབྱིབས་གཉན་རིམས་ཀྱི་སྔོན་འགོག་སྨན་ཁབ་བརྒྱབ་ཟིན་པར་བརྟེན་སྔོན་ཁབ་རིམ་པ་དང་པོ་དང་གཉིས་པའི་དབར་ཉིན་གྲངས་ ༨༤ བར་གྱི་བར་མཚམས་འཇོག་དགོས། ཞེས་གསུངས་གྲུབ་མཚམས་ལས་དོན་ཚོགས་ཆུང་གི་གསར་འགོད་འབྲེལ་མཐུད་པ་སྨན་པ་ཚེ་རིང་མཚམས་གཅོད་ལགས་ཀྱིས་འདས་པའི་བདུན་ཕྲག་གཅིག་ནང་ཚོགས་ཆུང་གི་སྙན་ཐོའི་སྐོར་གསུང་དོན། འདས་པའི་བདུན་ཕྲག་ནང་རྒྱ་གར་ནང་གི་བཙན་བྱོལ་བོད་མིའི་གཞིས་ཆགས་ཁག་གྲངས་ ༡༦ དང་། བལ་ཡུལ་ནང་གི་བཙན་བྱོལ་བོད་མིའི་གཞིས་ཆགས་ཁག་གྲངས་ ༦ བཅས་ཁྱོན་བཙན་བྱོལ་བོད་མིའི་གཞིས་ཆགས་ཁག་གྲངས་ ༢༢ ནང་གི་བོད་མི་རང་ཁྱིམ་དུ་མི་གྲངས་ ༤༡༣ དང་སྒྲིག་འཛུགས་ནས་མཐུན་འགྱུར་སྦྱར་བའི་འགོག་དབྱེ་ཟུར་འཇོག་ཁང་དུ་བཞུགས་མཁན་མི་གྲངས་ ༥༢༢ བཅས་ཁྱོན་བསྡོམས་བོད་མི་གྲངས་ ༩༣༥ འགོག་དབྱེ་ཟུར་བཀག་ཐོག་བཞུགས་ཡོད།
ད་བར་གསོ་རིག་ལུས་སེམས་ནུས་གསོའི་སྨན་ཁྱོན་བསྡོམས་མི་གྲངས་ ༣༧༠༥༦ ལ་རིན་མེད་བགོ་འགྲེམས་གནང་ཡོད། དེ་བཞིན་དབུས་བོད་ཀྱི་སྨན་རྩིས་ཁང་ནས་ཕྱི་ཟླ་ ༦ ནང་ཏོག་དབྱིབས་གཉན་རིམས་ཕོག་པའི་ནད་པ་གྲངས་ ༥༤༥ ལ་རིན་མེད་སྨན་བགོ་འགྲེམས་གནང་ཡོད།
སེམས་ཁམས་འཕྲོད་བསྟེན་དང་འབྲེལ་འདས་པའི་བདུན་ཕྲག་འདིའི་ནང་མི་གྲངས་ ༧༠ ལ་སེམས་ཁམས་འཕྲོད་བསྟེན་དང་འབྲེལ་བའི་ལམ་སྟོན་སློབ་གསོ་གནང་ཐུབ་པ་བྱུང་ཡོད་པ་མ་ཟད། བོད་མི་མདུན་ཐོན་ཞབས་ཞུ་བའི་མྱོང་ཚོར་གླེང་སྟེགས་ཞེས་ནང་ཁུལ་གྲོས་བསྡུར་གནང་རྒྱུའི་ལས་རིམ་ཞིག་ཀྱང་བསྐོང་ཚོགས་གནང་ཡོད།
ནད་ཡམས་ཁྱབ་བརྡལ་སྔོན་འགོག་སླད་བདུན་ཕྲག་འདིའི་ནང་རྒྱ་གར་ནང་གི་ས་གནས་གྲངས་ ༡༥ དང་བལ་ཡུལ་ནང་གི་ས་གནས་ ༥ བཅས་ཀྱི་བོད་མི་གྲངས་ ༦༦༩ ལ་ནད་གཞི་ཕོག་ཡོད་མེད་བརྟག་དཔྱད་གནང་ཐུབ་པ་བྱུང་ཡོད།
དེ་བཞིན་སྔོན་འགོག་སྨན་ཁབ་རྒྱག་སྒོ་ཚུགས་པ་ནས་བཟུང་ད་བར་རྒྱ་གར་ནང་ལོ་ན་ ༦༠ ཡན་གྱི་བོད་མི་གྲངས་ ༧༧༦༡ དང་། དེ་བཞིན་རང་ལོ་ ༤༥ ནས་ ༥༩ བར་གྱི་བོད་མི་གྲངས་ ༥༡༥༦། རང་ལོ་ ༡༨ ནས་ ༤༤ བར་གྱི་བོད་མི་གྲངས་ ༡༧༥༡ བཅས་སྔོན་འགོག་སྨན་ཁབ་རིམ་པ་དང་པོ་དང་གཉིས་པ་གཉིས་ཀར་བརྒྱབ་ཟིན་པ་མི་གྲངས་ ༡༤༧༠༣ དང་། ཕྱོགས་མཚུངས་རྒྱ་གར་ནང་རང་ལོ་ ༦༠ ཡན་གྱི་བོད་མི་གྲངས་ ༢༡༡༦ དང་། རང་ལོ་ ༤༥ ནས་ ༥༩ བར་གྱི་བོད་མི་གྲངས་ ༦༢༥༨། རང་ལོ་ ༡༨ ནས་ ༤༤ བར་གྱི་བོད་མི་གྲངས་ ༢༠༡༡༥ བཅས་ཁྱོན་མི་གྲངས་ ༢༨༤༨༩ ཙམ་ལ་སྔོན་འགོག་སྨན་ཁབ་རིམ་པ་དང་པོ་བརྒྱབ་ཟིན། ཁྱོན་བསྡོམས་རྒྱ་གར་ནང་བོད་མི་བརྒྱ་ཆ་ ༧༩ ཙམ་ལ་སྔོན་འགོག་སྨན་ཁབ་རིམ་པ་དང་པོའམ་གཉིས་པ་ཐོབ་ཡོད།
འདས་པའི་བདུན་ཕྲག་གཅིག་གི་ནང་རྒྱ་གར་དང་བལ་ཡུལ་ནང་ནད་གཞི་ཕོག་པ་ར་འཕྲོད་བྱུང་བ་མི་གྲངས་ ༧༢ བྱུང་ཡོད་པ་ལས་སྐྱེས་པ་གྲངས་ ༤༡ དང་། བུད་མེད་གྲངས་ ༣༡ དེའི་ནང་ནས་དགུང་ན་མཐོ་ཤོས་དེ་ ༨༢ དང་ཆུང་ཤོས་དེ་བྱིས་པ་ལོ་ ༥ ཡིན། སྟབས་ལེགས་པ་ཞིག་ལ་བདུན་ཕྲག་འདིའི་ཏོག་དབྱིབས་གཉན་རིམས་ཀྱིས་རྐྱེན་པས་མི་གྲངས་གཅིག་ཀྱང་་གྲོངས་སུ་གྱུར་མེད། ད་བར་རྒྱ་གར་དང་བལ་ཡུལ་ནང་གི་བོད་མི་ནད་གཞི་ཕོག་པ་ཁྱོན་མི་གྲངས་ ༥༡༥༦ དང་། དྲག་སྐྱེད་བྱུང་བ་མི་གྲངས་ ༤༦༥༨ ། འདས་གྲོངས་སུ་གྱུར་བ་མི་གྲངས་ ༡༣༡ ། ད་ལྟ་ནད་མནར་གསོ་བཅོས་བྱེད་བཞིན་པ་མི་གྲངས་ ༣༦༧ ཡོད། ཅེས་སོགས་གསུངས།
མཐར་སྨན་པ་བསྟན་འཛིན་བརྩོན་འགྲུས་ལགས་ཀྱིས་ལམ་སྟོན་གནང་དོན། ད་ལྟའི་ཆར་རྒྱ་གར་ནང་ཏོག་དབྱིབས་གཉན་རིམས་ཀྱི་གནས་སྟངས་ཕྲན་བུ་བཟང་དུ་འགྲོ་ཡི་འདུག ཉེ་ཆར་རྒྱ་གར་དབུས་སྨན་གྱི་ཉམས་ཞིབ་ལྷན་ཚོགས་ཁང་གི་ལམ་སྟོན་ལྟར་ན་སྦྲུམ་མ་ཚོས་ཏོག་དབྱིབས་གཉན་རིམས་ཀྱི་སྔོན་ཁབ་བརྒྱབ་ན་འགྲིག་གི་ཡོད་པའི་ཐག་གཅོད་བྱུང་འདུག དེ་བཞིན་བྱིས་པ་ལོ་ ༢ ནས་ ༡༨ བར་ལ་སྔོན་ཁབ་སླད་ཉམས་ཞིབ་གནང་དང་གནང་བཞིན་པ་རེད་འདུག་པ་དང་ཚོད་དཔག་ལྟར་ན་ཕལ་ཆེར་འདི་ལོའི་ཕྱི་ཟླ་ ༩ ནང་གྲུབ་འབྲས་ཐོན་པའི་རེ་བ་འདུག ཅེས་སོགས་གསུངས། །
